歡樂大排檔 Sam's Place：籠「樂」人心

同細佬妹嘅做節飯，因為種種原因，一拖再拖，結果總算都約得成。而晌深水埗、長沙灣一帶（就佢哋方便），搵到一處「大排檔」大家都想試。

上到嚟個場都幾特別，地方幾大，裝修又唔叫得扮懷舊，但有啲傳統嘅裝飾，尤其放晌餐廳尾嘅「大牌坊」，絕對喺打卡位。此外，仲有幾個大大細細唔同嘅廂房，不過，個個房有客就唔方便影相。

餐牌有別啲大酒家，製作都好簡單吓，都喺A4紙加彩色打印過落啲透明膠板度。順便一提，茶錢收$10位，酸菜就$10一碟。不過，有一點好奇怪，明明睇見佢收費表有列明需收加一服務費，但最後張單又唔見佢有收喎！

陳皮燒鵝皇 $178
我哋得4個人，嗌1/4隻都好夠食，外皮色澤閃爧，咬落香脆可口，而皮下脂肪唔多，但食落淡淡脂香，感覺不油膩，啲鵝肉就非常之嫩滑，唔點冰梅醬，就咁食都已經非常好食。

鳳梨生炒骨 $138
呢一個喺指定菜式，次次同細佬妹食飯都一定嗌呢一款經典小炒。老實講，個生炒骨真喺炒得幾靚仔，個茨汁唔會話太多，剛好包住每嚿排骨，咬落外層又好香脆，肉質鬆化，個汁又唔會好嗆喉，的確有水準。

清蒸細沙巴躉仔 $148

呢度仲有個小插曲，佢本身有分大條、細條，我哋4個人咁就梗喺嗌條細啦！最後真喺唔知咩原因 嚟咗條大嘅，我哋亦都有同侍應反映嚟錯，怕喺其他客叫嘅，侍應同廚房溝通咗一大輪，最後應該喺廚房整錯，亦無其他客有嗌大嘅沙巴，所以，變相益咗我就食條大嘅，真喺多謝廚房大佬，魚條蒸得啱啱好，肉質非常之嫩滑，又好有魚嘅鮮甜味。

瑤柱扒豆苗 $138

單喺睇樣就見到交足貨啦，豆苗多，瑤柱又多，仲要前者好嫩，後者唔喺碎濕濕嘅貨色，陣陣鹹香，令青嫩嘅豆苗更加好食。

瑤柱蛋白炒飯 $128
依家同佢哋食飯都好少嗌白飯，反而次次都嗌啲碟炒粉飯麵，想大家食得好啲嘛，而今次呢碟炒飯 亦覺炒得有水準，飯粒夠乾身，又加咗好多炸瑤柱絲、蛋白同菜粒，味道亦剛好。

整體嚟講，啲招呼都OK嘅，個別阿姐仲好鬼有禮貌，菜式嘅份量都好足秤，味道亦都唔錯，難得唔收加一添，呢個位真喺要讚；相反，要彈一彈嘅就係啲杯碗好似洗得未夠乾淨，有部分杯拎上手有啲「黐立立」嘅感覺。

個人評分
味道：9/10
環境：7/10
服務：6/10
抵食：8/10
平均每人消費：HK$195

餐廳資料：
歡樂大排檔 Sam's Place
地址：長沙灣元州街290-296號西岸國際大廈3樓
電話：2387 7220