鐵牛台灣牛肉麵 Iron Cow Taiwanese Beef Noodles：「麵」貌一新

亞洲菜系中，食得最多嘅就喺台灣菜，最鍾意飲嘅就珍珠奶茶，所以，今晚約咗老友出嚟食飯兼「開會」，因為嚟緊禮拜日搞活動，順便傾下啲細節嘢，佢話就我地點，所以，揀咗晌公司附近嘅「鐵牛」。

好多人都話中環一入夜就好靜，其實睇下邊個位置，蘭桂坊、半山自動扶手電梯呢幾截其實好多遊客，而入到嚟「鐵牛」近乎可以講座無虛席嚟形容，只不過喺平日晚上，都坐到咁爆。講返個環境，一室木系，光猛整潔，而講到最佳位置非卡位莫屬，因為零舍闊落，舒服好坐。

枱側就放齊豉油、豆瓣醬、辣椒醬俾大家自行再作調味，仲有牙簽、紙巾放晌度自由取用。

先翻一轉餐牌睇吓有咩揀，餐牌製作幾精美，大部分菜式都圖文並茂，以分類而言包括臭臭鍋、台灣便當、湯麵、拌麵、小食、飲品，而惠顧任何火鍋套餐、便當、麵食，飲品都有減$10優惠。天氣仲有少少寒，所以，目測所見，有唔少人嗌火鍋套餐。

鹽酥小拼盤 $56

小食都有好多地道台式嘢，而呢一款拼盤就可以試勻3款小食：台農57號甘梅地瓜、逢甲鹽酥雞、酥炸花枝丸。啲嘢炸得唔錯，食落唔喺好油，地瓜粉甜，灑咗啲甘梅粉，酸酸甜甜幾好食，鹽酥雞外脆內軟，花枝丸好有魷魚味，整體確喺唔錯。

綜合滷味拼盤 $56

另一款小食亦喺台式嘅經典滷味拼盤，又喺一次過可以試到3款滷味小食：豬耳爽、滷蛋、滷大腸，每樣嘢都滷得好入味，豬耳果然好爽口帶脆，滷蛋好香，仲帶少少溏心，大腸望落去好脆，內壁仲有好多肥膏，但咬落唔覺好油膩，亦無嗰陣陣臊味。

總舖師私房牛肉麵 $88

主食方面，老友喺牛魔王，所以，一眼就相中呢款集金錢腱、牛肋條、牛筋及牛肚絲嘅私房牛肉麵。先呷口湯，香而不濁，幾款「牛」都好好食，牛肋條非常鬆化，牛筋軟腍有咬口，仲有浸透嘅甘筍同蘿蔔都好好食，麵條份量亦多，果然有質素，抵食。

蜜汁芝麻雞髀乾拌麵 $82
今晚飯癮唔大，改試試乾拌麵，亦因為較少食，亦好想試試，就揀咗款配雞脾。果然配上大大隻雞脾，燒得幾靚仔，糝滿芝麻，最好喺雞脾已一開三，方便夾嚟食，味道香濃，肉質嫩滑；麵條加咗好多滷肉、青瓜絲同蔥花，撈勻嚟食，味道、口感都非常之好。

宜蘭柑桔檸檬蜜 $30

老友揀食濃味嘅牛肉麵，所以，佢就話專登揀柑桔檸檬蜜嚟中和一吓，佢就話杯嘢飲酸酸甜甜，感覺好唔錯。

閨蜜紅豆珍珠奶茶 $36

小弟向來喜歡珍珠奶茶，加埋紅豆就更加好，不過，有段小插曲，飲咗好耐都未啜到珍珠，再撩兩撩睇睇，發覺真喺無，侍應都唔好意思，即時幫忙加番，可謂忙中有錯。講番啲奶茶，幾醇香，珍珠好咬口，紅豆又綿又甜。

整體嚟講，環境舒服，出品有水準，其實我都幫襯過尖沙咀店，但已經好多年前嘅事，能屹立多年之久，就連疫情都捱得過，自有其實力。

個人評分

味道：9/10
環境：8/10
服務：8/10
抵食：9/10
平均每人消費：HK$202

餐廳資料：
鐵牛台灣牛肉麵 Iron Cow Taiwanese Beef Noodles
地址：中環蘇豪威靈頓街98號翡翠中心2樓A及B號舖
電話：2660 8321