Bayfare Social：免費午餐

真喺有啲無厘頭，最近收到銀行邀請，可能見我都有丁點基金投資晌度，想搵我做番嘅理財分析，都預佢哋會順便推銷吓啲投資產品，最後又無喎，仲堅送咗張瑰麗酒店「Bayfare Social」西班牙餐廳嘅午餐劵，所以，訂定位去食餐免費飯。

雖然話酒店晌K11 Muse上面，但指示牌唔多又唔清晰，都兜咗好耐先搵到。貴為5星級酒店，環境及服務自然有番咁上下，難得感覺卻喺好輕鬆自在。不過，整體地方喺大嘅，但唔明點解部份枱櫈嘅安排會咁貼，唔想聽到隔離講嘢都焗聽。

講番個免費餐，喺兩道菜供二人享用，只得一份麵包籃、一份熟食冷肉盤同一份西班牙海鮮飯，份量上因為老婆細食，我哋都OK嘅，如果兩位正常食量嘅男士，就幾敢肯定唔夠喇。因為免費，餐牌就無標價錢，但睇番散點嘅餐牌，推算成個套餐值$670左右。

趁得閒，啲嘢又未上枱，所以，順便影影個散點餐牌出嚟俾大家參考個價格。

麵包籃

先上一份麵包籃，並附上西班牙產嘅雪梨醋同初榨橄欖油，顯得有啲高檔。麵包有兩款，都喺睇番餐牌所知，包括酸種麵包同扁麵包，雖然訂枱時會問你有無咩食物敏感，並一早講咗希望喺無麩質，但嚟到都喺話你知佢哋唔會提供無麩質食物，真喺嘥氣，成份麵包籃就只好由小弟全力處決掉，等老婆食多啲飯。

熟食冷肉盤

晌餐牌裡面只寫上菜式名「Charcuterie Board」，卻無講包含咩款式風乾肉腸，嚟到一睇共有5款，有啲會拼上唔同嘅芝士、果乾，但今趟就唔見，只喺伴有少少烘脆咗嘅果仁。由於侍應無特別介紹呢5款肉腸，加上小弟對西班牙菜唔在行，所以，俾唔到大家佢哋嘅個別名稱，然而，整體嚟講，各有特色，有啲鹹香有咬口，有啲質感細膩有陣陣肉香，有啲就有油脂香得嚟又唔會覺好肥。

西班牙海鮮飯

套餐嘅主食喺西班牙菜嘅經典西班牙海鮮飯，都喺按傳統用上大鐵鑊呈上，飯面有大蝦、海蜆、墨魚仔，再加一抹蒜泥蛋黄酱同檸檬角，老實講以一間五星級酒店內嘅餐廳而言，餸料嘅份量確喺偏少，海蜆同墨魚仔都唔喺好有睇頭，還好啲料都夠鮮甜，飯粒軟綿並吸滿湯汁，再唧上檸檬汁，撈埋啲蛋黃醬，味道幾正，不過，成鑊飯得一小抹蛋黃醬感覺又喺偏少。

佢哋有另一個角落，喺專賣咖啡、甜點同雪糕，我估兼營外賣生意，針對樓上嘅辦公室客。

朱古力蛋糕 $110

見個餅櫃嘅朱古力蛋糕幾靚，加上老婆都好鍾情朱古力系嘅嘢，尤其黑朱古力，所以，嗌多一客甜品嚟試試。賣到百幾蚊確喺唔平，但質素真喺高，底層嘅朱古力蛋糕鬆軟富回彈力，上層嘅朱古力慕絲好幼滑，朱古力味濃，而面層嘅鏡面朱古力漿做得富光澤，帶點甘苦餘韻，好食。

諗住嚟到咁高檔嘅酒店餐廳，應該會有啲驚喜，不過，跟現實就有啲落差，所謂兩道菜二人餐，份量都只可以講勉強夠，食物嘅質素就唔差，可是亦唔叫好好，尤其假如以實價計，性格比絕對唔高。

個人評分
味道：7/10
環境：8/10
服務：7/10
抵食：7/10
平均每人消費：N/A

餐廳資料：
Bayfare Social
地址：尖沙咀梳士巴利道18號香港瑰麗酒店5樓
電話：3891 8732