食樂 Snow：食「樂」，OK喎！

老婆跟朋友嚟食過呢間頗隱蔽嘅小店「Snow」（食樂）食飯，覺得唔錯，又有啲特色，所以，佢就專登帶我嚟試試當喺生日飯。

餐廳嘅地方唔大，但後尾見侍應帶客人走入水吧後面，相信裡面仲有啲位，而環境比較昏暗，只喺牆身幾邊打咗少少燈光。最特別四周、牆身都放滿植物，好綠化。

餐廳提供沙律、薄餅、小食，前兩者加$20可轉為套餐，包是日餐湯或田園沙律、飲品及是日甜品，非常划算；此外，仲有多款精選晚餐、廚師推介，另外，仲有一款特色菜「Snow靈魂烤雞」套餐，標明製作需時，要等30min。

意式白酒煮藍青口 $68

因為老婆知道隻雞嘅份量大，如果一人叫一個餐佢就怕食唔晒，所以，單點一份藍青口，雖然定位為小食，但都有一大碟，不過，始終只喺賣$68，所以，亦唔好要求好高，但食落質素算唔失禮，頗有酒香，青口肉又唔會話好韌。

羅宋湯、蒜蓉包（跟餐）

是日餐湯就揀咗羅宋湯，多蔬菜又比較健康，出嚟嘅成品亦唔錯，酸香微辣，幾醒胃；伴一小片薄薄嘅蒜蓉包，個人就略嫌又薄又細片，還好蒜蓉夠多。

Snow靈魂烤雞伴香烤時蔬 $168

果然等足半小時，真喺新鮮焗製，一切開啲熱氣四竄，除咗伴碟嘅烤南瓜同蒜頭之外，烤雞內仲有好多冬菇，咁嘅配搭都比較少見，味道亦唔錯。而隻烤雞加咗少少辣粉醃，幾惹味，雞肉亦都算嫩滑，就算雞胸都唔會好嚡。

是日甜品

套餐包咗甜品，可以揀芒果布丁或紅豆仙草，有無啲升級轉其他甜品，可惜喺無嘅，唔緊要，芒果布丁都啱食，加埋花奶，雖然喺普通嘢，但一樣可以喺一份幸福。

熱拿鐵咖啡 +$15

諗住店家都似喺好有格調嘅西餐廳，就嚐試加錢轉飲熱拿鐵，可是一送嚟就知喺機沖，都幾失望，總之飲番杯普通即磨咖啡就算。杯咖啡有相你睇，咖啡還咖啡，奶泡還奶泡，跟一杯手沖拿鐵喺兩回事。

整體而言，「Snow」嘅環境確喺蠻有氣氛，不過，食物質素亦無預期想中咁高，只可以講喺夠平穩，但就唔會有多大驚喜，定價方面亦OK，難得唔收加一，如果人多啲，試番店家幾款招牌菜可能感覺會唔同啲！

個人評分
味道：7/10
環境：7/10
服務：8/10
抵食：8/10
平均每人消費：HK$125

餐廳資料：
食樂 Snow
地址：葵芳美芳街1號地下1B號舖
電話：2683 1189