一食鍾情：識途「滷」馬

近來機緣巧合下，多咗嚟太子食飯，其實，都喺就朋友而已。今晚就過咗太子界限街呢邊，試試睇落新開無耐嘅「一食鍾情」。睇個名以為喺西餐嚟，其實喺主打白滷水，有識途老馬嘅死佬食過話唔錯，加上有羊腩煲，當然就要嚟試試。

廚房刻意設晌門口，晌光猛嘅燈光下掛咗唔少滷水嘢，自然喺用嚟吸引路人。行入少少，就清楚睇到師傅斬斬切切，內裡仲好乾淨企理，咁食起嚟更安心。

餐廳呈長形，個鋪都幾深，勝在樓底高，加上夠光猛，感覺都幾醒神。左邊一排全部都喺卡位，而入啲，有幾張細圓枱，又唔算拍得好埋，格局都喺似茶記，總之就坐得自在啦。

如一般茶餐廳咁，調味料就放晌枱側，餐具就晌旁邊抽櫃內，自由取用。

雖然鋪面特別標示主打白滷水，又擺滿滷水嘢，但其實餐廳嘅選擇非常多元化，滋味小食啦、馳名白鹵水啦、海南雞、乳鴿都有，仲有南洋咖喱、特色飯同意粉……等等。

此外仲有啲1人套餐、2人套餐，以及一啲經濟嘅窩心晚餐。佢哋仲有做埋早餐、午餐、下午茶添。

但天天寒地凍，最吸引喺幾款火鍋套餐，而當中嘅古法羊腩煲喺我哋嘅心水。呢個火鍋套餐都幾抵食，頭盤可以揀白滷水鵝或者滷水拼盤，定價就睇你揀邊款鍋物，再配有一碟生菜、兩碗白飯及兩客糖水。而我哋見有優惠，仲追加咗一條潮式白滷水凍烏頭，並加多款小食。

唔好諗住賣潮州菜喺啲老派餐廳，佢哋一樣掃二維碼落單，而且，介面嘅設計都幾好用。

滷水燻蹄 $22

店家有啲滋味小食，好平啫，都喺$20、$30左近，所以揀咗其中一款滷水燻蹄，餐牌已標明喺6片而已。切得厚薄啱啱好，外皮好有煙韌感，作為餐前冷盤過過口癮，唔錯唔錯。

1/4隻白滷水鵝（火鍋套餐）

初頭都諗，喺咪有半隻咁多，因為睇佢1/4隻都要賣到$110、$120，視乎上莊定下莊，所以，呢個套餐包1/4隻真喺好抵食，而送到嚟確喺份量十足。由於用上白滷水，滷水鵝色澤唔會太深，帶淡淡清爽嘅滷水醇香，食落鵝肉好嫩口，又不失陣陣鵝肉香味。

古法羊腩煲 $248

冬天食煲仔菜最賞心就喺熱住食，可以慢慢嘆，唔使擔心好快凍晒。羊腩煲嘅份量唔少，夠兩、三人食，羊腩炆到好腍好嫩，但就唔太羶，另外附送一 兜生菜，灼兩灼再沾上個羊腩汁，當然更好食，此外個汁底撈飯更喺指定動作。

題外話，白飯碗碗都俾到滿滿一大碗，加上啲碗都比酒樓常用嗰啲大，兩碗飯都夠到3個人食，呢啲位店家真喺好慷慨，唔會好小家。

潮式白滷水凍烏頭 $98

剝皮魚喺潮州菜中嘅一款既經典，又有特色嘅魚鮮菜，通常都喺烏頭、大眼雞。條烏頭做得幾好，肉質有少少實淨感，但入口好軟滑，沾上丁點豆辦醬，魚鮮味更突出。

糖水

會喺咩糖水呢？原來喺蕃薯糖水，本來就可以講喺平平無奇嘅一碗糖水，不過，啲蕃薯除咗用又粉又甜嘅「雞蛋黃」之外，就喺個糖水底勁薑，啱晒我，食羊肉本身都已經好暖胃，加埋啲薑湯，出到去外面得十幾度都唔覺凍呀！

總體嚟講，果然定價親民，加上食物真喺有質素，份量足，性價比確喺高；再者，啲招呼又好唔錯，啲姐姐都好有禮貌，值得再幫襯嘅小店。

個人評分
味道：9/10
環境：8/10
服務：8/10
抵食：9/10
平均每人消費：HK$127

餐廳資料：
一食鍾情
地址：太子界限街28號地舖
電話：2111 8488