Boat Thai：「船」風式晚飯

上次嚟iSquare睇戲，就見到呢間泰國餐，人氣幾旺，事後都再上網睇睇，風評確喺唔錯喎，價位又唔高，所以，趁朋友約食飯，選址尖沙咀，就建議嚟呢度食食泰茶。

餐廳採開放式設計，基本上喺鋪面已睇到成間餐廳嘅格局，的確好旺，座無虛席，幸好我哋都喺等咗5min就有位。

摺頁式餐牌，印刷幾精美，有唔少圖片做參考，而類別大致分為小食、湯品、沙律、麵飯、肉類、咖喱、甜品及飲品，以尖沙咀區而言，都算喺實惠。

泰式菠蘿刨冰 $38、青檸梳打 $38
泰式嘢都喺偏濃味，所以，小弟就揀咗杯菠蘿刨冰，而老友就揀咗杯青檸梳打嚟爽一爽。我杯刨冰其實即喺常叫嘅沙冰，大大杯，打得幾綿密，唔會有好多碎冰粒，裡面仲暈有少少菠蘿果肉，越飲越醒神。

泰式鮮蝦碌柚沙律 $88

呢道沙律嘅賣點就喺啲柚肉，有相你睇，啲柚肉拆到大大件，唔使自己郁手，就可以大啖大啖咁食，夠晒爽啦；而且，啲柚肉清甜爆晒汁，的確好食，而大蝦亦都爽口鮮甜，再加埋少少辣椒碎、椰子乾、花生粒，令到口感都豐富晒。

泰式船湯河 $78
餐廳鋪面亦特別標示船河，而從餐牌所見，亦喺推介菜式，當然要叫番一客試試，餐牌亦標明有牛肉片、牛丸同炸豬皮。湯河份量十足，啲河粉比港式嘅窄身少少，但同樣滑溜，而湯頭好香濃，牛肉嫩滑，牛丸好爽口，夾埋啲炸豬皮，真心唔錯。

鮮菠蘿海鮮炒飯 $88

講到明鮮菠蘿就真喺成件連皮嘅燒菠蘿放埋一齊上碟，夠誠意，而件燒菠蘿香甜多汁，燒過暖暖哋可以留到最後當甜品食。講番個炒飯，炒得爽身，飯粒分明，裡面混有蝦肉、魷魚、菠蘿粒、蠟肉、提子乾，再撈埋啲腰果同肉鬆，味道豐富，食味一流。

試過之後就明白點解咁旺場，雖然話依家好多食肆結業，但有質素嘅自然有捧場客。溫馨提示一吓，餐廳有用餐時限1.5小時，基本上食餐飯就夠晒喇，但如果無客等位，都由得你坐嘅。既然見出面仲有咁多人等位，我哋都旋風式食完就讓啲位俾人。

個人評分
味道：8/10
環境：7/10
服務：8/10
抵食：8/10
平均每人消費：HK$181

餐廳資料：
Boat Thai
地址：尖沙咀彌敦道63號iSQUARE國際廣場6樓601號舖
電話：3618 8180