Moodie Wine & Dine：誠意午餐

有個老死喺做私人司機嘅，工作非常忙碌，因為佢老細嗜好多，經常要用車，所以，約佢食飯真喺非常難，趁佢老細飛咗就約出嚟中環食餐便飯。佢平日咁辛苦都喺求求其其食一餐就算，咁約佢梗喺唔會食快餐店、茶記啦，所以過咗嚟「和安里」呢一間新開無耐嘅西餐廳「Moodie」，睇過啲風評唔錯，方便食完傾下偈。

餐廳樓高兩層，地下喺廚房、水吧同埋有少少座位，一室以黑色為主調，一邊水泥牆，一邊長形藍色磁磚，簡約得嚟夠型格，感覺舒服。廚房算喺開放式，所以睇到師傅做菜嘅情況。

而樓上座位比較多，好啲似覺閣樓私竇嘅感覺，因為今次就朋友時間，晏啲先嚟，所以，趁啲客人走晒先補番啲環境相。而服務方面幾唔錯，店員招呼殷勤，又好有禮貌。

午餐餐牌一頁紙睇晒，主食分三大類、沙律、法國青口及意大利麵，定價$138-$168，選擇務求貴精不貴多，而最划算嘅梗喺加$35加配餐湯、沙律同甜品啦，至於飲品，就要另外散點喇。

另外，放埋主餐牌同飲品餐牌俾大家參考一下。

是日餐湯

今日所飲嘅喺粟米忌廉湯，咪睇個湯好似平平無奇，其實，一入口你就知不同凡響。先講個口感，真喺好滑溜，又夠熱喎，就算喺微暖，我覺得都喺唔合格，而餐湯嘅粟米味好濃郁，好香甜，完全引發出粟米嘅精華。

是日沙律

餐牌就無講會喺咩沙律，不過見佢有兩隻大蝦，又有啲橙肉，就幫佢起個名叫大蝦鮮橙沙律。啲火箭菜加咗少少油醋，食落好新鮮清爽，而大蝦口感爽彈，好有鮮甜味，配合埋清甜嘅橙肉，喺令人食完更開胃嘅前菜。

意式羅勒蕃茄煮法國藍青口 $168

一整個小鍋上枱，份外有睇頭，睇落啲青口唔喺好大隻，但其實食落你就知喺靚貨，早前去過一轉比利時，所食嘅都喺類似呢啲品種，細細隻，食落啲青口肉好鮮味，同埋好嫩滑，唔似你平時嗰啲打邊爐嘅青口，大就大喇，不過，有時韌到好似擦紙膠咁，而且加咗羅勒、蕃茄、洋蔥、水瓜柳去煮，好意式嘅配搭，有陣陣田園清新香氣；而啲薯條新鮮炸起，入口熱焫焫之外，更喺香脆唔油。

龍蝦湯蕃茄長通粉配雞胸 $168
呢個長通粉面頭刨滿巴馬臣芝士，賣相睇落都好吸引，先試下啲長通粉，呢隻喺屬於粗身啲嘅長通粉，有時我會叫佢做「水喉通」，入口有韌性，煮得啱啱好，而且，沾滿晒醬汁，個汁真喺幾正，既有龍蝦香味，又有蕃茄嘅酸香味，帶少少辣勁，食落好醒胃；至於啲雞胸，似喺先慢煮過再煎香，入口可以形容為爽滑，咬落去有少少爽口感，肉質就真喺好嫩、好滑，可以講無乜挑剔位。

馬卡龍配青檸雪葩

最後登場嘅甜品都無求求其其，馬卡龍有好多口味，好隨機，我嘅喺咖啡味，朋友嘅喺抹茶味，而啲馬卡龍咬落去外層脆脆，裡面好煙韌，比一般常食到嘅算少甜；青檸雪葩唔使多講，味道清新，冰涼清爽，口感細滑，唔會食到有冰粒感。

朋友就好滿意今餐午餐，覺得水準高，既可以舒舒服服食餐晏，又可以靜靜哋傾吓偈，喺打工仔嘅小確幸。

個人評分
味道：9/10
環境：8/10
服務：9/10
抵食：8/10
平均每人消費：HK$223

餐廳資料：
Moodie Wine & Dine
地址：中環和安里6-7號地舖
電話：6616 6540