KAAZI Restaurant & Bar：「非」常午餐

非洲菜好少接觸，今日同舊同學食晏聚舊，就好奇地揀咗一間賣南非菜嘅餐廳「KAAZI」， 小店位處「蘇豪」，所以，食晏時間過嚟人流唔算多，可以讓我哋舒舒服服傾下偈、懷緬吓舊事，又講吓將來。

餐廳屬小店形式經營，所以，踏上幾級進入餐廳，已睇晒成個環境。左邊喺酒吧區，晌「蘇豪」賣酒喺一個重要嘅收入來源，而右邊就喺2 / 4人枱，目測所見全場大概10個位左右，裝修簡約，牆上畫有兩大幅色彩豐富嘅壁畫，都幾吸晴。

午市主要提供3道菜嘅午餐，包括頭盤、主菜、甜品或咖啡，定價$135，以中環區而言，收費合理；但喺需留意，4款主菜中有兩款需要另外加錢。店長順帶都介紹一下佢哋餐廳嘅特色，除大部份食材都由南非空運過嚟之餘，烹調上都盡量突出食材嘅原味，更刻意用上燒烤嘅方式。

Blue Nile $50
店長話新推出咗啲無酒精雞尾酒，呢一杯就喺以新鮮黑加侖子、檸檬汁、石榴做成，一身豔麗嘅紫黑色，舊同學就話幾清新，帶微微酸爽。

Strand Beach $50

小弟呢一杯色澤清澈嘅喺以Ginger Ale加入檸檬汁及少少糖水，口感清爽之餘，飲落好舒服，好襯一陣所食嘅濃味串燒，正正有種平衡嘅作用。

Braai Prawns

頭盤我哋揀咗一款串燒蝦同田園沙律，先介紹碟串燒蝦，雖然賣相簡單，但睇起嚟啲蝦燒得帶點焦香，而且，喺大大隻嘅虎蝦貨式。入口蝦肉好爽彈，鮮甜味盡出，灑咗少少蒜蓉同芫荽葉作提味，更佐以蕃茄蓉，酸香鮮活唔做作。

Green Salad
田園沙律底有火箭菜、生菜、青瓜，以及近年甚人氣嘅超級食物石榴，淋上油醋，絕對喺食番晒食材嘅原味，作為頭盤，既開胃，又清新健康。

Sea Bass +$30

主菜方面，我哋揀咗一道煎鱸魚同一客牛肉串，值得一讚嘅喺服務，兩個頭盤會同時間一齊上，兩道主菜亦都喺，唔會前後腳。先講講個鱸魚，單喺外觀已經睇到煎得好靚仔，入口外皮好香脆，肉質嫩滑細緻，非常有魚味，淋咗啲牛油檸檬汁，陣陣清香更突出魚鮮味，底下嘅炒波菜亦嫩滑好食。

Braai Beef Skewers +$40
佢哋嘅燒烤確有一手，頭盤嘅串燒蝦好好食，而呢道燒牛肉串亦都好正，從餐牌所知啲牛肉以蒜頭、紅辣椒粉、肉豆蔻粉所調味，再加上一隻叫做「chermoula」香料（上網摷到有咁嘅譯名：北非摩洛哥香草辣醬），所以，食起嚟唔單止惹味，個味道仲好有層次、好豐厚，加上肉質好軟腍，舊同學就大讚好食，梗喺啦，佢本身就喺牛魔王，一向都鍾意食牛。

Malva Pudding

店長介紹呢一款喺南非好傳統嘅甜點，加入杏桃同棗烤焗而成，小弟就第一之食，杏桃嘅味唔叫話好突出，但整體仍有一份清甜嘅香味，口感帶少少濕潤，淋上少少雲呢嗱醬，作為餐後甜點好唔錯。

今餐飯，確喺幾有特色，招呼好好。而講開非洲，小弟正正10年前確喺有幸到過肯亞一趟，喺一次好深刻嘅旅遊體驗，顛覆咗我對非洲嘅印象。

個人評分
味道：8/10
環境：7/10
服務：9/10
抵食：8/10
平均每人消費：HK$242

餐廳資料：
KAAZI Restaurant & Bar
地址：中環士丹頓街21號地舖
電話：9010 9477