四季餐廳 Seasons Cafe：「季」多不貴精

星期六，天氣好，自然又喺我哋一班老友嘅行山日，因為今次嘅人腳喺行慣山嘅組合，所以，就揀咗條新線一齊探吓路，萬一行錯都嚟唔驚。照計劃，由城門水塘轉入「虎蹤徑」，行到大城石澗，過澗之後經小徑上鉛鑛凹，最後就返落梨木樹，當然重點就喺下午茶啦。其中一位老友喺梨木樹街坊，自然由佢發辦食邊間，佢就揀咗佢嘅飯堂「四季餐廳」。

屬於新派啲嘅屋村茶記，所以，格局都比較新派少許，整體嚟講，裝修新簇，企理整潔，都喺以卡位為主，有少量圓枱。

餐廳兼做埋港式麵包，所以，近門口有個麵包櫃，有新鮮出爐麵包賣，當然，唔少得港式名物蛋撻啦。

我哋入座時都差唔多兩點，梗喺等下午茶時段啦。不過，都貼埋佢哋嘅午餐俾大家參考吓，供應去到5:00pm架。

而下午茶餐都有好多選擇，輕怡少少嘅有麵包餐、多士餐、薯條沙律餐、三文治餐、吉列魚柳餐，飽肚啲嘅就有濃湯通粉餐、迷你丼、炒粉飯麵、烤焗飯餐……等等，豐儉由人。

另外，仲有一個11:00am後開始供應到收鋪嘅招牌特餐及撈得起常餐。

冰火脆皮菠蘿油配惡魔炸雞脾 $38

今日諗住食豪少少，有心水嘅菠蘿油夾炸脾，真喺邪惡嘅組合，但送到嚟賣相真喺嚇一嚇，點解隻炸脾燶成咁？菠蘿油都OK嘅，面皮算脆口，但冰火就唔講得，而且，我塊牛油比友人嗰塊薄好多喎。至於雞脾，有眼你睇，燶咗，仲燶得幾交關，外皮就好乾吓，咬落去還好，肉質唔算嚡，唔食層皮，雞脾肉嘅味道其實幾唔錯。

熱奶茶

杯奶茶就你甩拖，色澤深沉得嚟有光澤，茶底芳香，飲落醇厚，口感亦夠順滑。 奶茶，始終都喺晌茶記嘅好，喺小弟嘅必然選擇。

冰火脆皮菠蘿油餐 $25

睇落，友人嘅菠蘿油喺咪正過我嘅好多呢，主要喺塊牛油又大又厚，我覺得菠蘿油喺要切成咁先至似樣，而咬落去先至有嗰份「油感」。

粒粒金磚西多士配蒜香生炸雞中翼 $38

比起我嘅炸脾，啲雞翼就炸得好樣少少，友人亦話啲雞翼肉質唔嚡，外皮香脆，而「粒粒金磚」就即喺厚西多一開四而已，除賣相喺立體咗、靚仔咗，比一般一塊過嘅，多咗啲炸邊位，多幾份香口感。

既然喺友人嘅飯堂，應該喺唔差先會長期幫襯，不過，觀乎今日小弟所食嘅，就落差幾大，同埋水準唔穩定，好似炸脾同炸翼嘅對比，出嚟嘅效果差咁遠。如單喺計我嘅茶餐，就唔合格，計晒整體幾樣嘢，只可以拉平均，叫僅僅合格。

個人評分
味道：5/10
環境：6/10
服務：7/10
抵食：7/10
平均每人消費：HK$38

餐廳資料：
四季餐廳 Seasons Cafe
葵涌和宜合道389號梨木樹商場1樓129號舖
2994 6338