米飯主題餐廳 Red Rice：「米」再有下次

呢排天氣好麻麻，不時勁落大雨，都唔喺好敢約啲老友行山，不過，遇正天氣好轉，就會同老婆即興走一轉短山，由美孚屋企起步，經鍾山台、長坑村……一直上到去金山郊野公園，隨心揀九龍接收水塘或者石梨貝水塘兜個圈，然後返番落美孚或荔枝角，成程大概2hrs左右，輕輕鬆鬆。今轉就落咗去荔枝角，順便搵地方食晏，結果，隨隨便便搵咗「米飯主題餐廳」醫肚。

環境跟一般茶記無異，都喺以卡位或4人枱為主，整體嚟講有啲逼，卡位就還好，唔太大份嘅人，啱啱好坐到4個，不過，其餘啲4人枱就排得好密，基本上無乜距離，啲防疫膠板都喺做做樣而已，又容許搭枱。我哋正正飯市入座，都寧願等多陣等張卡位，唔怕一萬，只怕萬一啫。

我哋晌門口已先先午餐有咩揀，啱唔啱食先入去，目標就放咗晌啲蛋包飯及焗飯中。此外，其實選擇都幾多，兩大頁紙，仲有咖喱飯、日式蓋飯、健康蒸飯、扒餐、石鍋飯、沙律套餐……等等，都喺包基本飲品咁啦，定價就比同區其他茶記貴少許。

野菌雜菜蛋包飯（跟蒜蓉汁）$49

蛋包飯共有4款，每款都喺跟指定嘅汁，但如果轉汁需要加$2， 感覺有啲掠水之嫌，因為加錢轉嘅汁，都不外乎喺番啲黑椒汁、蒜蓉汁、咖喱汁， 唔喺咩更特色嘅醬汁，不過，老婆較喜歡咖喱，都照轉。不過，碟飯嚟到，第一個疑問喺，加咗$2，啲汁去咗邊？

原來啲咖喱汁晌啲野菌雜菜底下，差啲以為佢俾漏，而啲野菌、雜菜喺白烚，完全無味，就連丁點鹹味都無；沙律部份都hea做，通常生菜嘅頭都唔要，因為又硬又乾，但唔嘥照俾埋個客。而飯底有搵啲茄汁炒過，但有少少濕，最好相信喺放面嘅炒滑蛋。

蜂蜜柚子荔枝蜜 +$8

老婆一向講健康，所以，唔介意加多少少轉呢一款養顏特飲，睇枱上嘅宣傳，仲講緊喺冬日推介，兼話呢款熱飲有潤喉、降火、排毒，前者就無庸置疑，不過，後兩者就好有保留，有荔枝喎，仲降火？成份中有邊樣嘢可以排毒呢？

成品上到嚟，感覺就喺一杯柚子蜜（因為見杯底有好多柚子皮）+蜂蜜嘅熱飲，荔枝呢？得一粒！仲喺一睇就個罐頭嘢。味道方面，咪就喺甜多少少嘅柚子蜜囉，真喺無咩特別。

王牌厚切焗豬扒飯 $53

既稱為王牌，自然喺多啲期望，查實賣相睇落都幾唔錯，焗到有少少燶燶哋，幾靚仔。飯底喺炒過嚟，飯粒分明，質感又爽身，豬扒就唔似「大家樂」嘅「一哥焗豬」咁，一大塊厚切，而喺有幾小塊，亦算唔上厚切，質感OK啦；但個人覺得，個蕃茄汁底就好一般，蕃茄味唔夠天然鮮活，覺得都喺以茄膏去推，濃就濃喇，但比較酸，缺少咗蕃茄本身應有嘅鮮香味。

凍奶茶 +$3

嚟茶記，平常就一定喺揀熱奶茶架喇，不過，今日真喺幾熱，行到身水身汗，所以，要杯凍嘅，仲好快送到。凍飲果然喺爽啲，不過，杯奶茶嘅茶底香就幾香，但明顯喺過甜，所以，飲到一半，等啲冰再溶多啲先飲，感覺先無咁甜。

老實講，今餐就真喺麻麻哋，最後，打算試吓用Openrice Pay俾錢，點知收銀大哥話唔用得定用唔到，總之最後就用八達通啦！整體服務方面，唔多好，亦唔太差，上菜有啲啲亂，店員態度一般般。

個人評分
味道：6/10
環境：6/10
服務：7/10
抵食：7/10
平均每人消費：HK$58

餐廳資料：
米飯主題餐廳 Red Rice
荔枝角長沙灣道883號億利工業中心地下8號舖
2151 0483