「西門町」賣嘅喺正宗嘅台灣地道菜，打開餐牌翻一翻，選擇非常之多，台式麵條佔咗好大比重，仲有就包括飯品、湯食、秘製鹵水、一人套餐，以及各式各樣嘅台式飲品。
而另有一張餐牌，喺一啲特色嘅台灣美食，有啲喺耳熟能詳，有啲則未見過，但同樣都喺甚富賣點。
至於文初提過吸引我哋嘅套餐，就分為2、3、4、6人餐，包咗好多款特色美食，但又有選擇性，當然配埋飯品或麵條、飲品，非常豐富。最後我哋計過，揀款二人餐，加錢轉個招牌拼盤，加埋兩個餸，配一碗麵、一碗飯，加埋跟餐嘢飲，再額外嗌多杯，夠晒3個人食。
講嘢食之前，順帶講講啲服務，真喺幾熨貼，一起手，拎埋匙羹、筷子，更搵杯熱水浸住嚟消毒。
黑糖珍珠奶茶 友人嘅嘢飲唔記得影相，就唔寫喇，小弟就揀咗最心水嘅黑糖珍珠奶茶。近排天氣好熱，飲杯凍飲特別爽，啜一啖先，奶茶嘅味道醇厚芳香，滲出陣陣黑糖嘅天然純甜香味，而啲珍珠亦唔錯，煙韌QQ，甜度又適中。
招牌拼盤 +$38 轉呢個拼盤真喺好抵，散點要$118，依家只需加$38，成品喺跟散叫嘅份量一樣（從餐牌嘅照片比較），5款冷盤，樣樣3件，啱啱好夠分。伴以酸辣醬及芥末沙律醬，而且，5款嘢食都好有特色。
五味山珍「五味」我就理解為有5樣食材，除一眼睇到嘅甘筍絲、木耳絲、青瓜絲，仲有啲素火腿及一條條透明嘅絲絲，再灑上大量黑白芝麻，簡單淋上少少麻油，食起嚟好清爽，感覺又健康。
芝心丸 炸香咗嘅芝心丸，色澤金黃，咬落甘香，而裡面嘅芝士填得滿滿，柔軟充滿芝士香味。
蝦仁玉蘭中卷5款冷盤以呢個最具心思，將蝦肉同青瓜切碎塞入魷筒再人切件，賣相已非常有亮點。沾上一點點芥末沙律醬，魷魚嘅鮮甜味好突出，而蝦仁、青瓜令口感清爽。
蝦餅 如芝心丸，外層炸到金黃，肉質彈牙而充滿蝦鮮味，此外，食落唔油膩亦喺重點。
紅燒牛肉 台式嘅紅燒牛肉一向喺好有市場，件件都鹵得入味兼上晒色，所以，睇落先咁「黑掹掹」。大口咬落去，口感極之鬆化，肉質好軟腍，入晒味，好好食。
鹽酥雞 台灣街頭小食嘅名物，新鮮炸起，所以，上枱時感受到嗰股熱辣辣，仲加咗少少炸紫蘇葉伴伴碟。食落外層甘香鬆脆，唔油膩，肉質更比預期嫩滑、唔嚡，帶微微鹹香。
涼拌茄子 啲茄子深紫色，隻碟又黑色，所以，可能影得唔太清楚，但喺，味道絕對食得出喺好，涼涼嘅茄子好腍好滑，簡簡單單淋上醬油，都已經好唔錯。
肉燥飯 平常食啲魯肉飯都會比較肥，不過，呢一碗肉燥就相對無乜肥膏，而且，鹵得好入味，醬汁香濃，撈飯淨食都覺得好正。再者，啲珍珠米飯粒分明，質感帶點黏糯，有飯香，配上肉燥，惹味非常。
擔仔麵 無論飯定麵，雖然叫細碗，但就如平常晌屋企食嘅份量。擔仔麵都喺加啲肉燥，伴上清湯，比起擔擔麵少咗份辣勁，但一樣咁好食，麵條夠彈牙，而啲肉燥絕對喺令到碗麵有畫龍點睛之效。
擂沙湯圓 套餐仲奉送甜品，是夜喺擂沙湯圓，暖笠笠，外皮煙韌粉糯，沾滿黃豆粉，而裡面嘅芝麻餡好流心，勁香芝麻味，正呀喂！
個套餐真心抵食，雖然喺套餐，但每一款菜式唔會喺「套餐」份量，跟散點嘅無分別，同樣大大份。而招呼都好好，店員雖然睇落算喺上年紀，但既醒目，又勤快，仲好好禮貌，讚呀！
個人評分
味道：8/10
環境：7/10
服務：9/10
抵食：9/10
平均每人消費：HK$95
味道：8/10
環境：7/10
服務：9/10
抵食：9/10
平均每人消費：HK$95
餐廳資料：
西門町台灣麵食 Seam Eett Taiwan Noodles
旺角通菜街2號鴻光大廈2N號地舖
2332 4673
西門町台灣麵食 Seam Eett Taiwan Noodles
旺角通菜街2號鴻光大廈2N號地舖
2332 4673
沒有留言:
發佈留言