文鳥茶舍 Munias Teahouse：與「文」同樂

晌石蔭「坤記粥店」食完粥，因為天色轉差，行山行唔成，就落返去葵興搭地鐵，晌工廠區一帶偶然遇到呢一家台式茶飲店，晌呢個位都幾估唔到會有間台飲店，而鋪面以白色為主調，帶少少文青感，一於買番杯嚟解吓暑。

鋪仔細細，一眼就睇晒，而餐牌設計成一本小書，果然文青，打開睇睇，簡單分咗「招牌飲品」及「自選特調」兩大類，無一般台式茶飲店咁花多眼亂嘅選擇，似乎以貴精不貴多為主線，但有好多加配元素，定價亦相宜。

除基本餐牌，晌鋪前仲有一個座地水牌，喺一啲期間限定嘅新品，正正就喺因為見到其中一款新品喺牛油果奶昔，先至更挑起幫襯嘅心。

黑糖珍珠鮮奶 $31

黑糖系喺小弟心水，加上本身都好珍珠奶茶一類飲品，所以，一眼就相中呢一款凍飲。雖然唔喺奶茶，但黑糖加鮮奶呢個配搭都好飲，店員更講明佢哋嘅鮮奶喺用明治4.3特濃牛乳，唔怪之得啲奶味咁濃咁厚；珍珠亦煮得非常QQ，煙韌而有嚼勁。

牛油果奶昔 $35

老婆一向喺講健康嘅人，加上牛油果喺近年被推為超級食物，加上牛油果做奶昔晌市面上唔太多，再者，自己都不時買牛油果食，但焗得靚都唔喺咁得心應手，三十零蚊俾人賺好過。一杯唔知用幾多個牛油果嚟整，但飲落牛油果味真喺唔錯，質感又好綿密細緻，果然無揀錯。

一到星期六、日，呢區唔似觀塘工廠區咁，都顯得比較靜，相信都喺靠平時啲寫字樓客，不過，附近多咗KCC，以及一啲新商廈，假以時日，相信會旺啲吧！

個人評分
味道：7/10
環境：5/10
服務：7/10
抵食：9/10
平均每人消費：HK$34

餐廳資料：

文鳥茶舍 Munias Teahouse
葵涌華星街1-7號美華工業大廈地下C1號舖
5625 3602