膳坊 Grand Cafe：從「膳」如流

是日單車郊遊日，同班老死由大埔踩到入羅湖，朝早10:30am出發，迤住踩，踩到4:00pm返到嚟大埔。之前一文就介紹過「鴻淘士多‧羅太豆花」嘅豆漿、豆花放題，當喺是日輕怡午餐。既然完晒今日行程，就當然要食份下午茶餐補補體力。由地膽帶路，穿天橋過到嚟運頭塘商場，嚟到「膳坊」，初時睇個名以為喺中餐館，原來都喺茶記，哈哈！

雖然疫情緩和咗好多，但餐廳就連半點防疫都無乜點搞，唔使量體溫就直入餐廳，除卡位加高背板，其他位就完全無咩阻隔，幸而地方闊落，客人又唔算多，而我哋就專登搵咗角落嘅一張圓枱仔，自成一角。

嚟下午茶，目標就只有下午茶餐，底面兩版，共有33款，以下午餐而言，都算選擇多。本來，又想試菠蘿油，試試跟之前幾間茶記嘅菠蘿油作比較，不過，咁北區都賣到30蚊，感覺有啲唔划算，就試咗沙嗲牛肉包。

基本餐具放晒晌枱面，方便就方便，但家下嘅環境，就唔喺咁衛生，遇着撞啱有隱形帶菌者嚟幫襯，唔爆都幾難，真喺貫徹佢哋對疫情嘅迤爆態度。

招牌沙嗲牛肉包 $32

有次晌大圍嘅「新城快餐廳 」都食過茶記式嘅沙嗲牛肉包，之前都講過吓，除奶茶之外，沙嗲牛肉亦喺茶記嘅另一名物。而「膳坊」嘅沙嗲牛肉包採用熱狗包，更加大份，睇外觀就見放滿晒沙嗲牛肉，絕無欺場。入口個包肯定烘過嚟，熱辣辣，而牛肉腍滑，汁底惹味。同上次嘅都有同一問題，就喺汁醬太多，瀉到一手都哋汁。

熱奶茶

而杯奶茶都唔差喎，茶底醇香之餘，口感都算幼滑，飲落芳香馥郁。所以，經常都話，晌茶記揀奶茶，真喺衰極都有個譜。

炸雞脾薯條 $38

之前嘅幾篇下午茶食評都喺淨寫自己食嗰份，但今次就特別寫埋其中一位死佬嗰份，皆因佢勁投訴隻炸雞脾燶到黑碳咁，仲要上枱時專登反轉嚟掩飾。佢話隻脾雖然大大隻，但又燶、又乾，絕對唔合格啦。

單以小弟今日嘅選擇，餐廳嘅出品確喺有水準，不過，其中一位死佬就投訴佢隻炸雞脾唔掂，所以，食嘢都講際遇架，哈哈！不過咁講，炸燶咗都照上俾個客，就見服務質素可以好到點！本來我都可以俾個好評佢，但隻脾就拉低晒總分，希望炸燶脾喺個別事件啦，而服務上再優化吓，做到從善如流，不斷改善。

個人評分
味道：8/10
環境：7/10
服務：6/10
抵食：8/10
平均每人消費：HK$32

餐廳資料：
膳坊 Grand Cafe
大埔曉運路10號運頭塘邨運頭塘商場地舖
2989 2312