Crostini Bakery & Cafe：寧缺「麥」濫

好耐無兩公婆出嚟睇戲喇，一來疫情緩和咗，就打算支持吓電影業；二來有啲戲真喺值得入戲院睇，畫面、音響都好過晌電視或電腦睇，所以，今次就專登過咗嚟青衣城嘅UA睇「福島50死士」，啲逼真感好強，真喺好似發生晌眼前咁，原來，福島核事故無釀成全日本出事都喺有啲「附碌」。睇完戲就梗要搵地方食晏，「Crostini Bakery & Cafe」喺心水之一。

餐廳地方唔大，主要喺供應外帶咖啡、麵包，裡面有少少位。有諗過無位嘅話，就會轉場，幸而剛好最入位置嘅高腳枱無人，讓我倆可於靜靜一角用餐。

睇餐廳名，就知主要都喺賣啲烘焙產品及咖啡，先介紹門面嘅蛋糕櫃，放滿各式各樣精緻嘅蛋糕，琳瑯滿目，標價範圍為$36-$52。亦有大個裝蛋糕，定價為$278-$338。

再走入少少，即服務櫃枱旁，就喺麵包櫃，主要都喺歐陸式麵包，着實唔平，一般而言，大概$20左右一個。

晌服務櫃枱另一旁，仲有個凍櫃，原來佢哋都有賣手工朱古力喎。

此外，唔止烘焙產品，晌挨牆一邊嘅層架，仲見到好多曲奇、咖啡粉、咖啡相關產品售賣，可以講店家嘅產品都幾多元化。

除了散點各類食物之外，佢哋仲有提供幾款套餐，全日供應。包括Super Bao（$75）、Pizza Set（$89）、Salad Set（$68 / $78），相信地方、人手所限，選擇亦唔算好多，不過，叫啱我哋口味。

以上套餐都會奉送標準熱飲，何謂標準熱飲？就喺下面張飲品餐牌中，所有標準裝嘅咖啡及各款熱荼。

黑椒豬脾芝士麥包 $75

咪睇豬脾兩個字就雙眼發晒光，以為喺咩手撕豬脾肉之類，其實都只喺火腿嘅一種，配以車打芝士、大量沙律菜而己。食起嚟，感覺都幾清新，而配上較特色嘅麥包，烘得香脆，更感有麥香。

所有三文治餐都會配薯角，但店員解釋，個焗爐出咗啲問題，所以，薯角另上，當然，比起餐牌張食物相嘅賣相就相差好遠。此外，佢哋嘅薯角唔喺炸嘅，喺焗嘅，感覺無咁「熱氣」，但香脆度就較炸嘅稍為遜色。

輕型三文魚薄餅 $89

雖然，餐牌都會寫明個薄餅餡料有三文魚、三色芝士碎、車厘茄、黑水欖、火箭菜，配以蜜糖芥末醬，不過，三文魚及火箭菜都喺焗好個批先後加上面，令感覺未為一體，啲火箭菜更好易跌到一枱都喺。

佢哋嘅簿餅有8吋直徑大，雖然採用半厚薄批底，但莫講話一個女生，男生都未必食得晒呀！其實，個批底我都覺得OK，三文魚鹹鹹香香，火箭菜帶點清爽，平衡番。

玫瑰咖啡

見到有客人嘅杯喺瓦杯，以為堂食就會用上瓦杯，但送到嚟喺隻紙杯，感覺當然差少少啦，再者，鮮奶咖啡無咗拉花，咁就梗喺失望啲啦。賣相方面，無疑拉低晒啲分，幸而鮮奶咖啡本身都唔錯，口感平均、醇香，當中嘅玫瑰花香味亦頗突出，當然，呢個部份都喺玫瑰糖漿嘅功勞。

香橙玉桂茶

老婆就見呢款茶幾特別，就點嚟試試，基本上，都只喺一個茶包泡出嚟嘅貨色，散點要$39杯，都真喺幾唔划算。茶色偏淡，入口帶幽幽嘅玉桂香，但老實講，香橙嘅香氣就真喺欠奉。

上文都講過，佢哋都有唔少麵包賣，廿蚊左右一個，感覺就有點點偏貴，但晌門口已見佢楝咗個推廣，買任何麵包，+$1多一個嘅優惠。

所以，我哋就索性買兩個返去當第二朝早餐，其實，就算近$10一個包都唔叫得平，但抵唔抵食就要睇埋啲質素。

蘑菇薯蓉包 $20

再烘番熱啲麵包，感覺新鮮度依然。先介紹呢一個蘑菇薯蓉包，重點喺中間嘅蘑菇薯蓉，其實唔好睇表面以為好多，實際好淺吓，雖然啲薯蓉打得好滑，但蘑菇部份唔喺佔好多。而包身屬歐陸式，咬落比較有軔勁。

芒果百爵茶合桃包 $20

另一款既有芒果，又有合桃，加上百爵茶，絕對喺小弟嘅心水食材組合，可惜，真喺跟期望有頗大落差。芒果、合桃本身晌包內就唔太多，而表面嘅斜紋餡料就喺百爵茶所做，但茶味隱若，故此，未有預期般好食。

無論堂食、抑或外帶，整體而言，個人俾分都只屬中間稍高少少。題外話，由於當日店家嘅焗爐出問題，我哋嘅薄餅真喺等咗好耐，雖然店員已好禮貌再三致歉，幸而我哋又唔趕時間，不過，如客人落單前先講聲狀況，會喺較好啲嘅處理手法。

個人評分
味道：7/10
環境：7/10
服務：7/10
抵食：7/10
平均每人消費：HK$82

餐廳資料：
Crostini Bakery & Cafe
青衣青敬路33號青衣城1樓154A號舖
2436 1868