福岡漢堡扒 Fukuoka Hambageu：捧「福」而回

老婆返學，是夜得一支公，因為過開嚟尖沙咀換禮品，所以，就順道食埋飯先返歸。由於老婆飲食偏素，既然得一個人就唔使咁多顧慮，自不然揀啲多肉嘅菜式。經過厚福街，睇到呢間「 福岡漢堡扒 」幾人氣咁，就投佢一票，入去試試。

睇個名，以為喺日本餐廳，再睇到牆上嘅韓文，加上有啲韓式泡菜供應，就更肯定佢喺韓國餐廳。鋪內環境四正，一眼望晒，主要喺4張長形大餐枱，最特別喺每個位都安裝咗小型抽氣管，唔會食到一頭煙。

再睇睇餐牌，主打喺韓式石燒漢堡扒，共有6款唔同配搭嘅選擇，最好喺分埋大中細份量，夠彈性。此外，仲有啲丼飯、拌飯、沙律及二人套餐供選擇，整體定價亦算親民。

而點餐都喺以剔紙仔形式，可以減少口頭落單嘅出錯。小弟揀咗「菠蘿煙肉和牛漢堡扒」，諗住喺較清新嘅配搭，而每一款和牛漢堡扒餐都包咗白飯、麵豉湯、配菜及沙律。

通常店員都會問你喺咪第一次，如果喺嘅話，佢都會稍稍講解點玩法，聽唔晒或聽唔切唔緊要，因為餐墊紙都印咗燒啲漢堡扒嘅方法。

雖然嚿火石好熱吓，不過，基本上要燒完晒一整嚿漢堡牛肉球，都要換一次火石，同店員講聲，佢就會幫你換。

正所謂工欲善其事，必先利其器，所以，除了韓式嘅鐵筷子及匙羹外，仲有個小剷，用嚟壓平及剷起件漢堡扒。

此外，唔喺誇張，當漢堡牛肉擺落嚿火石，真喺比起鐵板燒嗰陣火力更強，咋咋聲四晌，油花四淺，擔心淺到身上，餐廳好貼心，提供一次性嘅紙圍裙供客人使用。

百香果特飲 $39

食呢類燒烤嘢，配汽水本來就喺一絕，不過，見到「百香果」，就更提起興趣。估唔到喺咁鬼大杯架，店只更溫提攪勻先好飲。雖然都知道喺用上百香果糖漿，但加上檸檬，所以，飲落冰涼清爽，一口漢堡牛，一口特飲，寧舍「梳肝」。

菠蘿煙肉和牛漢堡扒（中份）$124

先介紹吓佢哋漢堡扒嘅賣點，唔喺小弟老作，純粹張餐墊紙有介紹，而佢哋嘅和牛喺用上澳洲貨，但屬於咩級別，我就無刻意去問，但當你試過，就知唔差得去邊。

之前都提過有埋白飯、麵豉湯、配菜及沙律，配菜喺韓式泡菜，食落唔算好辣好辣，啱我；麵豉湯屬較清嘅口味，而沙律喺椰菜絲配胡麻醬，呢兩樣就較日本風味喎。咪睇小碗白飯，好軟熟，又有飯香。

卒之輪到介紹今餐嘅主角「和牛漢堡」，中份量標明有160g重，總之，搓成一大大嚿牛肉球，非常有睇頭，再配埋啲煙肉、菠蘿、雞蛋及芝士，叫人急不及待要試試。

自己牛肉自己煎，將啲牛肉一放到火石即時冒煙，又咋咋聲，好有氣勢，用小剷壓平，煎透兩面。雖然，店方建議煎3秒，但小弟就再多數秒，等牛肉更焦香。

啲漢堡牛肉淨食，陣陣油香，但又不失肉味，兼且打得鬆化；其後配煙肉、配雞蛋，都一樣搭配好食，總之就自由發揮。甚至乎，燒燒菠蘿跟蛋片，亦有唔同風味，好玩又好食。

曾經有段時間興過石燒牛扒，就算依家都仲見有少少餐廳有做，今次嘅石燒以漢堡扒為主角，又別有一番滋味，以質素而言，定價都算親民，值得一試。

個人評分
味道：8/10
環境：7/10
服務：8/10
抵食：8/10
平均每人消費：HK$179

餐廳資料：
福岡漢堡扒 Fukuoka Hambageu
尖沙咀厚福街11號地下A號舖
5929 9167