Luna Cafe：「芝」味迎聖誕

小弟呢類返寫樓工嘅人，一啲餐廳只有閒日下午時段推出嘅優惠，就一向無福消受。不過，今日唔同喇，平安夜有得早放少少，所以，收工就走過嚟上環嘅「Luna Cafe」嘆個只有閒日先有嘅下午茶蛋糕套餐，享受一下閒暇嘅時間。加上喺平日，光顧堂食嘅食客唔多，讓小弟獨個兒更享受自在嘅空間。

「Luna」嘅雙層芝士蛋糕晌多年前都食過，不過，佢哋嘅Cafe就第一次幫襯。而晌門口，就大大個水牌介紹佢哋嘅下午茶套餐「Cheese Cake Set」（$65）：任何一款口味嘅Luna北海道雙層芝士蛋糕 + 指定嘅冷熱飲品，比起散點慳到廿蚊左右。

雖然餐廳嘅地邊唔大，但因為過咗午市好多，又喺閒日，所以，餐廳內十分寧靜，偶爾有一、兩客訂咗蛋糕嚟取貨，真喺嚟堂食嘅，就少之有少，加上裝修簡約明淨，故感覺更舒服。

除咗近門口一排對街景嘅窗口位之外，入啲仲有幾張面壁位，以及一大張共享大枱。而枱上擺咗盆黃色小花作點綴，令人心情都會唔同啲。

走到餅櫃前，睇睇有咩款式，除咗一啲恆常款式外，亦有啲期間限定，是日所見，就共有8款口味，小巧精緻。所有原材料嚟自北海道，跟足北海道富良野做法，標榜當地風格嘅芝士蛋糕。

而枱上，亦有張卡仔，簡單介紹一下各款芝士蛋糕嘅特點。

經典檸檬芝士蛋糕

其實好幾款都喺心水，例如血橙、炭燒咖啡、雪森林朱古力，不過，最後揀咗經典檸檬，只喺想食得清爽少少而已。而蛋糕放晌深藍色餐碟上，並以糖霜灑上店名Luna及月亮嘅圖案，因為Luna就喺意大利文「月亮」之意。

如果細心留意，就睇到蛋糕分為3層，最底層喺薄薄軟綿嘅海綿蛋糕，中層就喺濃香細密嘅忌廉芝士，而上層亦佔較大份量嘅就喺鮮檸檬果肉混合馬士卡邦芝士所做成（註：馬士卡邦芝士Mascarpone，我個人較喜歡譯為馬卡風）；因為馬士卡邦芝士本身芝士味唔重，故檸檬味非常突出，酸香清新，而且，質感細緻柔滑。一口過食晒3層，正所謂雙層「芝」味，雙倍滋味。

鮮奶咖啡

雖然朝早早餐已飲咗杯自家滴漏嘅靚咖啡，但嘆下午又點可以唔搵杯咖啡嚟襯吓，鮮奶咖啡更喺小弟至愛。心諗佢哋主力喺賣蛋糕啫，但啲咖啡絕不失禮，個拉花拉得線紋細緻，而且，入口好均勻，喺撞奶泡嘅手勢同功力，兼且咖啡味醇香細膩，唔輸蝕得過比啲咖啡專門店喎。

好難得晌平日可以咁悠閒享受一般下午時光，一邊食住蛋糕，一邊嘆住杯咖啡，仲可以整理吓思緒，諗諗來年嘅旅行大計。

個人評分
味道：9/10
環境：7/10
服務：8/10
抵食：8/10
平均每人消費：HK$65

餐廳資料：
Luna Cafe
上環蘇杭街26號地下