娘娘 Goddesssnack：「娘」性競爭

今日過一過到去「元創坊」睇啲嘢，行經「伊利近街」時，近角落位有間小店，因為門面紅晒色，晌呢條小巷嚟講都幾搶眼，加上店名叫「娘娘」，睇埋佢英名譯名就知佢喺賣小食。就晌門外駐足望兩眼，有啲特色三文治賣，轉頭處理完事務就順道晌度食個晏。

叫得小店佢就真喺好細，蚊型鋪，裡面得兩、三張高腳摺櫈，喺牆上有個「娘娘」嘅搞笑彩繪。

四面牆壁呀、地下呀、門口呀、廚房前玻璃呀……都貼有餐廳所賣嘅食物，但有少少雜亂無章咁。

幸而仲有一張餐廳單張，應該有齊所有食身喇，如娘娘小食、冬日暖湯、健康沙律、主題便當、三文治、特色雞蛋仔、飲品及茶作雪糕。估唔到鋪仔細細，又幾多出品喎！

冷泡茶（玫瑰烏龍茶）$22

望一望凍櫃，本來想試試「娘娘奶茶」，但咁搶手無晒，店長話試吓佢哋嘅冷泡茶吖，所以，就揀咗支「玫瑰烏龍冷泡茶」，感覺喺幾清爽嘅，但略嫌玫瑰花香味比較弱。

慢煮雞牛油果醬三文治 $58

又慢煮，又有牛油果，最心水嘅款式啦。件三文治嘅包裝紙好特別，喺印咗「大白兔」嘅糖紙，而三文治嘅賣相有幾分似韓國嘅「Isaac Toast」影子。因為三文治已經橫中切開，所以，一清二楚睇到夾有好多餡料，鮮爽嘅生菜、清甜嘅蕃茄、帶點鹹香味嘅雞肉，以及牛油果蓉，入口確喺口感豐富，味道有層次。的確，啲雞肉頗嫩滑，但牛油果未喺原片，個人認為感覺就會打咗啲折扣。

其實，小店嘅出品喺唔錯嘅，不過，個人覺得定價偏高，都擔心其競爭力。因為，賣茶嘅，單喺附近嘅「閣麟街」左右一帶，已有6、7家茶飲店，而賣三文治嘅，附近亦有數間咖啡店或輕食店，但求良性競爭，做大個餅，大家都有生意。

個人評分
味道：7/10
環境：6/10
服務：7/10
抵食：6/10
平均每人消費：HK$80

餐廳資料：
娘娘 Goddesssnack
中環荷李活道68-70A號地舖
5502 0045