將軍麵館 Captain's Noodles Place：值得再見「麵」

今次同啲團友嚟到西洋菜街食晏，「創始中心」下面間「台灣麵」話食到厭，另一家常到訪嘅車仔麵「百味車仔麵」亦幫襯得太多，今次想轉轉為味，就試吓同街嘅另一家麵店「將軍麵館」，大家都無試吓，志在搏一搏當試吓新嘢。

雖然門口嘅招牌寫住老北京炸醬麵，但室內嘅裝修，一室淺色木系，都喺走簡約風格，不過，就加咗點中國色彩嘅元素，好似啲吊燈、面譜擺設。

摺頁嘅餐牌底面兩版就印晒所有菜式，一版就圖文並茂嘅將軍小食及招牌麵，另一版就喺其他麵食、追加配料及飲品，凡點各款粉麵，飲品就半價。

枱上備有辣椒醬和甚少見嘅黃辣椒醬，可惜小弟一向都唔好辣，老友就啱晒。

將軍醬香豬手麵 $44

好多款粉麵都想試，都諗咗好耐先揀咗豬手，因為平時真喺較少食。啲粉麵嘅份量都幾多，上枱睇見大大碗，而每碗湯麵都註明配有炸醬、生菜、蔥花及芫荽，至於麵條可以揀粗麵或小麵。

個湯頭入口好醇厚、好幽香，唔會飲完有口渴嘅感覺；粗麵咬落有韌勁、耐浸，不愧喺自家製嘅手工麵，撈埋啲炸醬食，更惹味。

啲豬手點先？正，好入味，肉質好腍身，而外皮又有啲爽滑感，仲有啲膠質晌底，真喺堅好食。順口講講，啲碗都好靚，畫有青花瓷圖案，甚具中國色彩。

熱奶茶 +$6

半價配飲品就梗喺點杯奶茶啦，其實飲品嘅選擇唔太多，但請真，杯奶茶就麻麻哋喇，咁又唔叫差嘅，只喺茶味比較薄。

將軍厚切牛展麵 $47

專登擺晌餐牌面頁，就當佢喺店家嘅招牌推介，而友人又喜歡牛展，所以，啱晒佢啦！同樣，都喺份量十足，牛展亦有不少，不過，似乎就唔喺厚切喎，但就好入味，柔中帶韌，極有口感。

將軍撈麵 $32 + 黃醬豬手 $12

呢個組合，即喺變咗我嘅豬手麵嘅乾身撈麵版，不過，配料就比我配多，除淋上秘製醬汁，仲有芽菜、青瓜絲、炸醬、花生、蔥花、芫荽。友人話食起嚟，麵條變得清爽，更具口感，同樣，亦大讚啲豬手好掂，超好食。

老北京麻醬麵 $36

其中一位友人慳慳哋，揀選另一款撈麵「老北京麻醬麵」，但就唔再配餸。麵條淋上麻醬汁，而基本配菜有旺菜、甘筍絲、肉鬆、青瓜絲、花生，撈埋一齊食，味道幾芳香吓，都喺啲麻醬汁夠濃郁；佢話未試過食麵配肉鬆，感覺又幾得意。

依家晌街食碗麵都唔喺平架啦，不過，質素好嘅話都值，就好似今日嚟到所試嘅麵食，大家嘅評價都屬中上。然而，我哋無人試過佢啲小麵，唔知喺點，下次搵機會再試。

個人評分
味道：9/10
環境：7/10
服務：7/10
抵食：8/10
平均每人消費：HK$50

餐廳資料：
將軍麵館 Captain's Noodles Place
太子西洋菜南街200號地舖
3188 2365