走進餐廳，裝修摩登時尚，原木配灰色為主調，猶如魚鱗嘅牆壁及天花裝飾，令環境更顯型格。中午嚟到用餐，客人唔算太多，讓人感覺更閒適自在，非常輕鬆。
午餐有兩類選擇，一個喺平啲又快速啲嘅Express Lunch，另一個菜式選擇多啲，食得豐富啲，當然喺貴啲嘅Set Lunch。前者只喺$188 + 10%包餐湯或沙律、主菜二選一及是日甜品，餐飲需另加$20；而後者則分3個價位：兩道菜（$268）、3道菜（$308）或4道菜（$348），包餐飲，何謂4道菜呢？主菜只可揀1次，即喺前菜或甜品中可以多揀一客。
麵包小布袋
平時晌啲高級餐廳，都喺以麵包「籃」先奉客，小弟都喺第一次遇到麵包「袋」，黑底紅字嘅麵包小布袋裝滿法包，蠻有趣。雖然啲包唔熱，但法包外層極之脆口，一咬成枱都麵包碎，而包身好軟熟，感覺有份「新鮮」感，塗啲牛油已好唔錯。
隨後送上前菜，一共有6款選擇，有餐湯，有沙律，亦有啲類似小食，其實好多款都好有興趣，最後揀咗一款烤八爪魚嘅暖沙律。
Roasted octopus & ratte potato salad, Arugula, Spicy sauce
小弟稱之為「烤八爪魚法國薯仔暖沙律」，喺一道幾特別嘅沙律，配點火箭菜，感受到做得細緻、恰到好處。沙律微微暖，易入口，八瓜魚好軟腍、柔滑，而法國薯仔（Ratte Potato）算喺較少見嘅食材，薯仔連皮切成一片片，食落好香薯味，又好似有朕果仁香，軟軟粉粉。醬汁亦有心思，味道帶點酸，灑咗少少辣粉，辣度雖輕，卻有畫龍點晴之效。依道菜被定為暖沙律，其實，亦可視為一道熱前菜。
前菜食完抖一抖，就輪到主菜登場，5款選擇包括兩款魚類、牛肋肉、細寬條麵及意大利飯，小弟都算喺食肉獸一名，所以，偏向揀牛肋肉作為主菜之選。
Beef ribs, Gnocchis, Lardo di Colonnata, Brown sauce
主菜嘅「慢煮牛肋肉伴意式馬鈴薯丸子、意大利鹽漬豬脂薄片」確喺讓人有嶄新嘅體驗，首先，件牛肋肉大大件就睇得人好興奮，落刀到嗰吓已感受到好鬆化，軟腍到唔使點咬，無牙公公都食到，而且牛肉味極為濃郁，配個燒汁好襯。此外，「伴菜」喺古老意大利Colonnata地區嘅鹽漬豬脂薄片（事後上網翻查嘅其中一個譯名），簡單嚟講，喺以海鹽、大蒜與迷迭香等香草醃漬豬肥肉做成，睇落好似成片豬膏，但出奇地又唔喺咁肥、咁油膩，感覺似似哋啲巴馬火腿。
底下，仲有啲意式馬鈴薯丸子Gnocchi，印象中，以前都喺食過兩三次，接觸唔多，但口感就好過癮，成粒都喺實心，入口就煙煙韌韌，甚具咬口。
甜品都有3款選擇，當中最吸引小弟喺經典而出名嘅法式勃朗峰栗子蛋糕，講得經典就咪當喺一般嘅栗子蛋糕嚟比較。
Chestnut mont blanc, Meringue, Mandarin sorbert
賣相一如傳統嘅法式甜點，唔止要好食，仲要好睇得，猶如藝術品般嘅「法式勃朗峰栗子蛋糕伴香橙雪葩」，喺咪好有美感呢？絲帶朱古力、蛋白糖霜脆餅條、鮮黃花瓣都喺非常有心思嘅裝飾。有無留意到啲栗子蓉唔止唧得幼細，而且感覺好亮麗，完全無話放晌餅櫃雪咗成朝「乾爭爭」嘅感覺，無估錯嘅話，啲栗子蓉都喺有落單時先直接唧落碟。
啲栗子蓉唔單止軟滑粉甜，且栗子味濃，此外，中間更有原粒栗子，更喺有頭鋪到尾都喺栗子粒，令栗子味昇華，配上吉士，底下加層酥香鬆脆嘅脆餅底，口感更富層次。平衡番個栗子蛋糕嘅甜度，香橙雪葩嘅清新就恰好其份成為最佳配角，所以，件甜點實在喺超好食，喺不客錯過嘅出品。
Latte
唔好怪小弟老土，甜品點都要搵杯咖啡嚟襯，餐飲唔止可以揀即磨咖啡，其他特色咖啡如意大利泡沫咖啡、鮮奶咖啡一樣可以揀。眼前嘅鮮奶咖啡入口頗香醇，只喺撞奶泡嘅手勢未喺好平衡，唔喺每口個口感都咁勻一，其實，從拉花及奶泡嘅泡紋都粗略估到會有咁情況。不過，小弟就好鍾意隻咖啡杯，鮮橙色，好醒神，天寒嘅日子望落去有種溫暖感。
品嚐過3道菜之後，做菜嘅水準真喺唔使點懷疑。而環境又舒服，服務亦一流，上每道菜都會換上合適嘅餐具，一道菜接一道菜，相隔幾分鐘先上，等你有回味嘅時間，上菜侍應都會簡單介紹個菜有咩成份同特色，等你可以更用心欣賞當中嘅亮點，更喺小弟學嘢嘅時間，UMB確喺值得推薦嘅餐廳。
個人評分
味道：9/10
環境：8/10
服務：9/10
抵食：8/10
平均每人消費：HK$340
味道：9/10
環境：8/10
服務：9/10
抵食：8/10
平均每人消費：HK$340
餐廳資料：
Upper Modern Bistro
上環差館上街6-14號地舖
2517 0977
Upper Modern Bistro
上環差館上街6-14號地舖
2517 0977
沒有留言:
發佈留言