Seafood Stand：一嚐素堡

於年多、兩年前曾到訪過Seafood Stand紅磡店，仲記得佢哋啲漢堡做得唔錯，當其時仲留意到有一款素漢堡「野菜農場烤菇堡」，啱晒我老婆。最近，聽朋友講晌樂富開咗新店，而且，大間咗好多，點都要俾老婆嚟試一試依個素堡。

餐廳位處樂富廣場嘅另一邊，所以，出咗地鐵都要兜一兜先搵到。環境確實比紅磡店大好多，而且，都喺用餐嘅餐枱（因為紅磡店全部都喺高腳枱櫈），比較好坐啲。裝修無紅磡店咁美式風，但佢睇得出仍以海洋為主題，如海洋相關嘅海報、噴畫、壁燈及一啲拉起吊燈嘅麻繩，配合上柔和燈光，感覺舒服輕鬆。

食物方面，仍以海鮮及漢堡為主打，此外，仲有小食、沙律、湯品、肉類及意粉，數數吓，都有幾多選擇。

飲品方面，咖茶汽水以外，更有多款特飲，我就揀咗杯特色咖啡，而老婆亦揀咗杯特色花茶。

餐牌有多款小食，最好就點杯啤酒嚟配搭，所以，店家亦有生啤、手工啤供應，而且，更有埋餐酒添。

不過，最著數就梗喺點啤酒，因為見門口貼咗張推廣單張，就喺惠顧啤酒有買二送一優惠，唔怪得當晚都見唔少人隊番支啤。可惜我同老婆都唔好啤酒，實在無福消受。

法國鮮蠔湯 $48

外貌唔講嘅話以為野菌忌廉湯，當然，一入口就明白喺鮮蠔湯，皆因蠔味非常濃郁，鮮味盡出，質感又夠滑溜，極有水準。

野菜農場烤菇堡 $76

之前晌紅磡店曾試過「蝦兵蟹將堡」及「香辣羊仔柳漢堡」，都記得前者非常有驚喜，後者羊仔柳好軟腍，所以，對其所做嘅漢堡都有信心。餡料除有巨型大烤菇外，仲有蕃茄、三色椒、翠玉瓜粒、翡翠苗，再配車打芝士，就算全素，一啲都唔「寡」，口感極具層次，包身又夠軟熟，配上薯條及沙律，大滿足。

明太子海鮮扁意粉 $108

意粉類共有6款選擇，平貴都有，揀咗個中間價嘅海鮮扁意粉，扁意粉煮得好有咬口，煙韌好食，而個忌廉汁加入明太子，滑溜之餘，多添一份鹹鮮，稀杰度啱啱好，令扁意粉輕易掛汁；而鮮帶子、鮮蝦都十分新鮮，後者更好爽口，用料不賴。

玫瑰檸檬蜂蜜 $30

老婆所點嘅花茶，本來想要熱嘅，但店員話凍飲效果更好，不過，就要求少冰，唔想飲得太凍。首先，幽香嘅玫瑰味甚突出，隨之而嚟喺檸檬嘅清新，加上用蜂蜜調和，嗰份甜味嚟得自然，帶點冰涼嘅感覺，真喺唔錯喎。

開心果仁鮮奶咖啡 $34

平常飲鮮奶咖啡不外乎都喺榛子、焦糖之類，但見佢有款開心果仁口味，又幾想試試。墨綠色瓦杯，從杯面散發出醇香嘅咖啡味，雖然無拉花（都預咗，始終都唔喺家咖啡店），但入口算唔錯，香滑而滲出點點開心果仁香味。

今餐嘅素堡故然滿足晒老婆食素嘅要求，而個海鮮扁意粉同樣唔差，雖然價位唔算貴，但以樂富區計，可能啲街坊覺得唔夠大眾化，但觀乎當晚爆場嘅情況，唔少一家大細嚟食漢堡、海鮮，就知喜歡食好嘢嘅大有人在。

個人評分
味道：8/10
環境：8/10
服務：8/10
抵食：8/10
平均每人消費：HK$165

餐廳資料：
Seafood Stand
樂富聯合道198號樂富廣場1樓1104號舖
3621 0478