英王麵包店 A1-Bakery：凍餅雙莓嘜

因為家住美孚，故經常經過依一間「英王麵包店」，不過幫襯嘅唔多，就算幫襯都喺買麵包多，是夜突然想請老婆食蛋糕，所以，打算買兩件凍餅返去一齊嘆番吓。

臨近收鋪，望望餅櫃，凍餅剩番嘅款式真喺唔多，幸好所剩嘅幾款都啱佢口味。

小型包裝盒，啱啱好裝到兩件凍餅，仲附上膠叉，不過，如知佢有埋膠叉就叫佢免送，反正拎番屋企食。

藍莓撻 $26

店子有幾款鮮果撻，包括芒果、藍莓及士多啤梨，首選喺芒果，可惜無晒，只剩藍莓，我哋都OK。有別一般鮮果撻，用上好多忌廉或吉士，個藍莓撻只喺撻面有一抹薄薄嘅忌廉，依個更啱我老婆食，而撻底採用厚身嘅做法，加一層藍莓醬，再鋪上海綿蛋糕，所以，整體嚟講好足料，吃完可以講喺「好飽肚」，啲藍莓亦好鮮甜，唯一毛病喺撻殼唔夠脆。

藍莓芝士餅 $28

反而，小弟較欣賞件藍莓芝士餅多啲，單睇賣相做得甚有水準，芝士餅採用美國芝士位做法，薄薄嘅餅底，面層又烘得均勻，入口質感挺實而軟熟，芝士味濃郁，底下一層藍莓醬嚟得清甜不太搶，正正喺恰到好處，所以，先至較討我哋歡心。

兩件餅睇到用料十足，做得大大件，每件都只喺廿零蚊，味道又做得唔錯，確喺抵食。

個人評分
味道：8/10
環境：7/10
服務：7/10
抵食：8/10
平均每人消費：HK$27

餐廳資料：
英王麵包店 A1-Bakery
美孚港鐵美孚站MEF 116號舖
2370 1738