「堤諾」喺台灣過江龍，所以，晌環境、餐牌都搵到佢喺屬寶島嘅痕跡，例如牆上一啲台灣海報，餐牌會用義大利、拿鐵、綜合、奶油……等等台式用字。而環境簡約，裝修偏向咖啡室佈局，牆上掛上唔少意式食物嘅相片及煮食用具，就當晚所見，侍應都喺清一色年輕有活力嘅少女。
主餐牌印成薄餅托板之上，蠻有心思，底面兩版就有齊所有食物及飲品，包括：比薩、甜在星（可視為甜批）、小食、湯品、沙律、烤飯（即喺焗飯）、烤麵（我哋慣叫嘅意粉）、佛卡夏（可睇為以意大利香草包為底嘅比薩）。飲品除汽水、茶啡、沙冰外，多咗啲台式水果茶及珍珠奶茶，故此，不論食物還是飲品，都跟本土見慣見熟嗰幾間薄餅店確喺有較多分別，俾人亦多份新鮮感。
除散點，套餐自己唔少得，有經典雙人套餐（$198）、豪華雙人套餐（$248）、4人派對套餐（$398）及6人共享套餐（$598），選擇多，非常有彈性。
細佬點菜一向無意見，所以，責任落在我身，小弟費事煩，4個人就點個4人餐，因為內容都幾豐富，一個比薩、一客烤飯或烤麵、一份沙律或蔬菜、一客小食、一份堤諾拼盤及4杯飲品或湯品。
羅宋湯
老婆喜歡飲湯多過飲嘢，所以，佢要一客餐湯，雖然餐湯喺大路嘅羅宋湯，勝在足料，味道酸酸帶微辣，飲完好開胃。
珍珠奶茶
細佬、細妹同樣揀珍珠奶茶，雖然喺堂食，奶茶卻用咗外帶膠杯，加上大大杯，飲唔晒都可以拎走慢慢飲。小弟無試，佢哋話OK，少甜，珍珠好咬口。
榛果拿鐵 +$8
由於套餐只包$24或以下飲品，所以，我杯拿鐵需補差價。咖啡杯印有店家標誌，又用小木鉆板做杯墊，加件曲奇就正喇。台灣人沖調咖啡向來有一手，不過，呢杯嘢似意大利泡沫咖啡多啲，幸而本身嘅味道都夠香醇，榛子味亦好突出。
芝士薯條
小開胃4選1，揀芝士薯條一來細佬想食，主因喺貪佢易啲大家共享。初時以為就咁芝士醬淋落薯條度，原來，仲有咁少少煙肉碎，只要烤得唔油，新鮮炸起新鮮食，真喺無乜得點輸。
堤諾拼盤
寫明包括雞翅2隻、薯條及卡啦魚條4條，烤雞翼佢事前已開半，變得人人都有得食，味道甜甜酸酸，唔錯喎，而卡啦魚條即喺炸魚手指，皮脆肉滑，沾自家調嘅沙律醬，好食。
爐烤時蔬
沙律或蔬菜類我哋揀個熱食嘅爐烤時蔬，有啲似葡汁焗時蔬，蔬菜分別有珍珠筍、薯仔、南瓜、翠玉瓜及車厘茄，後加少少黑橄欖做裝飾，焗得幾香，個汁底又幾香濃。
義式海鮮總匯烤飯
4款烤飯或烤麵選擇，似乎依個海鮮烤飯最吸引，原個鐵鑊上枱，有少少西班牙海鮮飯嘅影子，我可以確定喺原個鑊入爐焗，因為個鑊邊好辣手，怪不得以矽膠墊包住鑊柄。海鮮非常足料，有青口、魷魚及鮮蝦，仲有雞脾菇片，飯粒乾爽，更混入唔少九層塔、洋蔥粒、蕃茄粒提味，實在不俗。
義式果香燻雞比薩
堤諾嘅比薩分兩大系：拿坡里比薩（9吋直徑，厚身型）及羅馬比薩（12吋直徑，薄脆型），而4人餐所包嘅喺後者，同樣有4款選擇，較啱大家食嘅就喺依個果香燻雞口味，何謂果香？其實睇英文一望就知，就喺加入菠蘿。個比薩我哋大家一致都覺得有驚喜，除了批底好脆口外，芝士好軟綿香濃，燻雞嫩滑有陣陣煙燻香，而菠蘿嘅清甜平衡番晒啲濃味，所以，食落唔會好油膩，再者，批面灑下大量杏仁片，增加個咬口感，的確更好食，好值得一試嘅比薩。
甜品方面正正做緊推廣，惠顧滿$200，只需$38即可享用2款特色甜品：法式焦糖燉蛋配冰淇淋、阿芙佳朵（Affogato）或珍珠奶茶奶凍配冰淇淋，即喺平均$19一客，認真抵到爛。因為每日限量供應，所以，落單時先預留，等食完正餐先後上。
法式焦糖燉蛋配冰淇淋
個雪糕球喺雲呢嗱口味，無咩特別，但杯法式焦糖燉蛋做得有水準，焦糖又薄又脆，燉蛋都幾夠滑，富蛋香。
珍珠奶茶奶凍配冰淇淋
仲以為奶凍內有珍珠，原來唔喺，而喺奶茶味嘅意式奶凍，再加入珍珠，不過，食嘅時候較難放埋一齊食，都喺食咗大部份珍珠，之後才食奶凍，奶凍嘅茶味頗突出，質感滑得嚟較挺身，可以做番軟身啲就更好。
今次貪新鮮試嘅過江龍台灣比薩店整體水準唔錯，部份菜式有驚喜，我哋都食得樂在其中，而且，定價合理，喺絕對值得翻兜。再上官網八啩吓，晌台灣當地已有唔少分店，亦擴展至亞洲唔少地區，相信繼續努力，版圖可以擴展得更大。
個人評分
味道：8/10
環境：8/10
服務：8/10
抵食：8/10
平均每人消費：HK$120
味道：8/10
環境：8/10
服務：8/10
抵食：8/10
平均每人消費：HK$120
餐廳資料：
堤諾比薩 Tino's Pizza Cafe A Handmade Italian Feast
深水埗欽州街94號黃金中心地下7-10號舖
2729 9818
堤諾比薩 Tino's Pizza Cafe A Handmade Italian Feast
深水埗欽州街94號黃金中心地下7-10號舖
2729 9818
沒有留言:
發佈留言