山區裡的走走趯趯: The Americano：美式．美色誘惑

2016年8月20日星期六

The Americano：美式．美色誘惑

香港依家仲有好多工廠區，荔枝角算喺其中一個較大規模嘅工廠區，想當年，小弟都晌依區做過唔少暑期工架。眾所周知，依家嚟工廠區，已經成為搵好嘢食嘅地方。最近，所認識嘅餐廳店主晌億利工業中心開咗間姊妹店，同樣賣美式美食，所以，趁周六走過嚟捧捧場，支持吓。

廠廈嘅租金相對旺區、地鋪平一大截，所以，一走進餐廳嘅感覺就喺地方寬敞、環境闊落，加上樓底高，予人空間感十足。餐廳帶點美國風嘅裝潢，一室以木系為主，再拼一邊白色仿磚牆，配以別緻嘅掛燈，整體感覺柔和自然。對比起佢天后舊店，真喺天淵之別，不過，晌廠度搞飲食都唔喺必贏，都要考慮有無足夠人流。

食物選擇方面，定位為姊妹店，故既有舊店嘅招牌漢堡，又有多種特色大盤，此外，從新店名字嘅推敲，咖啡亦可能會喺店中嘅主打。概括而言，店中食物嘅選擇有好多，前菜、小食、沙律、餐湯、特別推介、漢堡、意粉、飯類、甜品、奶昔……等等。

傳統美式豐富早餐 $108

其實依家周圍都食到全日早餐，普遍到差唔多逢喺咖啡室都有賣，而且，要做亦唔難，好壞分野好多時取決於用料。眼前嘅全日早餐，觀測所見，大烤菇取代一般雜菌，煙肉大片而極少脂肪，豬肉腸都唔似普通貨色，入口皮脆多汁，真喺用料不賴，仲有其他細節位，如多士都喺搽足牛油先烘，所以，咬落香脆之餘，甚富牛油香味；至於睇唔出、又未切食到分別嘅，就仲有店員所講沙律菜採用有機貨色，雞蛋嚟自美國，但如果雞蛋可以俾啲客選太陽蛋或炒滑蛋就更好喇。

德州燒烤漢堡 $108

漢堡喺佢哋嘅招牌，當然要再試吓，睇睇同天后店有無分別，德州燒烤漢堡更喺當中嘅店家嘅重點推介，而每份漢堡已配有薯條同酸瓜。佢哋啲漢堡超巨型，中間嚿牛肉真喺足成吋厚，橫切開，拿上手一比，清晰可見。店員話佢哋依足傳統製作，以生菜墊底，加入車打芝士、脆煙肉、炸洋蔥圈，配上自家秘製墨西哥青椒燒烤醬，襯上鬆軟嘅麵包，所以，入口真喺好有層次，味道豐富，尤其件漢堡扒，既濃肉香，又富肉汁，不過，要挑剔就肯定喺製作時未夠嚴謹，啲餡料東歪西扯。