Express Bar by Lassana：美味速遞

認識Express Bar by Lassana始於3年前參加過佢哋所搞嘅咖啡拉花班，唔單只教你基本拉花技巧，更講述唔少咖啡嘅知識，非常有趣。不過，間鋪位置對小弟嚟講好吊腳，而且，開放時間都淨喺針對寫字樓客，6:00pm就收鋪，星期六、日又休息，所以，都未曾正式幫襯過。依家卒之開到過嚟金鐘，雖然都喺開星期一至五，但可以過嚟食餐晏。

雖然叫開晌金鐘，但位處中信大廈，點都唔及金鐘廊、太古廣場咁人流密集，不過，食晏時間都有唔少寫字樓客幫襯。環境方面，一連幾個鋪位仲有原味家作、Subway，所以，用餐區就較為小型美食廣場格局，但枱櫈嘅編排就頗闊落。

收銀旁嘅一個小型餐牌，就大致講晒午餐嘅各種選項，可以淨食沙律，單買意粉，當然，Set Meal屬划算之選，任何一款主菜 + 兩款沙律 + 餐飲，只賣$68，以金鐘區食晏而言屬一般中下消費。

觀察所得，主菜類前前後後有4種選擇：燒豬肋骨、白菌忌廉汁蝴蝶粉、燴牛尾及特色三文治，而沙律類則有凱撒沙律、栗米火腿螺絲粉沙律、紅菜頭、希臘沙律……等等，基本上，店員話每日會有5款選擇。

飲品雖然設定咗美式咖啡或各款熱茶，但仍可以以半價優惠轉換其他飲品。

凱撒沙律、栗米火腿螺絲粉沙律

幾款沙律都好啱口味，不過，就揀咗爽脆嘅凱撒同較飽肚嘅螺絲粉。前者醬汁撈得均勻，啲羅馬生菜好爽口；而螺絲粉沙律不過不失，總之揀番紅菜頭，更有益健康嘛！

燉煮牛尾

一大盒燴牛尾大概有5嚿左右，個汁底做得幾香濃，微微酸幾醒胃；然而，牛尾炆得未夠透，所以，咬落軟腍卻有啲黐骨。個人建議，因為啲汁幾好味，如果加送一、兩年法包用嚟沾啲汁食，唔單止唔使嘥啲汁，俾客人覺得更貼心。

鮮奶咖啡 +$16

雖然美式咖啡都OK，但個人偏好都喺晌鮮奶咖啡度，不過，杯咖啡無論外觀定口感，似意大利泡沫咖啡多過鮮奶咖啡，還好嘅喺咖啡嘅香味幾醇和。後尾諗諗吓，杯咖啡唔知會唔會拎錯其他客嘅俾我，你知啦，依啲商業區食晏好似打仗咁，但喺，既來之，則安之，喺小弟一向處事嘅心態。

做人嘅嘢，好多事都急唔嚟，越急越亂嘛，不過，晌依類商業區搵食，人人都想快。有時都會反思，辛苦搵嚟志在食，食都急急腳又何苦，就算一份沙律，一個主菜，好味嘅話又何妨慢慢細嚐！

個人評分
味道：6/10
環境：6/10
服務：7/10
抵食：7/10
平均每人消費：HK$84

餐廳資料：
Express Bar by Lassana
金鐘添美道1號中信大廈2樓205號舖
3426 4556