山區裡的走走趯趯: Rojo：小食多滋味

2016年8月17日星期三

Rojo：小食多滋味

西班牙菜晌香港唔算好大熱，但保持住一定人氣，始終，西班牙菜本身都頗有特色，尤其佢哋嘅西班牙小食（Tapas），可以講喺好多人認識西班牙菜嘅入門。最近晌雜誌睇到西班牙餐廳Rojo新推出個龍蝦西班牙海鮮飯非常吸引，今晚就同幾個月無見嘅朋友嚟到天后會一會佢。

曾經嚟過一次都未知店名點讀，所以今次專登問問店員，原來喺西班牙文，有紅色之意，所以門面店名以紅色為記，發音有啲難，但跟「鑊撈」好似音，哈哈。

踏入餐廳，右邊喺吧位，左邊喺用餐區，再入啲原來仲有一直排位，但見好多客就免太打擾走入去影相。貫徹門面，入到店內都同樣咁型格，以黑白灰為主色調，裝修簡約，卻帶點粗獷味，尤其吧位下嘅牆身，凹凸石牆，更顯出原始味道。

餐牌以小型報告板形式夾住啲菜單，其實分為幾組，第一組喺「歡樂時光」，多款酒精類飲品賣$38/$40，但只限星期一至四，5:30－7:30pm，比一般酒吧嘅歡樂時光稍短。

第二組五顏六色嘅喺飲品餐牌，分別包括紅白酒、西班牙生果酒、烈酒、啤酒、雞尾酒……等等。

唔飲得酒嘅都無問題喎，有啲無酒精嘅雞尾酒，以及汽水、果汁、啡茶……等等。

至於第三組餐牌，就一定喺講食架啦，第一版喺廚師推介，有西班牙小食，有新出嘅大盤；第二牌喺一共有成20款西班牙小食；最後一版就仲有湯、主菜、甜品……等等。整體嚟講，無論飲定食，都不愁選擇。

Apple Martini $68

本來都無打算飲雞尾酒，但經店長推介，而佢哋嘅雞尾酒為迎合少少華人，晌酒嘅份量有所調查，所以，依一杯佢推介嘅Apple Martini（Vodka、Apple Liquer、Lime Juice）真喺好易入口，有點青蘋果味，帶微微酸，插上幾片青蘋果片，感覺都清爽啲。

Cosmopolitan $68

朋友喺小紅莓粉絲，佢真喺眼利，一眼就睇Cosmopolitan（Vodka、Triple sec、Lime Juice、Cranberry Juice）依一款雞尾酒，色帶淡紅，小弟就無試，但友人話唔錯，酸咪咪，好有莓香。

Strawberry Daiquiri $68

最無諗過嘅賣相就喺依一杯Strawberry Daiquiri（White Rum、Lime Juice、Strawberry），因為似沙冰多過一杯雞尾酒，都喺怪自己見識少，加埋粒士多啤梨玫瑰花，真喺賣相搶晒分。友人講到杯雞尾酒，入口較冰涼透心，酒精度唔高，充滿士多啤梨香味，好啱女生飲。

既然嚟到西班牙餐廳，西班牙式小食點都喺主打菜，此外，西班牙海鮮飯亦喺唔少得嘅心水選擇，更上佢哋有個龍蝦版，就更加吸引。

Truffle Bikini $78
之前曾經晌一間西班牙小店遇過依一款菜式，因為個名夠特別，所以印象猶深。何謂「比堅利」？其實喺西班牙一種小巧嘅三文治，借題發揮叫做「比堅利」。以黑松露醬、芝士、風乾火腿配上薄身少少嘅麥多士，輕壓烤烘，要趁熱食，否則多士面就變得唔脆，入口的確有時焦脆感，鹹香惹味，黑松露香氣突出，做得好食。

Octopus Tartare $88

底層喺薯仔粒，中層厚厚嘅一層牛油果蓉，而面層喺薄切嘅八爪魚，做成塔型，再伴一點蕃茄莎莎，賣相份外搶眼悅目。八爪魚醃得油潤，煙韌爽口，夾埋牛油果蓉同薯仔粒食，令口感富層次。

Bun Fun (Pork Belly) $88

另一道要快快手食嘅喺依一道「繽紛」，皆因以蒸包嚟配豬腩肉，一攤涼個包身軟熟度就肯定大打折扣啦。豬腩肉醃得入味，煎得焦香，歡迎輕盈少少可以夾啲翡翠苗，否則好似小弟咁，齋夾腩肉，再塗啲墨西哥醬（以為沙嗲醬之類，後尾問番原來喺一種叫墨西哥醬嘅醬料），較濃香惹味，腩肉厚薄啱啱好，入口又唔覺好肥，意外地咁正喎。