源記甜品專家 Yuen Kee Dessert：不解之源

老婆對源記有份不解之緣，佢話後生嘅時候食過源記嘅桑寄生蓮子蛋茶，對其味道一直念念不忘，今日就趁住去薄扶林掃墓，就專登少少由堅尼地城坐港鐵過嚟西營盤嘅源記，當喺食番個甜蜜蜜糖水下午茶。

嚟到門面，老婆都差啲唔認得，因為對比以前，佢話新簇咗好多，入到鋪內，更喺光猛潔淨，完全無老店嘅感覺，但格局都仲喺老派嗰款，細圓枱，小卡位，餐廳尾就喺開放式廚房。

餐牌就晌枱上嘅玻璃之下，咪睇橫排一列糖水好似好多款式，嚟嚟去去都只喺桑寄生、合桃露、杏仁露3款主打（$31-37），另外加埋芝麻糊、紅豆沙及綠豆沙（$23-35），不外乎淨食，加蓮子、雞蛋嘅配搭，比一般中式糖水鋪定價亦唔平得去邊。

桑寄生蓮子蛋茶 $35

唯一仲保存咗較濃烈嘅懷舊味道相信就喺隻萬壽無疆碗加埋墊底隻不銹鋼「穿窿」碟，原來加隻碟大有原因，就喺唔使直接攞起隻碗，唔怕辣親手。睇番吓以前間鋪喺點樣，無意間發覺舊年嘅3月都仲喺賣$31，一年間加咗$4，幾蚊雞唔算多，但計比例就已經喺十幾個巴仙，唔知喺咪執執個門面就加番個成本落去。

桑寄生色澤黝黑沉實，卻喺黑而不濁，飲落好清香嘅桑寄生味，唔會得層死甜；而去芯蓮子入口鬆化，無苦味，份量十足；至於隻雞蛋，咬開一睇浸到入晒色，絕對唔喺就咁烚完加隻蛋咁簡單，所以，整體算喺交足貨。不過，老婆嘅評價話喺水準不復當年，桑寄生嘅味道無以前咁香濃，雞蛋嘅質感亦比較實。

窩蛋杏仁露 $35

老婆要咗桑寄生，咁小弟一喺要合桃露，一喺要杏仁露，愛貪得意，未試個加窩蛋，店員仲特別提醒喺生蛋嚟，放心啦，中學階段窩蛋牛肉飯喺我嘅心水飯，平靚正，快上快落，食完可以「咋咋淋」去打波，窩蛋一詞絕對知喺咩事。佢咁講，相信有啲盲炳應該唔知窩蛋喺乜亂咁叫。

擔心合桃露溝蛋個色好古怪，所以，最後要咗窩蛋杏仁露，純白嘅杏仁露中就放有一隻生雞蛋，攪勻之後，成碗似喺燉蛋咁款。味道會喺點呢？講真，同食杏仁露又好似無咩分別，杏仁嘅香味仍然晌度，但又唔見好有蛋香，口感都仲喺有啲稀，無預期咁特別。

雞蛋糕 $8

晌枱面印有一張專訪，標題「清香雞蛋糕名人至愛」，不過，講到失望就要數到件雞蛋糕。

首先，件雞蛋糕好乾，乾到好似擺咗幾日嗰種乾，篤落去時無回彈力，口感絕對唔鬆軟；入口真喺唔太知何來清香，完全無雞蛋味，我同老婆都喺咁覺得。好明顯小弟做唔成名人囉，件雞蛋糕真喺唔太識欣賞，或許喺以前嘅人懷舊嘅口味就喺咁。

老婆卒之一解千愁，隔咗咁多件過嚟了咗件心事；源記，相信對小弟而言，應該只有此次一面之「源」，因為，我覺得我老婆煲嘅桑寄生真喺好過佢喎！

個人評分
味道：6/10
環境：7/10
服務：7/10
抵食：6/10
平均每人消費：HK$39

餐廳資料：
源記甜品專家 Yuen Kee Dessert
西環西營盤正街32號地下
2548 8687