Cafe Charm's：滋味Charm得透

上個月賀細佬生日嚟到西九龍中心嘅必勝客食飯，順道晌度打個轉，偶然發現Cafe Charm's嘅易拉架，之前已晌紅磡試過，知其水準高，所以，擇日過嚟食餐晚飯兼再嚐其美味窩夫。

由於店舖位處蘋果商場之內，位置頗隱蔽，實屬蚊型鋪，全店眼見應該得廿個座位，但又真喺估唔到，環境又幾骨子，天花、牆上、窗邊有唔少擺設。雖然先天不足，但有質素嘅就自然吸引到客人。

尤其近窗一邊，全落地大玻璃，雖然喺夜晚，隱約望到深水埗舊唐樓景，依啲樓拆吓拆吓就買少見少。或許唔可以叫咩靚景，但喺反映歷史變遷。

啲本土特有「夜景」，唔知多少年之後就會消失！？

眼見佢哋廚房細細，但細閱一轉餐牌，發覺食物嘅選擇唔輸蝕得過紅磡店。類別包括小吃及沙律、意粉及麵包、自家製和牛漢堡、全日早餐、窩夫及甜品、各款飲品……等等。

此外，晚上提供二人或四人套餐，平均為起百零蚊一個人。問過店員，菜式都喺跟番足散點嘅份量，所以，好夠食。唯一非常態喺套餐唔包飲品，但亦可以用半價優惠點任何嘢食。

二人套餐

四人套餐

仲有是日嘅廚師推介，店員話喺近期嘅新出品，味道唔錯，試完不妨俾啲意見咁話。

意式香煎三文魚配香滑薯蓉 $138

賣相偏向精簡，但就算晌依個「迷你」廚房做出嚟都唔會被人覺得迤。三文魚煎得非常香噴噴，外皮帶脆，魚肉油潤甘香，肉質還挺柔軟；而薯蓉非常幼滑，只喺略嫌有少少鹹，配上嫩綠、食落無渣嘅露筍仔，整體感覺着實唔錯。

紐約班尼迪克蛋 $98

一客有兩件班尼迪克蛋，可選配煙三文魚或煙肉，並加上伴菜及沙律。件班尼迪克蛋做得唔錯，極有流心效果，篤開蛋黃，拌點荷蘭汁，夾雜煙三文魚、煙肉、英式鬆餅一口過放入口，口感複雜有層次。

烤榛子朱古力 $39

點咗客香煎三文魚，可以跟飲品半價，所以，實際杯嘢唔使$39。本來照例喺鮮奶咖啡，啱啱遇著壞機，改改試吓烤榛子朱古力，驚喜位咪喺連朱古力都拉隻熊仔俾我，離開時晌外邊望入廚房位，見佢原來用VanHouten唂咕粉，唔喺普通朱古力粉，怪唔之得個味咁香濃，又滲出榛子香，混入奶泡口感又滑溜好多。

迷人果茶 $42（熱） / $46（凍）

上次試過熱，今次要凍嘅，其實一壺可以分到3杯左右，而啲杯同上次喺紅磡店見嘅一樣靚，純白加襯凹凸暗花，精緻典雅。至於啲果茶，茶味感覺上比熱飲嚟得濃啲，內裡加入跌料嘅生果粒，所以，茶香中滲出幽幽嘅多元果香，不愧喺推介飲品。

迷人意式奶凍配雪糕 $48

似乎店主都好鍾意「迷人」兩個字，而雪糕口味有以下幾款：綠茶、朱古力、曲奇忌廉、士多啤梨及香蕉，知道佢哋喺用上Movenpick品牌，我哋就試試綠茶雪糕配意式奶凍喺點！以斜口玻璃杯盛載，感覺已不沉悶，原來，除有雪糕外，仲有混入紅豆、奧利奧餅碎及杏仁片，令賣相睇落更靚、更豐富。奶凍做得挺身柔滑，充滿奶香，而綠茶雪糕好香綠茶味，帶微微甘苦，一羹過奶凍、雪糕、紅豆、餅碎、杏仁片，口感超一過癮！

奧利奧與布朗尼迷人窩夫 $86

是晚目的所在，就喺品嚐其窩夫，上次紅磡店食過焦糖香蕉雪糕窩夫，已經覺得好掂。窩夫共有6款選擇，今次試試另一款：奧利奧與布朗尼迷人窩夫，睇睇有無失準先。

一大底水滴形窩夫，配上碎朱古力雪糕及曲奇忌廉雪糕，唧上鮮打嘅忌廉，成為我哋最後嘅甜品山。窩夫落刀嗰下下已感受到有幾鬆脆，入口的確食得出外脆內綿，又富濃濃蛋香，依然出色；夾雜奧利奧朱古力餅及布朗尼，令口感升級，再者，布朗尼裁成細細粒，卻仍帶濃朱古力香，又內含合桃碎，實在回味。

社會、政治、人生……好多嘢小弟都唔識點去參透，不過，飲飲食食多年，對食物有一定嘅參透力，晌Cafe Charm's的確能參透出食物嘅滋味！

個人評分
味道：8/10
環境：7/10
服務：7/10
抵食：8/10
平均每人消費：HK$160

餐廳資料：
Cafe Charm's
深水埗欽州街37號西九龍中心7樓蘋果商場7002-7003號舖
3480 5383