整個環境非常之大，並分開幾個部份，除基本嘅大廳堂座之外，如想同壽司師傅交流，坐晌壽司吧就最好不過，無論刺身定壽司，都由師傅手中第一時間直送到你面前，更可睇到有咩靚貨先落單！
假如你本想食吓小食，飲飲酒，酒吧位應喺你不二之選，因為餐廳入咗唔少罕有酒款，其實酒嘅嘢小弟唔熟，不過，同學仔喺好此道之人，佢望兩眼都見到有唔少好嘢。
此外，如天氣合宜，有幾排位設晌露台邊，打開晒啲趟門，雖然只喺都市樓景，但勝在感覺開揚，對住排排舊樓，又別有一番風情。
翻翻餐牌就會發覺食物嘅種類選擇真喺唔少，由前菜、沙律、刺身、壽司、卷物、魚生他他、炸物、湯品、煮物、其他熱盤、丼及甜品。而餐牌全英，侍應亦喺外藉人士，定價亦唔便宜，就知明顯對象都喺啲外藉或高銷費群。侍應介紹佢哋個餐牌時，強調好多食材都喺即日由日本嚟嘅新鮮飛機貨，當日賣唔晒就用作第二日午市，所以，午市用料都一樣唔差，卻喺平一截！
此外，仲有啲唔同價錢嘅二人套餐（$580, $880, $1,280兩位用），甚至乎大廚發辦套餐（Omakase by Sushi Bar, $880位）都有。
Momotaro Pineapple Chu $88
本來同學仔都無打算飲酒，不過，店長話依個系列喺自家泡浸，頗有風味，所以，同學仔就小酌一杯。除咗菠蘿味，仲有另一款奇異果味。佢話杯酒就覺得無飲開嘅日本燒酒咁嗆喉，可能喺加咗菠蘿釀製關係，但只有淡淡菠蘿味，唔算太突出，好在飲落唔似加香精啲味咁假，帶淡淡天然果甜香，整體飲落喺幾舒服。雖話喺燒酒，但加埋冰飲，飲完都唔覺有醉意，唔太飲得嘅朋友都應該飲得到。
先嚟啲小食熱吓身，見7款炸物中，以個鱈場蟹腐皮袋性價比似乎最高，而店員推介我哋試試個炸芝麻豆腐。
Fried Sesame Tofu $38
炸芝麻豆腐做得小巧，以位上，賣相做得一絲不苟，好精緻，入口頗嫩滑，帶芝麻香，原來啲豆腐都喺自家製，配上蘿蔔蓉、甘筍蓉及蔥粒，清爽中和番個油膩感，其實，炸功了得，豆腐本身入口都唔覺膩，自家製嘅醬汁亦唔會太濃而搶味。
Snow Crab Tofu Curd Pocket $58 / 2pcs
外形有啲似賀年盆嘅福袋，又或潮菜嘅石榴雞，外層喺腐皮，炸得金黃香脆；內面包住鱈場蟹肉、菇粒、洋葱粒，簡單少少醬油提味，已極之好食，更難得蟹肉放唔少添。
Momo Tomato Snow Crab Salad $138
又喺鱈場蟹，仲要多到呢，拆晒肉圍住伴晌啲日本蕃茄邊，放朶小菊花做裝飾，美極！由於味醂醋汁晌碟底，所以，建議出就咁嚐嚐蟹魚及蕃茄，咁先感受到啲蟹有幾鮮，蕃茄有幾甜；之後至跟底下嘅醬汁撈勻，咁就食出另一番風味，感覺更清爽開胃。
他他喺西方做菜嘅一種形式，店家有一種菜式叫刺身他他（Tartare with Caviar），共有3款選擇：三文、甜蝦及吞拿，定價$148-$198，如果就咁刺身刴蓉收你咁貴梗喺唔值啦，但裡面仲加有唔少貴價食材，如魚子醬、松露、喺咪又唔同講法呢！
Amaebi Tartare $178
睇菜名下面所列嘅成份，你都大概估到喺乜，不過，日本人做菜就一向精緻度勝人一籌，以甜蝦做成他他，混入松露，再放點魚子醬、食用花，寧舍好睇。蝦肉確喺好鮮，可惜蝦味被松露搶晒，魚子醬嘅鹹鮮亦徒有矜貴，再者，甜蝦做他他始終覺得喪失咗佢應有嘅爽彈口感，整體感覺喺金雕玉砌嘅出品而已。
意大利菜有一種好出名嘅開胃菜式Carpaccio，通常喺薄切生牛肉片居多，但曾晌銅鑼灣嘅Babbo Trattoria食過一道西西里式薄片八爪魚，做得出色。晌Momotaro亦有以唔同魚類所做嘅薄片生魚片，包括大比目、油甘、金目鯛、紅鯛幾款，索價都要$158-$238。
Yellowtail Carpaccio $178
賣相無咩花巧，油甘薄切後，加上青辣椒、芫荽葉，淋上日式橙味醬油便成。油甘用料確喺好新鮮，青辣椒無預期咁辣，反而啲醬油帶點橙味就幾得意。概括而言，可以話喺唔錯，但始終跟食刺身有啲似，並未帶嚟太大驚喜。
Oysters with Sea Urchin & Caviar $168
單睇菜名已感受到喺幾奢華嘅一道菜，生蠔取自北海道貨色，貪其碩大鮮甜，又有海水味，食落滑溜蠔味足，最貼心喺去埋柱位，一拮起就可以成隻放入口，何其爽呀！加上落海膽一啲無手緊，配上魚子醬嘅提鮮，鮮味一層又一層，多變而有層次，貴得有道理。
食咗幾樣凍嘢，搵道熱食緩衝吓，熱食有10多款，例如：豬腩、烤三文、鱈魚、和牛……等等，我哋揀咗一款清酒煮日本黑蜆。
Asari Little Neck Black Clams $138
以日本清酒煮黑蜆，並配上多種菇菌及蔥花，個湯底加咗牛油，所以，頗為香滑，卻散發淡淡清酒香，至於黑蜆唔算好大隻，但蜆肉肥厚鮮甜，果然用手揀手。
Sea Urchin & Foie Gras Rice $258
又喺另一奢華陣容嘅丼飯，不過，上枱時的話很香。小弟較喜歡篤穿隻溫泉蛋，讓蛋黃汁跟飯撈勻食，一啖飯一啖海膽，何其鮮味！又一啖飯一啖鵝肝，同樣何其甘香，再者，鵝肝煎得面層焦脆，實在美味。
Earl Grey Crème Brulee $88
甜品一環，店家都無馬虎，一道伯爵茶法式焦糖燉蛋做得相當有水準，伯爵茶味芳香，卻跟燉蛋平衡，質感亦唔會過於虛浮而削身，挺身而唔會太實淨，個人而言，只喺略嫌個焦糖面做得厚身咗啲！
Green Tea Layered Mousse Cake, White Chocolate and Almond Crust, Black Sesame Tuile $88
原以為會喺外層抹茶慕絲拼上白朱古力杏仁脆餅心，不過，嚟到喺跟一般嘅抹茶慕絲蛋糕差唔多，伴上紅豆及雲呢雪糕。然而，賣相幾亮麗，抹茶慕絲蛋糕嘅茶味頗濃郁，入口非常柔滑，啲紅色亦好清甜，伴雪糕食就最好不過。
從餐牌嘅名字及品嚐過後，就會發配將唔少日本菜式再融和其他烹調方式，做出具和風嘅特色菜，而且賣相極具視覺效果，如果唔介意多花少少錢，或遇上值得慶祝嘅特別日子，不妨會一會桃太郎先生。
個人評分
味道：8/10
環境：8/10
服務：8/10
抵食：7/10
平均每人消費：HK$800
環境：8/10
服務：8/10
抵食：7/10
平均每人消費：HK$800
餐廳資料：
Momotaro
中環威靈頓街198號地下
2865 0005
中環威靈頓街198號地下
2865 0005
沒有留言:
發佈留言