中環店真喺好耐無嚟過，附近寫字樓多，下面又喺機鐵站，所以，印象上經常見佢塞滿客，午市就更加唔使講啦，就算晚市，門口一樣擠滿人等位。始終位處IFC，室內環境自然唔失禮，裝修雅致，服務亦都好到位，侍應都禮貌周周，就算枱上備有壺茶，佢哋都不時主動為你斟茶添水。題外話，茶位收番$6個，另加一服務費。
餐紙墊上仲有介紹雲吞麵嘅故事，有好多歷史嘢，其實都幾有趣味，唔喺單單一張餐紙墊啊！
今期講到明嘆一盅兩件，焦點就放晌點心一頁。不過，之前都知佢啲酥炸鯪魚球正，所以，依個又喺好想試嘅食物之一。
酥炸蜆蚧鯪魚球 $68
人少少就當然叫份細啦（6粒），粒粒好似乒乓波大細，炸得均勻，以個「雀巢」盛住，擺樣都寧舍多份心思。鯪魚球一定要趁熱食，熱辣辣放入口，外脆內軟，再咬落去好彈牙，睇到打得好細緻，而鯪魚味突出，慢慢滲出果皮香味，沾一點蜆蚧，更鹹鮮惹味。
晶瑩鮮蝦餃 $40
尺寸比較細粒，但做得晶瑩，透出蝦肉色，可見餃皮做得有幾薄。食落的確有水準，啖啖蝦肉，鮮味十足，而且，蝦肉爽口，餃皮又唔黏牙。
翡翠菜苗餃 $35
因為加入菜苗，色澤帶碧綠，賣相更好睇。餃內除菜苗，亦混有蝦肉，所以，味道唔會太寡、太單一，有啲蝦多菜苗少，有啲則菜苗多蝦少，小弟較鍾意後者，否則食蝦餃都得啦。此外，亦鍾意佢唔會將菜苗刴到太蓉，欠缺口感，依家就啱啱好，清爽有菜味，又有蝦嘅鮮甜味。
黃金流沙包 $38
叉燒餐包、叉燒包以外，最心水嘅包類應該包括埋流沙包，同樣，又喺要趁熬熱辣辣食，否則流心效果大打折扣。包身好軟熟，內裡嘅鹹蛋黃流沙非常有蛋香。（題外話，餐牌中個英文譯名我就唔評論，反正小弟英文都喺半桶水，不過，除非包內嘅流沙多到食飽你，否則，應該都喺叫流沙「包」啱啲。）
紅豆桂花糕 $30
紅豆糕食過，桂花糕亦都食過，兩者夾埋就未食過，其實會喺點？大概都預計到，只喺貪得意都叫一客嚟試試。個樣似紅豆糕，但就滲雜咗桂花晌入面，整體個味道又唔錯，紅豆好清甜，桂花好清香，個糕嘅質感帶少少爽，確喺幾好食。
食嘢就喺咁，好食嘅就懶理鬼得佢日頭定夜晚食，「夜媽媽」都可以食個早餐啦。希望社會唔使再有咁多糾纏，政通人和，國泰民安就好咯！
個人評分
味道：8/10
環境：8/10
服務：8/10
抵食：6/10
平均每人消費：HK$120
味道：8/10
環境：8/10
服務：8/10
抵食：6/10
平均每人消費：HK$120
餐廳資料：
正斗粥麵專家 Tasty Congee & Noodle Wantun Shop
中環港景街1號國際金融中心3樓3016-3018號舖
中環港景街1號國際金融中心3樓3016-3018號舖
2295 0101
沒有留言:
發佈留言