講開百特文治都唔喺第一次幫襯，大部份人嘅心目中，都知佢主打喺賣形形式式嘅三文治，不過，依家嘅百特文治豈止三文治咁單一，產品變得多元化，有湯、有生果杯、沙律、乳酪、甜品……等等。而且，定期又有新產品推出，不斷推陳出新。
今次嘅換領券就喺新出嘅沙律超級杯，其實，唔喺太明點解唔叫「超級碗」？因為一來個外型一望就喺成個碗咁款，二來佢個英文名都用上Super Bowl啦，順理成章用超級碗都好自然！再者，佢哋又真喺有另一款營養杯，猶如迷你版嘅沙律超級杯，嗰款叫杯就貼切啲。
蘇格蘭三文魚藜麥沙律超級杯 $65
是日嚟到，見有3款沙律超級杯：芝麻雞麵（$58）、韓式豬肉麵（$58）及蘇格蘭三文魚藜麥（$65）。咁講求有營養、有特色，就梗喺揀最後者「蘇格蘭三文魚藜麥沙律超級杯」啦，最夠「營營色色」！點解咁講，成份有三文魚、菠菜、藜麥、毛豆、青豆、青瓜及一啲什錦籽仁，如南瓜籽、松子仁，全部都屬於有營健康嘅材料。
每碗沙律仲附有檸角及法式沙律汁，將所有材料撈勻，混和醬汁，味道清新，口感多變帶有不同層次，而且，三文魚並唔喺煙三文，而喺煮熟嘅三文，厚身又大件，食落油潤，怕生嘅人都唔使驚。咪睇佢份量好似唔多咁，女生一個人食絕對夠一餐，況且，對女生而言，夏日食一道沙律當午餐，既健康，又輕怡，順便可以踢走悶熱。
有機鮮奶咖啡 $31
諗嚟諗去，都喺要杯鮮奶咖啡，原來咖啡喺有機嘅，感覺會喺更健康。咖啡嘅味道都香醇，不過，奶泡打得較粗，而且撞入啲濃縮咖啡時都稍為「求其」咗，所以，口感唔夠平均。
雖然杯咖啡對小弟而言喺欠缺咗少少，但對百特文治嘅其他出品依然有信心，期待下一次嘅新出品！
個人評分
味道：7/10
環境：7/10
服務：7/10
抵食：6/10
平均每人消費：HK$96
味道：7/10
環境：7/10
服務：7/10
抵食：6/10
平均每人消費：HK$96
餐廳資料：
Pret A Manger 百特文治
中環皇后大道中15號置地廣場3樓321號舖
2840 0129
Pret A Manger 百特文治
中環皇后大道中15號置地廣場3樓321號舖
2840 0129
沒有留言:
發佈留言