餐廳位處隱蔽商廈頂樓，對著維港景致嘅一邊全都喺落地大玻璃，可謂坐擁廣闊嘅維港景色，可惜是晚全場爆滿，咁唔好彩被安排最入嘅二人枱，可講喺乜景都無，只有遠少少隔離幾座天后樓景，未能飽覽一下璀璨維港夜景。餐廳嘅整體環境，雖然座位不多，但晌燈光配合下，加上枱上精緻嘅餐具及別緻嘅小擺設，仍不失情調。
一個法國嘅名字，真喺誤以主打法國菜，當翻開餐牌細閱，既有刺身，又有凍海鮮，此外，散叫餐點中由前菜、湯、主菜都不拘於一國，就似有一份借題發揮嘅感覺。
散叫固然隨心所慾，但晚市套餐則相對點都喺划算啲，5道菜晚餐（前菜、頭盤、湯、招牌菜、是日甜品 / 啡茶），定價非常進取，由$468-498 + 10%，所以，一對情侶嚟食番餐就已經成千銀落樓。究竟抵唔抵食，就要視乎番食物嘅質素。
香草包
兩個微暖嘅香草包，絕對以一餐高級晚餐而言唔合格，單喺賣相已頗為港式，單一嘅香草包亦令個麵包籃缺乏個性，有一種可有可無嘅感覺。還好嘅喺，小圓包入口軟熟，有微微香草味。
18個月黑毛豬風乾火腿伴哈蜜瓜
前菜嘅賣點就喺18個月熟成嘅黑毛豬風乾火腿，果然，單食一片風乾火腿，鹹香油潤；再捲起哈蜜瓜一齊放入口，化學反應自然微妙，鹹與甜互相穿插，底下嘅油醋沙律菜，頓時都只喺變得其次！
是日精選頭盤
前菜之後，仲有多一道頭盤，喺乜嘢嚟就要食到先知。個頭盤賣相非常立體、精緻，原來喺阿拉斯加蟹脚牛油果他他，入口充滿海洋味，既鹹鮮，又清爽，點綴用嘅芒果醬及黑醋，有畫龍點晴之效。
餐湯既然有兩款，自不然就各要一款，到頭來就可以兩款試晒！
鮮蟹肉龍蝦忌廉湯
兩款湯嘅顏色都近乎一樣，就連湯面畫花都一樣（既然喺以高級為賣點，畫花依啲嘢其實可以好多變，畫上唔同圖案喺一項附加增值，肯定令人感覺不一樣），只喺龍蝦忌廉湯稍稍深色少少，不過，送到枱上，因為蝦香撲鼻，所以，仍然輕易分得出兩者。湯嘅質感非常順滑，蝦味超濃鮮，吞下一口仍感覺到龍蝦鮮味晌口腔滾動，餘韻長，而且，真喺有唔少鮮蟹肉，絕對喺加分位。
薑汁南瓜忌廉湯
南瓜忌廉湯飲唔少，加入薑汁肯定喺首次。同樣，質感滑溜細緻，南瓜味非常突出，帶有少少薑味，感覺幾特別。兩款餐湯，晌味道同質感上，都可以話喺無可挑剔。
再落嚟就喺主菜登場，共有三款選擇，包括：黑毛豬、肉眼、羊架，全部都喺肉類，如果加番多一、兩款魚類或海鮮類，會唔會更貼心，以方便一啲唔食肉類嘅客人呢！
烤西班牙雪花黑毛豬配蘋果醋汁 $468（套餐價）
先慢煮，再煎烤，喺近年常見處理肉類嘅烹調手法，既保肉汁，又香脆可口。因為成品煮好晒，難以睇到「雪花」嘅分布，不過，入口嘅軟腍度，亦感受得到佢嘅質素，再者，豬肉味的確較濃郁。雖然賣相較普通，配菜亦只喺一般嘅椰菜花、西蘭花、翠玉瓜、菇菌之類，但勝在叫多樣化，配上個蘋果醋汁，酸香去膩。
烤澳洲頂級超嫩羊架配法式芥末籽忌廉汁 $498（套餐價）
羊架只有兩枝，但呎碼都屬於大條，不過，大食啲嘅男士夠唔夠就有點疑問。我哋要咗五乘，切開羊架肉，單睇色澤，嬌紅粉嫩，附合我哋嘅預期，同埋燒得一身焦香，實在吸引。入口羊羶味唔太重，應該大部份人都接受到，而且，口感軟腍，又富肉汁，蘸一點法式芥末籽忌廉汁，確喺唔錯。
以一頓高級嘅餐飲而言，平均消費$500，但較估唔到喺餐飲跟甜品要生死一決，有你無我，喺依個細節上略嫌店家未夠大方。再者，問過店員，餐飲方便，鮮奶咖啡、意式泡沫咖啡之類並無提供，只有一般咖茶、檸水。所以，上算應該就喺揀甜品。
意式奶凍配巨蜂提子醬
甜品作為一頓飯嘅尾聲，做得好可以會喺成為完美嘅作結。不過，小弟真喺對依道甜品少少失望，雖然食落奶凍挺身而柔軟，富奶香，但唔見混有雲呢嗱籽，缺少一點香味，或許喺因為打算混和巨蜂提子醬同食嘅關係。其實享用期間真喺有啲見笑，話說個甜品送到嚟，店員無講明個甜品喺乜，所以，初頭真喺以為分開食，再者，咁嘅賣相會唔會好粗疏？好港式西餐格調呢？
因為收得咁嘅價位，加上景觀、用餐環境，小弟會以稍高嘅角度去品評。食物嘅質素、用料算喺對辦，但賣相就覺得仍有提升空間。此外，雖然佢哋標榜以靚料入饌，但晌晚餐嘅鋪排及款式，法式嘅元素欠奉；而服務上，好多細節位我覺得可以再執好啲，好似上菜就未有同步，無論餐湯抑或主菜，都喺前後腳送嚟，送完個南瓜湯，隔多陣先上個龍蝦湯。今次個總結比較多言，算喺小弟對上高級餐廳嘅借題發揮。
個人評分
味道：7/10
環境：8/10
服務：7/10
抵食：6/10
平均每人消費：HK$540
味道：7/10
環境：8/10
服務：7/10
抵食：6/10
平均每人消費：HK$540
餐廳資料：
à la umai
天后電氣道108號冠貿商業大廈25樓
2234 6628
à la umai
天后電氣道108號冠貿商業大廈25樓
2234 6628
沒有留言:
發佈留言