晌入門口位嘅巨型雪梨市風景噴畫，畫有多個市內地標景點，估唔到連月神公園都畫埋，絕對會吸引你走埋去望個究竟。走入店內，先會發見一組陳列櫃，原來Bondi唔只喺講食，仲有講求一種生活態度，陳列唔少相關產品作零售。
而餐廳環境非常闊落寬敞，水泥地拼白磚牆，帶少少粗獷味，而整體屬簡約嘅咖啡室格局，加上是晚人客不多，空間感更覺十足。雖然每枱均放有蠟燭燈，浪漫就很難談得上，但柔和嘅燭光卻可以緩和一下氣氛。再加樖小植物在枱上，感覺又會唔同啲！
入門口右邊，仲有個可容納廿幾人嘅貴賓房，如無人訂，一樣可要求坐入去用餐。
晚市嘅餐牌好簡單，幾頁紙就睇晒。共享嘅散點菜式，有湯品、小食、前菜、海鮮、意粉、主菜，每個類別都有三幾款選擇，更列明無加一及開瓶費，不過，如果帶蛋糕嚟切，就要收番$50切餅費。
另外仲有一張餐牌，就喺二人用嘅晚市套餐，包一客前菜、兩客餐湯、一道意粉、一道主菜、甜品或飲品二選一，實價$528。
廚師沙律 $78
是日嘅廚師沙律喺煙鴨胸芒果沙律，啲煙鴨胸切法有別平時常見嘅橫切，而喺直切，所以鴨胸片比較長形，最鍾意喺已去咗表皮，無咁油膩，卻仍有煙鴨胸嘅燻香；不過，啲芒果咁處理就唔太欣賞，一來要個客刮起啲肉先嚟食，麻煩咗，二來刮出嚟嘅芒果肉變得細細粒，無晒口感，此外，亦唔見得咁做法好睇。如果廚師夠刀功，切成薄片，捲成花形，仲賞心悅目啲。再者，沙律菜實在放得少，啲沙律菜好似伴碟咁，所以，似頭盤多過似一道沙律！
羅勒、香茅、白酒炒鮮蜆 $68
賣得$68就無期望會有好多，一客大概10隻左右，賣相方面，睇得出廚師煮好鮮蜆後，再疊過放入碗內。羅勒配香茅，幾嶄新嘅經合，加埋白酒，味道確喺幾幽香；雖然啲蜆唔喺好大隻，肉亦無話特別厚，但勝在鮮甜又無沙。
鮮三文魚白酒汁意粉 $108
個意粉賣相就麻麻哋，一撮泡沫只喺裝飾，無實際嘅作用，意粉內混入菠菜葉、青瓜條、荼樹菇，感覺有點凌亂。用上鮮三文魚總好過用煙三文，因為一道熱呼呼嘅意粉配搭冷冰冰嘅煙三文真喺唔夾，之前就遇到過有啲餐廳喺用煙三文配意大利飯。至於個白酒汁意粉嘅味不俗，個白酒汁幾香，質感杰身度啱啱好，意粉又煮得咬口。
澳洲牛柳（6oz）配鴨肝慕絲 $248
我哋唔介意生少少，所以要五分熟，唔知點解，論賣相，其實都見佢哋花咗啲心思，硬喺覺得有啲堆砌感，無乜美感可言。澳洲牛柳採用窄身厚切，可更保肉汁，落刀嗰下，覺得有啲韌，但切出嚟肉色粉嫩，唔似煎過火，入口質感都還可以，可能跟件牛柳本身嘅質素有關。至於嗰一小件鴨肝慕絲，甘香豐腴，柔滑可口！
甜品及飲品餐牌都喺列印晌另外一張小餐牌之上，雖然甜品列有7款，但未必全部均有供應，例如，我哋想試嘅班尼士朱古力餅就無貨，最後揀咗精選蛋糕及自家製窩夫，因為前者喺濃香朱古力蛋糕，正正可以退二求其次代替番班尼士朱古力餅！
精選蛋糕 $45
「黑黑實實」就最啱形容件濃香朱古力蛋糕，全黑嘅身軀其實喺以黑朱古力蛋糕為基本，再有一層朱古力軟漿，件蛋糕嘅朱古力味非常濃郁，質感挺實而實在，有點點近似班尼士，只喺無咗合核碎啫。
自家製窩夫配朱古力香蕉 $65
等咗好耐先送到，仲以為漏單，但個窩夫真喺原全唔得，賣相又喺一貫嘅亂，一睇就知喺用現成貨嘅即唧忌廉，嚟到都已經化開晒。而窩夫只有兩嚿格件窩夫，入口好硬，一啲都唔鬆軟，事後曾反映過俾店員知，佢雖然說明啲窩夫喺即叫即做，但水準實在有好大落差。
飲品方面，有咖啡、茶、朱古力、汽水及絲慕雪（Smoothie）之選，嚟到Bondi，首推喺咖啡啦，因為唔飲得都睇得呀！
意大利泡沫咖啡 $42
友人嘅意大利泡沫咖啡，照樣幫佢拉花，因為泡沫咖啡都較少會拉花，一隻白天鵝，令人對杯咖啡嘅感覺都喺唔同啲！
焦糖鮮奶咖啡 $42
杯意大利泡沫咖啡就忘記問友人嘅意見，所以，就講講小弟所揀嘅焦糖鮮奶咖啡，個拉花就仲厲害，似孔雀開屏喇啩，靚成咁真喺唔忍心飲落去。杯鮮奶咖啡實在沖得有水準，口感均勻，入口奶泡跟咖啡好融和，醇香兼備。
Bondi個環境確喺唔錯，幾休閒舒適，夠靜局又唔嘈，不過，以廠廈區域而言，再計及食物嘅質素，個人覺得定價略高，同埋，菜式嘅賣相真喺要執一執佢。
個人評分
味道：7/10
環境：8/10
服務：6/10
抵食：6/10
平均每人消費：HK$350
味道：7/10
環境：8/10
服務：6/10
抵食：6/10
平均每人消費：HK$350
餐廳資料：
Bondi
觀塘巧明街109號榮昌工業大廈地下B鋪
2617 6800
Bondi
觀塘巧明街109號榮昌工業大廈地下B鋪
2617 6800
沒有留言:
發佈留言