上到創興廣場16/F一打開𨋢門，嘩！人山人海，仲墟撼過街市。不過，入內發覺原來大廳非常之大，餐廳佔晒全層，目測所見，估計有超過300個位以上，我哋到埗已有過半數位置被安排入坐，過多無耐就已經座無虛席，人聲鼎沸。店方安排我哋幾個坐晌卡位，更感闊落，擺滿一枱嘢都唔覺無晒位。
收費方面，喺以任飲任食經營，但唔估到咁實惠，怪不得吸引咁多後生仔。星期一至四正價時段（5:00-10:59pm），大人收$138，小童收$78，星期五、六、日、公眾假及其前夕，都只喺酌量收多$10位，絕無搶錢嘅感覺。如閣下喺夜鬼一族，貓頭鷹時段就更加超抵食（11:00pm-3:00am），大人只收$108，小童仍番收$78，星期五、六、日、公眾假及其前夕，同樣加收$10位。全部全包價，包埋加一，睇得出旨在實行薄利多銷，入座計任飲任食2小時，荃灣店及新開嘅銅鑼灣店更有小食及甜品供應，令人更感超值。
出面啲火鍋嘅任飲，選擇都唔多，有時叫佢嚟5罐就俾4罐，追完又追，晌依度就無依個問題。4個大雪櫃就擺晌你面前，成櫃獅威啤酒任攞，百事、百事青檸、七喜、美蓮達橙味、提子、青蘋果任拎，就連Jolly Sandy都有幾款味（荔枝、檸檬、奇異金果…），以及一啲韓國嘢飲，足見店方誠意。又麻辣，又雞煲，食火鍋點都會燥熱一啲，夏枯草、薏米水實屬窩心供應。淨喺講飲，都有賺呀！
見到枱面餐墊紙，寫住食雞3步曲：
1. 先食雞；
2. 放花膠、水魷魚、牛栢葉；
3. 加湯打邊爐。
原來食完雞煲，落花膠、水魷魚、牛栢葉等佢哋索晒雞汁精華，咁食就寧捨有味，之後加湯再嘆各式火鍋配料，辣香兼備，果真有意思。
2. 放花膠、水魷魚、牛栢葉；
3. 加湯打邊爐。
原來食完雞煲，落花膠、水魷魚、牛栢葉等佢哋索晒雞汁精華，咁食就寧捨有味，之後加湯再嘆各式火鍋配料，辣香兼備，果真有意思。
至尊重慶蜑家雞煲 （另加$298）
全包價包基本雞煲，2-3位半隻，4-5位一隻，6-7位一隻半，8-10位兩隻，11-15位三隻，16-19位四隻，20位以上就五隻。如果想食豪少少，大可加碼預訂一個「至尊重慶蜑家雞煲」，每煲另加$298，煲內額外加入多款海鮮，包括：原隻膏蟹、鮮蝦、花甲，而且份量十足，據介紹就連雞種亦取較大種，足兩斤六至兩斤半嘅走地雞，務求有肉食得嚟亦保持嫩滑度，所以，基本雞煲已好夠食，加埋海鮮實在可以令人食完已有半飽。
因為同枱食友唔嗜辣，所以我哋揀嚟少辣，個蜑家雞煲果然出色，雞件入口幾嫩滑，非常惹味，又富層次，唔喺一味死辣，有輕麻，有濃香，以滋味無窮嚟形容亦不為過。再跟店方交流，知道原來雞煲喺將雞件加入多種香料生煮至熟，故需候時20-25分鐘，當中有花椒、辣椒、大蒜、肉桂、洋蔥、丁香、豆寇、老薑……等等，以及唔講得嘅大廚秘製醬汁，故此能做到咁味道紛陳，不愧為「食神爭霸戰」中嘅獲獎菜式。此外，海鮮唔單料足，膏蟹爆晒膏，鮮蝦絕對唔喺蝦毛，花甲又夠晒大隻，而且味鮮！順帶一提，店內好少醬料選擇，比一般火鍋店少好多，其實，由於雞煲夠濃味，啲醬料根本都無乜需要派上場！
至尊千芪米酒雞煲
老闆唔止做事有誠意，仲事事刁鑽，唔鍾意重口味嘅朋友，不妨揀依個「千芪米酒雞煲」試試，加入咗北芪、當歸、酒糟和4種黃酒，再加上洋蔥、蘿蔔、腐竹、黑木耳等配料，滾起之後待酒精散發，嗒落湯底淡淡酒香，輕怡藥味，清香不膩，滋補養生。
食完雞煲，再落嚟就當然點配料食火鍋啦。兩張火鍋配料紙羅列晒超過60款食材，全部任點任食，無論周圍、餐墊紙定點配料紙，都時刻提醒大家：「珍惜食物，切勿浪費！」，所以希望大家都可以做到「惜飲惜食，適食適飲！」其實兩個雞煲都食得我哋六、七分飽，所以，配料都唔敢一下子點太多，寧願煩啲，分多幾次落單妥當啲。但食吓叫吓，叫吓又食吓，原來我哋都幾擦得吓喎。
花膠
跟番個食雞3步曲，花膠加落個雞煲煮煮，爽口入味，極之好食，真喺意外驚喜，何況花膠膠質豐富，營養又高，養顏滋補佳品，實在喺必點項目。
牛柏葉、鮮鵝腸
牛柏葉索晒雞煲醬汁，亦都好食，而且亦都爽口，果然3步曲加入花膠及牛栢葉都喺好策略。不過水魷魚就無叫，改試鮮鵝腸，雖然鵝腸入口都同樣爽脆，但就唔及花膠、牛柏葉入味。
美國肥牛
晌度主要食雞煲，所以牛肉唔多，獨沽一味：美國肥牛。外表睇落肥膏頗多，質素個人覺得一般。肉類仲有黑豚腩片及滑雞片，有機會下次要試試先得。
新鮮即包餃子
另一誠意表現，餃子唔用來貨，無花無假，由阿姐現場親自即包，仲要有成3款餃子供應：京蒽羊肉餃、洋蒽牛肉餃及西洋菜豬肉餃，我哋3款都試勻，一致推選西洋菜豬肉餃最好，豬肉口感好，西洋菜清爽；京蒽羊肉餃都唔錯，羊肉好味濃，夠晒羶；而洋蔥牛肉屬自創，不過當日食落唔知點解個餃皮好溶，味道亦未見特出。
午餐肉、炸枝竹
午餐肉都點？唔好問點解，情意結。炸枝竹煮腍之後，沾滿醬汁，都好食架。
淮陽凍豆腐、鯪魚滑、豬肚片、貢丸
經一晚雪過成蜂巢形嘅凍豆腐，可以講喺「湯汁海綿」，索滿湯汁嘅凍豆腐柔韌惹味，值得推介；鯪魚滑亦有水準，如果加多啲蔥就更啱小弟口味；丸類都有幾多選擇，如蟹籽丸、豬肉丸、白魚蛋、皇庭貢丸、鱈魚飽丸、鮑魚蝦丸、花枝丸、松花丸、牛根丸，可惜胃納有限，真想試勻晒佢哋。
炸魚皮
大家都將炸魚皮放入湯內灼一灼先食，哈哈，小弟都喺鍾意當佢喺脆卜卜小食。炸魚皮送Jolly Sandy，都夾喎，最緊要唔油膩又無油膉味。
菜蔬
菜蔬類、菇菌類夾埋有成十多款，雖然未必晚晚都款款有齊，但就不愁無選擇。
香甜粟米、芋頭片
本來都食得夠晒皮，但店方嘅自信捱介，就一於食飽啲頂埋佢。栗米果然超甜，不愧重本少少嘅超甜粟；芋頭片入口十分之粉糯，好重芋頭味，而且咬落唔鬆散，原來芋頭片輕炸過，認真有心思呀。
公仔麵、紅薯粉、日本烏冬
臨尾唔好嘥啲湯準，淥啲粉麵又喺食火鍋嘅情懷。家下出面好多火鍋店都已經俾出前一丁，但晌度估佢唔到公仔麵竟然喺韓國貨嚟，質感不俗，食落有韌勁，唔會「腍糍糍」，值得一試；此外，紅薯粉亦都唔好錯過，煮透嘅紅薯粉滑溜煙韌，掛上湯汁，的確好味；除非你唔喜歡前兩者，否則烏冬都只喺無選擇中嘅選擇。
雀巢雪糕
近門口有一大櫃雀巢雪糕任揀，但就唔喺任食，每人限取一杯，讓大家火鍋過後嘆杯雪糕涼快一下，所以，品牌、數量都唔喺重點，只喺店方小小心思。是晚所見，味道有芝麻、雲呢嗱、紅豆、芒果，雀巢紅豆雪糕，久遺嘅味道！
最後想講少少服務，雖然咁旺場，但上配料甩漏未算大，有漏嘅阿姐都有求必應好快補上。此外，有時侍應都會主動加湯，唯一喺收拾碗碟慢咗啲，始終人客多兼流量快，都屬情有可原。要挑剔，抽風方面確需改善一下，人哋就話唔食羊肉一身羶，我哋就食完雞煲一身臊，唔止衫褲，小弟連個背囊都一陣嘢強烈食味。
同班「死佬們」老友一年幾次飯局，都喺鍾意烚吓烚吓，仲要揀任食，因為佢哋大飲大食，散叫真喺控制唔到「成本」。好多時都喺就方便，去咗長沙灣新星，睇嚟依家又多個選擇嘞，因為至尊重慶雞煲定價親民，雞煲有其特色，火鍋料配套足，飲品又多選擇，值得幫襯。
個人評分
味道：8/10
環境：7/10
服務：8/10
抵食：10/10
平均每人消費：HK$138（試食邀請）
環境：7/10
服務：8/10
抵食：10/10
平均每人消費：HK$138（試食邀請）
餐廳資料：
至尊重慶雞煲 Supreme Restaurants
旺角彌敦道593至601號創興廣場16樓
2148 2628
至尊重慶雞煲 Supreme Restaurants
旺角彌敦道593至601號創興廣場16樓
2148 2628
沒有留言:
發佈留言