One Stop有提供3道菜晚餐，包括餐湯或凱撒沙律、主菜及甜品，飲品則要另外再點，價錢由$118-$188 + 10%，主要對象都喺中產居多，所以，依個價位其實都唔貴。就算唔叫晚餐，散叫都有好多選擇，由餐湯、前菜、小食、沙律、扒類、主菜、意粉、意大利飯……等等。
晚市套餐
主餐牌
意大利農夫包配自家製鮮蕃茄醬先嚟一籃意式農夫包，外型跟意大利香草包極相似，不過，就無香草，取而代之喺一啲穀麥籽粒，令個包添幾分咬口，然而麵包亦做得鬆軟；最驚喜喺個自家製鮮蕃茄醬，既鮮香，茄味又濃郁。
黑松露磨菇忌廉湯 $68
不嬲都對松露、磨菇之類有偏好，所以，黑松露磨菇忌廉湯就合晒口味。雖然，賣相睇得出個忌廉湯比較粗糙，但菌香撲鼻，飲落質滑，由於加咗啲黑松露醬，令個湯更加芳香馥郁。
蕃茄濃湯 $68
鮮橙紅色嘅濃湯，蕃茄味突出，酸甜開胃，質感亦比起個磨菇忌廉湯柔順。
烤芝士配香蒜法包 $88
意大利牛奶芝士（Tomino Cheese）都喺第一次品嚐，外型有啲似水牛芝士，烤烘後配鬆脆嘅香蒜法包，質感黏黏軟軟，淡淡牛乳香，輕怡得嚟幾有特色嘅前菜。
白酒忌廉法國藍青口 $138
賣點就喺用上法國藍青口，可是，小弟就覺得整碟青口嘅水準一般般啫，白酒忌廉汁較為單薄，酒香不足，而藍青口比較細隻，無乜肉地，猶幸幾鮮甜以彌補不足。
黑松露雜菌意大利飯 $138
個人好鍾意依一道意大利飯，首先飯粒煮得煙韌已先下一城，其次，飯內混和滿滿嘅雜菌，啖啖有咬口，口感豐富，再者，飯面灑滿巴馬臣芝士，以及一大撮黑松露醬，香氣四溢，濃香吸引，令整個意大利飯每啖都滋味在心頭。
最後一杯柔滑醇香嘅鮮奶咖啡作結，無甜品，都一樣滿足。
散叫一道主菜百零二百蚊，無疑點晚餐喺最佳入門之選，除環境舒適悠閒，食物又有一定質素，取價都好合理，所以去開西環，都值得順道入去一試。
個人評分
味道：7/10
環境：8/10
服務：8/10
抵食：7/10
平均每人消費：HK$0（試食活動）
味道：7/10
環境：8/10
服務：8/10
抵食：7/10
平均每人消費：HK$0（試食活動）
餐廳資料：
One Stop Ristorante & Bar
西環西營盤高街52號地下
2858 1018
沒有留言:
發佈留言