麵屋武藏喺首次光臨，入門口左邊喺半開放式廚房加吧位，可欣賞到日藉師傅淥麵嘅功架，而再入啲除牆上掛咗唔少武士畫作，加上一室黑與白，好有武士嘅剛烈味道，給人感覺份外型格。近門口有多張2 / 4人梳化卡位，梳化椅背特高，增加多少少私隱度，亦可減少食客間嘅騷擾；
半開放式廚房加吧位
拉麵、沾汁麵故然喺店方嘅主打，仲有飯、沙律、炸物、小食。雖然今次試食活動喺一試全港獨有嘅有坑紋沾汁麵，但麺屋武蔵亦有幾款小食名物，都一樣有機會試到。
麺屋武蔵嘅介紹
白虎系列
赤虎系列
黑虎系列
武藏煎餃子 $35
一客5隻煎餃，全由人手每日新鮮包製，餃皮搓得挺薄，煎得香脆，菜肉比例平衡，又富肉汁，配上餃子專用蘸汁，確喺好食！
爆炸男爵沙律 $38
沙律一共有3款選擇：大根水菜沙律（$48）、爆炸男爵沙律（$38）、豆腐三色豆沙律（$42），以中間嘅爆炸男爵沙律最具話題性。以沙律菜、青瓜絲、車厘茄為沙律底，配以油醋汁，而最大驚喜喺加入大量脆炸咗嘅北海道男爵薯仔絲，以及一隻溫泉玉子，撈勻之後，食落沙律中嘅清爽，又夾雜薯絲嘅卜卜脆，口感有層次、有趣味，味道帶微酸，卻又有一陣陣蛋黃凝香，實在好食，果然喺店中人氣沙律，好值得推介！
唐辛子烏賊 $48
燒製好嘅墨魚，淋上加入唐辛子（我哋就稱為辣椒）、檸檬汁做嘅醬汁，辣辣哋，又有點檸檬味，幾惹味，此外魷魚肉質軟腍，送啤酒應該最夾。少少題外話，墨魚（或烏賊，或花枝）跟魷魚一唔一樣？原來喺有分別，外型大致相同，只喺墨魚有扁塊芒果形石灰質嘅硬骨（摘自維基百科）。
跟住落嚟，輪到沾汁麵出場，款款都喺賣$75，其實今時今日晌香港，沾汁麵都唔喺咩新鮮嘢，麺屋武蔵一向都有賣，不過依次新推嘅喺「有坑紋」嘅麵條，透過坑紋提高掛汁效果。麺屋武蔵最著名嘅喺佢啲湯底，分別白虎（極濃厚豚骨湯底）、赤虎（香濃豚骨湯底加入超過10種辣醬製成嘅辣油）及黑虎（濃厚豚骨湯底加入燒香後嘅長蔥及玉蔥製成嘅黑蒜油），意外發現，原來仲有一款「蕃茄」底架，只限湯拉麵：蕃茄豚骨湯拉麵（$80），唔使講都知香濃豚骨湯底外加入咗咩啦。
沾汁麵系列
蕃茄豚骨湯拉麵（左）、御飯類（右）
如果未食過沾汁麵都唔怕，枱上嘅溫馨提示「建議沾汁麵的進食方法」，大可參考吓！
黒虎沾汁麵 $75
小弟份外鍾意蒜香之類味道，所以心水就喺「黒虎」，黑漆漆嘅「湯底」（抑或叫「汁底」好呢？）一上枱喺好香，負責人介紹時話個湯會較鹹，最傳統喺食完麵時，加啲木魚湯撞番淡先至好飲晒佢，唔建議就咁飲，但我又膽粗粗試咗兩啖，竟然又OK喎，可能小弟食嘢抵得鹹。每碗麵都會包一大塊叉燒、竹筍、蔥花、半熟玉子，叉燒少肥，軟腍鬆化，好啱食；竹筍入口爽脆，而蔥花夠多，好啱我；半熟玉子掂喎，好溏心，蛋黃綿柔、香滑，不過有食友反映佢哋隻蛋流心度不足，或許喺個別例子，但都喺有需要加強少少個穩定性。試試沾麵又如何，麵條粗身中間帶有一條坑紋，入口較煙韌，有咬口，個人反而覺得個「湯底」質地夠稀，而且比較油，影響咗麵條掛湯嘅表現。
赤虎沾汁麵 $75
無試，小弟頂唔得太辣嘛，嘩！仲要超過10種辣醬製成嘅辣油喎。不過聽食友講，嘿！又唔喺太辣咋喎，仲話魚香及豚骨味大過辣味添。等我下次又試試食，睇吓佢喺咪有心整蠱我！
虎洞特式果汁 ($28)
飲品方面，有日本啤酒、清酒，都有啲非酒精類，如汽水（惠顧任何拉麵，可半價配任何汽水1 罐）、日本有汽果汁、純果汁，此外，近期嘅新推介喺虎洞特式果汁，由檸檬、菠蘿、雪梨鮮榨而成，原材料，無添加，入口以檸檬及菠蘿味較為突出，最緊要喺解渴之餘，夠健康啫。
個人評分
味道：8/10
環境：9/10
服務：8/10
抵食：8/10
平均每人消費：HK$0（試食活動）
味道：8/10
環境：9/10
服務：8/10
抵食：8/10
平均每人消費：HK$0（試食活動）
餐廳資料：
麵屋武藏 虎洞 Menya Musashi Kodou
尖沙咀廣東道17號海港城海運大廈 LCX 3樓31號店
2735 8711
麵屋武藏 虎洞 Menya Musashi Kodou
尖沙咀廣東道17號海港城海運大廈 LCX 3樓31號店
2735 8711
沒有留言:
發佈留言