珍妮曲奇 Jenny Bakery：好友狂嚐曲（八）

又繼續「好友狂嚐曲」贈食系列，依次分享嘅喺2005年開業嘅Jenny Bakery，珍妮賣曲奇賣到開巷，由赤柱賣到出市區， 由港島賣到過九龍，早陣子仲有分店晌中環，都未開鋪，朝朝返工都見有人龍排曲奇，雖然大多數排隊嘅都喺內地客，但都有唔少本地人，不過小弟就從未為其曲奇瘋狂過，搵食隨遇而安可以啦！就好似今次，舅仔買罐珍妮曲奇俾女友一家，志在籠絡一下人心，當然，知道我依個姐夫為食，又成日幫佢手，佢自不然都要俾啲甜頭籠絡一下我嘅，「賄賂」費就喺8 mix果仁曲奇一罐，雖然咁大手筆，但小弟都覺得受得起架，因為平時都幫佢唔少嘢嘛！哈哈！

包裝外觀

8 mix果仁曲奇 $165
大罐嘅8 mix，淨重足足730g，非常墜手，罐內填滿晒一塊塊長形曲奇（註：圖中喺被屋企人食咗幾塊先影，所以先見到有少少虛位）。口味包括：咖啡杏仁、腰果、杏仁罌粟籽、合桃、朱古力果仁、榛子夏威夷果仁、開心果、爪哇欖仁（唔肯定中文喺唔喺咁譯，英文叫Kenari）共8款味。

整體嚟講，塊塊曲奇都好鬆脆，幾重牛油香味，塊塊都落咗唔少果仁，有相為證嘛，所以口感確實幾好，鬆脆中有咬口。味道上始終以咖啡杏仁曲奇及朱古力果仁曲奇較為突出啲，始終帶味嘅曲奇晌味道上佔優少少，後者更加入咗合桃、腰果、燕麥，所以口感寧捨豐富。至於其他款式，都以原味為主，口感分別唔太大，在乎食到嘅喺腰果、杏仁定合桃。

 食用期約1個月

既然有水準，其實以份量及價錢計，都幾抵食，不過，一想到要排餐懞就，就咪搞喇，總之，多謝晒舅仔啦！

個人評分

味道：8/10
環境：6/10
服務：6/10
抵食：8/10
平均每人消費：HK$165

餐廳資料：
珍妮曲奇 Jenny Bakery
尖沙咀彌敦道54-64號美麗都大廈地下24號舖
2813 8568