LaVilla：珍珠米的意大利飯

LaVilla嘅半自助午餐一直好想試，喺因為有位朋友試過之後，極力推薦，唔止抵食，雖然唔及酒店嘅自助午餐咁多嘢揀，但勝在質優。趁老婆生日，一於星期六過嚟撐枱腳，慶生日。LaVilla位處尖東尖沙咀中心，靠向梳士巴利道，面向維港。雖然有唔少露天位，其實感覺喺好開揚，不過，一來喺地鋪，睇唔到咩景；二來食正馬路，車流量唔少，費事吸廢氣；三來今日天氣有啲悶熱，坐入室內舒服啲。

因為餐廳開晌商場之內多個鋪位，所以，佈局好奇怪。踏入門口，晌商場通道之上，一邊喺廚房、水吧，另一邊喺用餐區，紅白餐枱布，配襯深啡木椅，挨牆一整列酒架，雖然喺日頭，睇唔到室內燈光效果，但從天花所裝嘅都喺定點射燈，大概都知喺有氣氛為主，一派意大利風情。

而我哋則被安排入另一個「鋪位」嘅「廂房」，一睇就知依個喺用嚟被人包場搞活動用，有晒投射機，燈光又炫幻，用上透明玻璃枱，跟之前提及個用餐區嘅佈置大庭相徑、格格不入，所以，先至話佢佈局奇怪！之但喺，依邊地方闊落啲，枱又大張啲，只喺「光撐撐」，欠缺氣氛啲。

半自助午餐嘅形式，可以只食前菜及甜品，收費$158 + 10%，若加多一客主菜，視乎所揀主菜而定，定價為$188、$218、$248 + 10%，另包餐飲一杯。其實只食前菜及甜品，我哋都覺得已經好足夠，不過，都想試佢一款主菜，所以揀咗個中價位嘅意式海鮮飯。

香草蒜蓉包．椰菜花忌廉湯

甫坐低無耐，就送上一小籃香草蒜蓉包，用餐巾包著，保持溫熱，個蒜蓉包OK無話有咩驚喜，反而，有一小碟黑橄欖碎，用嚟塗法包，就比較有心思。而蒜蓉包喺可以再添食，向侍應要求就可以嘞。

西蘭花忌廉湯就飲得多，但是日餐湯喺較少見嘅椰菜花忌廉湯，餐湯唔喺由侍應送上，而喺放晌出面食物區自取。椰菜花本物味淡，所以，個湯嘅味道唔突出，個人覺得麻麻，無乜睇頭。

而食物區，兩張長枱一眼睇晒，一張主要放沙律、冷盤及肉腸。但覺得佢個擺位都幾唔邏輯，成張枱由右至左喺（唔計個餐湯）：沙律菜及醬汁、幾款預製好嘅沙律、凍甜蝦、雜綿肉腸、煙三文、吞拿魚、沙律配料（粟米粒、車厘茄……），最覺得怪就喺啲沙律配料放到尾，而唔喺放晌沙律菜側邊。至於另一張長枱，則主要放置生果及甜品。

自助沙律吧．配料

放晌枱頭嘅沙律菜只有兩款：羅馬生菜及紫生菜，反而，醬汁有多啲選擇：凱撒、意大利油醋、千島及法汁，不過，若以質素而言，依幾款醬汁無疑喺普通啲，只可以講喺人有我有。放晌枱尾嘅配料，亦未見吸引：粟米粒、車厘茄、雅枝竹、青瓜條、橄欖及甘筍絲。

預製沙律

自助沙律吧認真麻麻，倒覺得預製沙律不俗，一共有4款供應，包括薯仔沙律、華都夫沙律、蟹籽青瓜絲沙律、芒果木瓜蝦沙律。後兩者無論調味，抑或配搭，都有水準。

冷盤

上文都提過有4款冷盤，分別有凍甜蝦、雜綿肉腸、煙三文、吞拿魚。甜蝦比較細隻，但鮮甜，所以，有翻兜；煙三文及吞拿魚亦都好食，軟綿油潤，尤其吞拿魚，加咗黑椒，又喺厚切，口感豐富。

因為選擇唔太多，可以將上述所以款式食材，共冶一爐，自家製一大碟包羅萬有嘅頭盤，一次過試晒。 

意式海鮮飯

一向都有少少鍾愛食意大利飯，所以，主菜就揀咗「意式海鮮飯」。賣相討好，尤其海鮮食材真喺好有睇頭，煎大蝦、墨魚仔、魚柳、帶子，絕對唔喺碎濕濕貨色，而且味道鮮甜，完全無欺場，相信散叫都值過百大洋。好可惜，美中不足就喺個飯，問題一喺無一向意大利飯嗰種濕潤，問題二喺飯粒唔咬口，而喺黏糯，口感似食日本米，向侍應求正，佢幫我問過大廚，回覆竟然就喺珍珠米嚟，無晒意大利飯嘅神髓，仲要食落感覺喺一大煲煲好之後，就咁直接用。

沙律、冷盤不過不失，主菜就有啲失望，剩落嚟嘅甜品又喺點呢？ 

生果碟
未講甜品，順便講一下生果，主要有菠蘿、西瓜及哈蜜瓜，搭少少火龍果及藍莓做裝飾。菠蘿就食得最多，因為喺新鮮貨，其他嘅，OK啦！

甜品

陣容其實算唔錯，有過10款選擇，有時一啲自助午餐嘅供應都喺差唔多，全部甜品包括：法式燉蛋、雜果啫喱、芒果布甸、意式奶凍、意大利芝士餅、美式芝士餅、班尼士、朱古力泡芙、朱古力慕絲、自家製雪糕及雪葩。

1. 法式燉蛋 – 有水準，面層焦糖焦香薄脆，燉蛋味濃香滑；

2. 雜果啫喱 – 無試，後尾換咗啲朱古力蛋糕仔，一般般；
3. 芒果布甸 – 味道OK，但個人覺得質感有啲實，變咗似奶凍；
4. 意式奶凍 – 推介，富奶香，軟滑挺實；
5. 意大利芝士餅 – 亦都推介，芝士軟綿，手指餅夠酒香，又帶咖啡味；
6. 美式芝士餅 – 以Oreo做餅底，較常用嘅消化餅嚟得有新意，芝士味超濃郁，正；
7. 班尼士 – 夠實淨，咁先喺「班尼士」嘛，朱古力味濃，又滿滿大粒合桃；
8. 朱古力泡芙 – 改用朱古力漿代替吉士或忌廉，特別啱老婆口味，當然，小弟都鍾意；
9. 朱古力慕絲 – 比較正路，無咩差錯嘅出品。
綜合而言，甜品晌本質上有一定水準，不過，都喺較常見、大路、做法簡單嘅種類，對比起一啲酒店級提供嘅甜品，無疑喺輸蝕咗少少，但喺，絕對滿足到大部份人嘅需要。

自家製雪糕及雪葩

1. 紅桑子雪葩 – 色澤誘人，酸香醒神；
2. 血橙雪葩 – 話血橙味，但「血橙」只佔啲雪葩丁點部份，根本食唔出血橙味，此外，雪葩做得太冰。諗住特別，老婆都要番一球，不過，大家都極為失望；
3. 雲呢嗱雪糕 – 嫌佢普通，無試，故不作評論；
4. 鹽味雪糕 – 甜與鹹晌口腔之間遊走，感覺又幾有趣，而且，雪糕質感柔滑。
雖然喺自家製，有誠意，奈何質素未見好突出。

最後，老婆要杯熱檸水，小弟要杯即磨咖啡作結，咖啡用上意大利Lavazza品牌，好醇香！

值得一提，服務方面幾抵讚，負責我哋一枱嘅女侍應，會主動問我哋需唔需要再添啲香草蒜蓉包；晌落單時，又問定我哋想幾時上主菜，又或有需要上主菜時通知佢，唔喺求其做好主菜就送嚟當交咗功課就算。此外，有關個主菜嘅「意大利飯」，佢都好有心幫我哋問個廚，雖然個回覆比較意外。整體而言，啲嘢唔喺差，部份有水準，不過只喺被朋友猛讚，有所期待，而結果只不過未及預期啫！

個人評分
味道：8/10
環境：7/10
服務：8/10
抵食：8/10
平均每人消費：HK$210

餐廳資料：
LaVilla
尖沙咀麼地道66號尖沙咀中心地下G28號舖
2724 0707