豆公館 Dau Gung Gun：百變小豆

屋企嘅裝修算喺進行得如火如荼，今晚趁得閒兩公婆出嚟旺角啲傢俬鋪睇睇傢俬，梗喺順便食埋飯先返歸啦。晌「登打士街」遇到一家「豆公館」，豆品嘢啱晒我老婆，佢自己都不時晌屋企整豆漿（當然喺用豆漿機整啦）。

走進店內，裝修簡約，實木小圓枱拼長條形小木櫈，有份台式古早小店風。是夜有非常多人幫襯，一枱走，又一枱入，可見香港人都幾鍾意食豆製品。

點菜紙就喺餐牌，既然開晌遊客區，當然要中英對照啦。唔好睇少佢只喺賣豆品店，食物嘅選擇就非常多元代，以分類計就有台式蛋餅、小食、麵類、粥類、飯品、刈包、多款豆漿及極具特色嘅豆腐花同甜品。

杏仁豆漿、杞子元肉紅棗黑糖豆漿 @$22

既然以豆為主打，豆漿款式自然多，而且，所有豆漿都可凍可熱。前者嘅杏仁味非常之濃郁，相對味道稍甜；後者有淡淡黑糖嘅清甜味，仲有少少薑嘅微辛，撈兩撈，底下有唔少杞子、元肉，感覺滋潤，而兩者亦不失豆香。

魚肉煎豆腐 $28

幾款小食中，呢個有魚肉，有豆腐嘅就最合老婆口味。一客有4件，煎得幾靚仔，附上甜豉油同辣醬，加唔加就適隨尊便。不過，有別港式嘅釀豆腐，魚肉跟豆腐喺分開嘅，但豆腐煎至外脆內軟，面面仲帶微焦，有豆香，而魚肉就嫩滑鮮甜。

肉鬆蛋餅 $42

我哋都幾鍾意台式煎蛋餅，所以，都點番一客試一試，簡簡單單揀咗肉鬆。蛋餅捲得實在，裡面填滿餡料，有肉鬆、甘筍絲、椰菜絲、蛋黃，口感豐富，味道鹹鹹香香，加埋外皮脆口得嚟又有份煙韌感，好食。

特盛黑松露炒米粉 $68

相貌平平嘅炒米粉，絕對喺以內涵取勝，首先啲米粉炒得香口爽身，又唔會太油，粉內夾雜住蛋碎、甘筍絲增加口感，最大亮點喺黑松露味極香濃，每口米粉麵沾滿黑松露香。

開心果豆腐花 $45
最後，梗喺嚟一碗招牌豆腐花作甜品啦，所有豆腐花都有凍有熱，而店長話熱食風味更佳。豆腐花表面淋上滿滿嘅開心果醬，再灑上開心果仁碎，賣相吸引。啲豆腐花真心堅滑溜，又有豆香，襯上開心果醬，好夾，估唔到咁好食。

單單賣「豆」，都有咁多出品，且頗有亮點，而且，着實好食，又有種台式小店風情，招呼亦都好唔錯，侍應都好有禮貌，做飲食喺咁先得架。

個人評分
味道：8/10
環境：7/10
服務：9/10
抵食：9/10
平均每人消費：HK$114

餐廳資料：
豆公館 Dau Gung Gun
地址：旺角登打士街43號地舖
電話：Nil