佰古嗲 Bak Kut Teh：古•添樂

東南亞菜中，馬拉菜算喺食得較多，再者，食友都知我鍾意食馬拉菜，就推介我嚟試試馬拉菜小店「佰古嗲」，話水準高，主打嘅肉骨茶頗有人氣，所以，就趁周五晚專程入嚟會一會佢。點解個名咁得意，睇埋餐廳嘅英文名字，就知喺肉骨茶（Bak Kut Teh）嘅音譯，真有意思！

果然好有人氣，餐廳分上下兩層，下層已經坐得滿滿。而室內裝修簡樸，一室以白色為主調，但牆上大大幅馬拉風情手繪，畫功精緻，非常吸晴。

而走到上層，同樣裝修樸素，亦坐得七七八八，此外，亦有巨型手繪壁畫，但主題貓貓，一樣畫得好靚，非常神似。

餐牌印刷精美，部份菜式有圖片作參考，分類上包括小食、肉骨茶、飯品、麵類、喇沙、精選菜式及飲品，定價親民，更要讚喺唔收加一服務費。

細滲 $88

雖然呢度嘅招牌係肉骨茶，而且選擇非常之多，但著實仲有好多菜式都想試，所以，就叫個「細滲」一嚐。唔好見佢細細兜，其實裏面裝滿晒食材，包括五花腩、豬肚、豬腳、雞腳、豆卜、金菇……等等，樣樣食材都入晒味，確喺唔錯；而個肉骨茶本身非常濃郁，嗰陣陣藥材味入口帶甘，口感幾舒服，再者，啲肉骨茶喺可以無限添加，不過，呢一份「細滲」裝出嚟都夠三四碗，絕對夠晒飲。

黃金醬虎蝦 $168

另一道想試嘅就喺呢道虎蝦，馬來西亞三面環海，出產唔少海鮮，而海鮮菜式都做得唔錯。份量可不少，雖然無實質去數，但食吓食吓估計都有成十多隻，蝦肉好爽甜，而且，開咗邊，更入味，個黃金醬喺以鹹蛋黃、牛油、忌廉推出嚟，鹹香惹味。

芽菜雞配黃薑飯 $88

芽菜雞亦喺馬拉出名菜之一，道菜本身配黃薑飯，但我哋就更加想試椰漿飯，所以，加$5改一改，因為加咗班蘭葉去煮，所以，一身青色，班蘭本身無乜味，隨之而來喺微微椰香，飯粒鬆軟。至於啲雞非常嫩滑，皮下脂肪少，雞皮卻好爽口，無論沾上黑醬油定辣醬，都好好食；此外，肥嘟嘟嘅怡保芽菜，入口爽脆多汁。

拉茶 $18

友人話奶茶就飲得多，拉茶喺點？都好想試吓，杯面厚厚嘅泡沫喺其特色，倒有幾分似飲意大利嘅泡沫咖啡。佢話個茶底幾香，雖然揀咗少甜，但比起港式嘅會偏甜少少。

冬瓜龍眼茶 $30

本來都想飲白咖啡，喺馬拉特色，但今日嘅配額已用咗，只好健康啲飲杯冬瓜茶，茶味清爽，夠消暑，甜味自然，加埋有少少龍眼肉咬吓，好唔錯。

鮮牛油咖央多士 $38

印象中，馬拉菜無乜甜品，反而，富特色嘅咖央多士偏甜嘅個性正好當為甜點都得。睇見厚厚嘅鮮牛油，加上帶椰香嘅咖央醬，兩者嘅融合變得非常有特色，加上多士烘得酥脆，實在為今餐有個好嘅結尾。

友人甚少食馬拉菜，甚至原來未去過馬拉，但佢就覺得今餐啲菜式好合口味，而且好好食，加上招呼好好，招呼我哋嘅姐姐不時問我哋有咩需要、使唔使加肉骨茶、清理枱面食完嘅碗碟並話聲慢慢坐，咁先喺留客之道。

個人評分
味道：9/10
環境：7/10
服務：9/10
抵食：9/10
平均每人消費：HK$210

餐廳資料：
佰古嗲 Bak Kut Teh
地址：大圍積存街14號地舖
電話：2884 0886