山區裡的走走趯趯: 𠽌𠽌 Syut Syut：「𠽌」不簡單

2025年7月11日星期五

𠽌𠽌 Syut Syut：「𠽌」不簡單

又嚟到周五晚可以同老婆出嚟食飯鬆一鬆，我哋嘅工作唔算忙，不過，周五先出街食感覺特別輕鬆啲。最近，咖啡友推薦我哋試吓呢一家以貓為主題嘅咖啡店「𠽌𠽌」，讚其環境舒服，餐點製作用心。

一入夜呢截街就好靜吓，但正正咁，更突出店舖嘅存在。未入餐廳，單喺門口已好有一股文青風，原來門口位喺專俾帶有毛孩嘅客人，呢個安排幾好。走進餐廳內，就會明顯知佢喺間以貓做主題嘅咖啡店，牆上嘅擺設，櫈上嘅坐墊，都喺貓貓元素。而一室簡約日系予人感覺喺小清新，枱櫈嘅編排又唔密，加上今晚客人唔算多，閒逸舒適。

開放式廚房，除咗睇到店主做菜之外，做菜時香氣四溢，未食已被香氣所吸引呀！

而廚房尾位，放齊好多調味料、紙巾、水杯、清水……等等，自由取用。

落單模式喺先晌門口收銀位落下單，再等食物送上，至於俾錢，下單時俾埋又得，食完先一次過俾亦得。而食物嘅種類，以貴精不貴多為路線，種類包括全日早餐、沙律、三文治、湯烏冬、意大利麵、日式咖喱蛋包飯、甜品及各式飲品，可謂麻雀雖小，五臟俱全。不得不提，飲品、甜品皆有加配優惠。

All Day Breakfast $118

大多時候，啲成品跟餐牌嘅相片都有好大出入，但先讚一讚店家，你晌餐牌見到嘅，跟送到上枱嘅，近乎一模樣，而餐牌亦標明有忌廉芝士酸種麵包、黑松露炒蛋、牛油果、香煎雞扒、沙律、希臘乳酪，絕無欺場。睇樣你可能會話：唓！咪都喺嗰啲，識食嘅話就會食出到分野。件酸種包口感好夠煙韌，較特別喺個皮脆口得嚟唔會好硬，事後同店主交流先知，啲包喺煎過，唔喺用翻焗；炒蛋有好強黑松露香，落得一啲無手緊，牛油果、乳酪都喺超級食物，夠晒健康，後者更加咗少少蜜糖同果仁，令味道同口感更豐富；雞扒亦有意外驚喜，皮下脂肪極少，煎到個皮勁脆，真喺有種食燒肉嘅感覺。

煙三文魚日式咖喱蛋包飯 $108
本來就好想試草飼牛肉眼嘅蛋包飯，可惜無貨，但三文魚我都啱嘅。唔喺講笑，件三文魚好大件，而且，煎得甘金，除咗啲肉好嫩滑、好油潤之外，層皮煎到脆卜卜，店主話佢哋喺用冰鮮貨，唔喺雪死晒嗰啲雪藏貨，啲點就顯示誠意。蛋包飯方面煎成旋風形蛋皮包住啲飯，配上好多野菜，啲野菜亦炒過嚟，調上味，唔喺白烚，香口好多，再加上帶甜味嘅日式咖喱，撈飯真一流。