Cruce：西班牙高質「兩」餸飯

約咗同晌中環返工嘅舊同學食晏，大家都想試試新嘢，加上平常大家都少出嚟食晏，所以，都想食好少少，所以，就試試晌擺花街新開無耐賣西班牙嘅小店「Cruce」。

餐廳嘅前身一向都喺做咖啡店，加上地方真喺唔太大，所以，佈局都以簡約為主，一室以白襯橙，望上去都幾醒神。

午市主要供應西班牙“2”餸飯，玩法好簡單，飯底（$68）再加配兩款或以上餸料，餸料定價$33-$98。此外，仲可以加配湯品、飲品、甜品，跟店長閒談間，先知原來店家將西班牙菜加入港式元素，都幾特別。

第一份西班牙飯 $169

第一份選擇嘅餸料喺三文魚柳配西班牙大蒜醬及泰國椰菜，因為喺即叫即焗，都要等少少時間，上到枱已感受到嗰份熱焫焫。三文魚大大件，加上有好多件椰菜，賣相幾有睇頭，而味道確喺唔錯，三文魚油潤豐腴，加咗啲特製嘅大蒜醬同牛油果醬，味道更富層次，兼且肉質滑溜非常，食得出用料高質。

第二份西班牙飯 $149

補充多句，用番鑊仔上枱，自然保持番西班牙海鮮飯嘅風格，此外，飯底本身已加咗西班牙火腿、蝦米、紅椒去煮，單喺食個飯都好好味。呢一份所揀嘅配料喺巴斯克烤雞同蒜香牛油青口，前者烤得香口，有點辣勁，好惹味，而後者睇樣都見喺靚貨，唔單止肉質柔嫩，並且充滿蒜蓉同牛油香味。

海鹽檸檬汽泡特飲 +$26、熱咖啡 +$26

配濃味食物，小弟就推薦呢一杯海鹽檸檬汽泡特飲，一來本身嘅味道鹹鹹甜甜，又帶點酸，已經味道獨特，二來喺汽泡飲品，飲起嚟感覺更清爽；而舊同學喺喜歡咖啡之人，餐後嘆杯香濃嘅咖啡，佢話感覺就最舒暢。

整體嚟講，食得出食材用料有一定嘅質素，招呼亦好唔錯，簡簡單單聚聚舊、食餐飯，最緊要喺食得稱心！

個人評分
味道：8/10
環境：8/10
服務：8/10
抵食：8/10
平均每人消費：HK$204

餐廳資料：
Cruce
地址：香港中環威靈頓街78號地舖
電話：8490 8020