Amuse：「醉」佳拍檔

晌深水埗有唔少隱世小店，晌表哥樓下轉角嘅「九江街」就有一家都幾隱世嘅酒吧餐廳，唔喺佢講都唔知呢個位會有間酒吧餐廳。其實轉角嘅「順寧道」一帶大把餐廳，只喺估唔到會有間酒吧而已，因為啲酒吧通常都開晌旺區。表哥話呢間酒吧餐廳都開咗好幾年，積累嘅人氣都唔少，其德國鹹豬手亦做得有一手，所以，今晚趁老婆返學無飯開就拉埋佢嚟試試。

雖然餐廳位處條細橫街，但唔難搵。整體環境甚具粗獷感，地台、牆身都喺以水泥為之，加少少壁燈燈效，帶點工業風。

近門口兩邊都放上休閒椅，襯以牆上嘅藝術塗鴉，予人有份非常寫意之感。

一本細餐牌喺各種酒類飲品，我唔好酒，就無影，而大嘅喺主餐牌，多款菜式都圖文並茂，雖然無刻意分類，但明顯都包括咗小食、主菜、意粉……等等類別，當中以小食類款式最多，皆因用作餸酒嘛！

此外，酒吧餐廳一向都會提供時歡樂時光優惠，但大多數限於飲品，但呢度依家仲做緊推廣，有好多優惠嘢，好似任何時段點招牌嘅德國鹹豬手，就送兩杯醉檸茶，咁又慳番兩杯嘢飲錢；另外，晌星期日至四嘅歡樂時光（4:00pm-8:00pm），追蹤番店家IG，指定食物就有半價優惠（餐牌中無紅點嘅就喺喇），以下標示喺正價，實際食得更划算。

醉檸茶（免費）

檸茶飲就飲得多啦，加咗微微酒精嘅檸茶就肯定喺第一次，仲加咗片風乾檸檬做裝飾，真喺別樹一格。飲落確喺如一般檸茶所帶嘅清香，然後，再滲出陣陣酒香，酒精度唔高，易入口，都有啲驚喜感。而且，無論襯炸魚薯條，抑或襯鹹豬手，其酸爽清涼嘅口感，都好夾，可謂最佳拍檔。

焗肉醬芝士大蘑菇 $98
一客有3大件大啡菇，粒粒都厚肉多汁，鋪上滿滿香濃嘅肉醬、厚厚嘅芝士一齊焗，一啖咬落去，非常惹味，卻又不失清爽感。順帶一提，不得不讚上菜嘅服務，初時覺得等咗好耐一樣嘢都未到，但原來店家刻意將3樣食物一次過同步送上。

炸啤酒魚柳薯條 $148

初頭諗住都喺啲小食類先有半價啫，估唔到呢個炸魚薯條都有優惠。單喺睇份量就知無將貨就價，兩大件炸魚一睇就見童叟無欺，炸得一身金黃，切成小件放入口，外層粉漿薄而香脆，裡面魚柳熱焫焫，嫩滑有魚鮮味，沾上他他醬就更滋味，而拌碟有唔少薯條，香脆唔油膩。

德國鹹豬手 $258

咁大隻鹹豬手以依個價錢，喺抵食價，份量睇得到有幾十足，最好嘅喺豬手已斬件，方便食用。豬手嘅外皮蠻脆口，卻又有份煙韌口感，食落又唔覺肥膩，肉下脂肪猶如食下骨膠原，肉質又幾軟腍，除了伴有沙律菜，墊底仲有啲嘅傳統嘅酸椰菜，有減膩之效，真不愧為招牌菜。

小弟成日都講，真喺唔可以睇小依家啲酒吧餐廳，做菜絕對有水準。雖則話市道唔好，食肆難做，但今日只喺閒日夜晚，就算喺呢個偏僻位，一樣有唔少客，仲越夜越多客嚟飲吓酒、傾吓偈。

個人評分

味道：9/10
環境：8/10
服務：9/10
抵食：9/10
平均每人消費：HK$215

餐廳資料：
Amuse
地址：深水埗九江街161C號地舖
電話：2652 2232