Chez Choux de grand：快閃泡芙下午茶

早前路經過K11嘅Le Creation買麵包，就偶然見到呢一家「Chez Choux de grand」，感覺啲產品好眼熟，再跟店員傾兩句，原來就喺平常晌港鐵見到嘅泡芙專門店「Choux Creme」（西樹泡芙）嘅姊妹店。趁機，就嚟一趟快閃下午茶，滿足一吓嗜甜嘅喜好。

呢間姊妹店，晌店旁設有少少高腳枱櫈，方便客人享用。而一室粉系，就知走少女風。早前已聽過朋友提及呢間泡芙店，多人提喺因為有唔少人買佢啲泡芙作為「散水餅」，高檔啲又有點特色。

基本上，店家嘅所有產品都陳列晒晌凍櫃之內，主打當然喺泡芙啦，除此之外，就仲有芝士餅、心太軟、布丁、Mochi Sweet……等等，各類產品嘅口味都非常之多，而且，賣相亦頗吸引，怪不之得，咁多人諗「散水餅」時會揀佢啦！

講番啲泡芙先，亦喺小弟今次想試嘅產品，從餐牌所見，基本上泡芙有十多款口味，然而現場所見，當日共有7款口味供應：意大利芝士、士多啤梨乳酪、芒果乳酪、玉桂蘋果吉士、白桃吉士、北海道牛奶、朱古力三重奏。

伝說‧焙茶 +$8

雖然呢度無咖啡供應嚟襯一襯啲甜點，但凡購買任何產品，都可以以優惠價買一支「伝說‧焙茶」或「伝說‧綠茶」，更可以揀凍或唔凍。小弟就揀咗支焙茶，貪其無乜苦澀味，又有明顯嘅烘焙香，卻又估唔到襯肉桂蘋果又OK喎。

玉桂蘋果吉士泡芙 $30

其實意大利芝士及芒果乳酪都喺小弟嘅首選心水，不過，玉桂蘋果又好似幾人氣，店員都話呢隻口味都銷情快，卒之都喺揀咗佢。

玉桂蘋果吉士泡芙以朱古力泡芙做底，亦有別一般有餡嘅泡芙咁，好似漢堡包開口夾住啲餡料，而喺將玉桂蘋果醬及吉士大大抹放上面。大大啖咬落去，泡芙底都幾脆口，質感鬆脆，朱古力味不俗；而中間嘅吉士軟滑而有蛋香，至於最面層嘅玉桂蘋果醬則玉桂味突出，蘋果肉亦好清甜，整體確喺幾好食。

今次都喺路經而快閃食個泡芙下午茶，下次有機會或者同老婆一齊嚟，又或晌港鐵嘅「Choux Creme」（西樹泡芙）買番去當餐後甜點。

個人評分
味道：8/10
環境：6/10
服務：7/10
抵食：7/10
平均每人消費：HK$38

餐廳資料：
Chez Choux de grand
尖沙咀河內道18號K11購物藝術館B1樓B122B號舖
2331 9488