榮華茶餐廳：規矩小店

依家除咗返工、放工、到超市買物資之外，都極少周圍逛，避免人群聚集嘛。適逢清明，需要去掃墓，但今次就只喺兩家人各派代表一個，我哋喺清明前一個星期去嘅，對比往年少一半人，場面都顯得冷清。難得「出關」，就一次過到埋石硤尾、深水埗一帶同親友有啲物資交收，順道食埋晏先返屋企。本來都諗吓約埋表哥食晏，不過，最後都喺唔好喇，一支公食完就算，免得交叉感染，唔喺怕被感染，喺怕唔知自己喺唔喺「隱形」嗰啲，感染到人哋。而晌福榮、福華街兩條「食街」睇睇有咩餐廳選擇，眼見好多食肆唔守規矩，完全唔覺有防疫措施，反而發現一間唔起眼嘅茶記小店「榮華茶餐廳」，一來睇到有防疫意識，二來真喺兩個多月未嘆過茶記奶茶喇，三來好想撐呢啲有心小店。

一入門口，被老闆娘嗌住，就喺因為要量吓體溫。餐廳嘅環境唔大，但兩邊卡位隔住嘅枱都被「封印」，而中間嘅圓枱都收起咗啲，令每張枱都隔番開啲，大大減低不必要嘅社區交叉感染。

剛好坐落時已經2:00pm，有下午茶供應，其實，佢哋嘅午餐都只喺賣$45，仲包例湯、餐飲，所以，如果食碟頭飯嘅下午茶餐（$40-$42），實際上喺無咩明顯着數嘅。

馬來炒貴刁 $42

出街食嘢，就梗喺揀啲自己唔識做、相對又難做嘅款式啦，8款碟頭中，炒貴刁喺其中之一，因為河粉就喺好難炒得好。小弟坐到最尾一行二人卡位，好近廚房，聽到熊熊炒嘢聲，夠鑊氣，而送到嚟嘅炒貴刁亦無欺場，色澤均勻，仲有好多餸料，叉燒、火腿、蛋塊、銀芽……等等，帶微微咖喱香，食完又唔會一碟底都喺油。

熱奶茶

呢個喺小弟去茶記嘅必然首選，感覺上杯奶茶色澤有點淡，入口個茶底芳香得嚟唔算好濃郁，口感嘅滑度一段，整體而言叫做OK啦！

依家香港嘅疫情都叫得做嚴峻，日日都爆幾十單，真心希望啲人自律，唔好咁自私，食店又好，食客又好，大家守守規矩，免得害人害己嘛！

個人評分
味道：8/10
環境：6/10
服務：8/10
抵食：7/10
平均每人消費：HK$42

餐廳資料：
榮華茶餐廳
深水埗福榮街58號
2387 7744