由於Spaghetti House（意粉屋）嘅關係，Spaghetti 360°貴為喺佢嘅姊妹店，加上店名冠以「Spaghetti」一字，小弟一直以為佢都喺賣意大利菜，直至最近幫襯，先知佢喺本着日式西餐廳飲食為概念，所以，餐牌上既有意粉、薄餅，又有咖喱，更有唔少西菜。再翻睇網上資料，原來晌2008年11月，意粉屋為慶祝成立30週年，開闢咗走年輕路線嘅新品牌spaghetti 360°，沙田新城市廣場店就喺當時嘅第一間分店嘞。
我同太太一向好少入嚟沙田食飯，今次真喺專程入嚟，因為一早應承咗請兩個表外甥食飯，卒之度好期，完咗教會就一程火車入到嚟。星期日嘅新城市廣場唔使講，都人來人往啦，幸好Spaghetti 360°午餐都有得訂位，準時到，準時俾位我哋。由於喺假日，周圍一枱二枱都喺一家大細，加上商場天頂喺玻璃建材，透落嚟嘅陽光令人寧捨有活力，唔會懶洋洋。
假日午市時段，以兩款午餐為主打，一個叫「假日午餐」，以個人為單位，另一款叫「假日二人午餐」，以兩人為單位嘅二人份套餐。
假日午餐
主菜有a-j共10款選擇，價錢由$66-$108，已包埋是日餐湯及香草橄欖油包條，並送即磨炭燒咖啡 / 茶 / 汽水，另有增值優惠，就喺+$10可將餐湯加配酥皮，+$15就能夠把餐飲升級為特色飲品，當然加一服務費喺唔少得。兩個表外甥最終揀咗c.嘅芝士焗蟹柳忌廉意大利粉同j.嘅日式咖喱吉列豬扒飯。
主菜有a-j共10款選擇，價錢由$66-$108，已包埋是日餐湯及香草橄欖油包條，並送即磨炭燒咖啡 / 茶 / 汽水，另有增值優惠，就喺+$10可將餐湯加配酥皮，+$15就能夠把餐飲升級為特色飲品，當然加一服務費喺唔少得。兩個表外甥最終揀咗c.嘅芝士焗蟹柳忌廉意大利粉同j.嘅日式咖喱吉列豬扒飯。
是日餐湯．香草橄欖油包條
是日餐湯嘅紅湯代表喺羅宋湯，味道不俗，酸香兼備，夠濃郁；相反，白湯代表嘅忌廉湯就真喺好忌廉湯，質感OK，但無乜味。一般都提供蒜蓉法包，但今次食到喺香草橄欖油法包，異曲同工，蒜蓉、香草都喺令法包多添一陣香味，最緊要個包烘得脆。
芝士焗蟹柳忌廉意大利粉 $78
意大利粉始終喺意粉屋嘅本業，所以佢哋做嘅意粉晌質感一向都唔錯，夠咬口，加上少少菇菌點綴，配以香草及芝士，味道已十分穩陣。蟹柳唔喺太平價一類貨色，咬落唔會太一舊粉，其實眾所周知，蟹柳無蟹肉成份，只喺魚肉、麵粉、色素、天然蟹味粉……等等製成嘅加工食品，多食無益，不過啲細路就喺鍾意啲咁嘢。
日式咖喱吉列豬扒飯 $78
細路即喺細路，始終都鍾意油炸香口嘢，不過，個吉列豬扒飯又真喺做得有啲水準，豬扒厚切大件份量足，外層香脆，內層鬆化，而咖喱微微哋辣，亦喺一貫日式帶啲甜味，撈飯良伴啦！
假日二人午餐
主菜有一個喺指定嘅：醬燒豬仔骨配香脆薯條及香芒汁田園沙律，而另一個則a-c任揀一款，包括：芝士焗卡邦拿意大利粉、360°薄餅及牛柳片熱石窩飯拌日式燒汁。同樣包埋是日餐湯及香草橄欖油包條（兩客），即磨炭燒咖啡 / 茶 / 汽水（兩杯），定價為$188，如加配日式甜品「日和三式甜蜜拼盤」，則收費為$208。同樣套餐增值優惠亦適用！由小弟決定要個360°薄餅，另外加配埋個日式甜品試試！
酥皮忌廉湯
餐湯、餐包上文講過，唔再累贅多講，只想話我哋其中兩客湯轉加酥皮，等啲細路又可以試試酥皮湯嘅特色。
醬燒豬仔骨配香脆薯條及香芒汁田園沙律
燒豬仔骨唔喺一條過，而喺裁開3件，件件有成人手掌咁大，而每件有兩支骨，燒得外觀唔錯，不過，都喺一件過有啲氣勢。豬仔骨外層燒得有啲焦香，再加埋塗上好多醬汁嚟燒，幾惹味，食落雖然有少少乾身，但未至於「嚡烚烚」；薯條，一貫麥記直身幼薯條，配BBQ汁，細路仔至愛。我哋反而鍾意食個沙律，雖然好簡單，生菜、青瓜、粟米粒、菠蘿粒、蟹籽，但加咗芒果汁，清新香甜。
360°薄餅（正價2mm批$80，厚批$90）
以360°為名，應該算喺招牌薄餅啩。餡料有煙肉、火腿、雞蛋、蟹籽，首先材料較普通，睇唔出有咩特色，落料亦都手緊，芝士都喺令人覺得喺落到少無可少，而且，鋪得亦極之「求其」，睇啲蛋同蟹籽就知有幾唔平均，所以，純粹講個批嘅味道，就喺只可以用「極為普通」嚟形容。不過，「2mm脆趣薄批」，咬落確實脆卜卜，但單以依個賣點，仍然認為個360°薄餅唔抵食。
除咗一人要杯凍檸茶外，其他都想飲得特別啲，所以都加錢升級轉晒特色飲品。特色飲品一共有9款選擇，好幾款都頗特別。
熱情果鮮果梳打（正價$32）
初時睇佢個特飲餐牌，以為熱情果鮮果梳打喺以熱情果、香桃、巨峰提子溝梳打做成嘅特飲，因為佢晌個飲品名下面括住上述3樣材料，點知原來喺3款個別嘅鮮果梳打。最後揀咗巨峰提子，之不過都喺糖漿溝梳打，所謂鮮果，就喺加咗啲菠蘿粒同士多啤梨粒啫！糖漿溝梳打喺點，表外甥話似提子芬達囉！
雪糕宇治抹茶紅豆冰（正價$32）
老婆一向鍾意紅豆，所以揀嚟依杯雪糕宇治抹茶紅豆冰，個雲喱拿雪糕大部份由我包辦，個抹茶紅豆冰，抹茶味道都幾幽香，但喺啲紅豆又真喺唔使咁孤寒一、兩啖就無晒嘛！
黃金海岸（正價$32）
我一向古靈精怪試東試西，依個黃金海岸最啱我，因為由菠蘿、橙汁、椰奶溝出，味道一定唔普通。先講色澤，偏橙黃，相信落椰奶份量好少吓，入口冰涼鮮爽，甚有熱帶風情，不過，好肯定一句喺橙汁偏多，因為菠蘿味唔夠出，椰子香亦欠奉！
日和三式甜蜜拼盤（正價$48）
正價賣$48，依家加多$20就試到，當然划算啦。三式甜蜜拼盤包括2件紅綠豆蓉冰卷、1件朱古力3.0軟心蛋糕及1球紅豆雪糕。所謂冰卷只喺講緊個感覺，冰卷喺以糯米粉做成嘅卷皮包住紅豆蓉同綠豆蓉，食落就好似慣常食到嘅糯米糍咁，外皮煙煙糯糯，豆蓉幾清甜；平時講幾多%就話可可濃度，唔知朱古力3.0軟心蛋糕嘅3.0為何解，個蛋糕本身都幾鬆軟，但朱古力嘅濃度又無話好高，所以，只喺一件唔錯而普通嘅朱古力海綿蛋糕；至於個雪糕晌餐牌寫喺紅豆雪糕，但上枱時就變咗普通嘅雲喱拿味道，多少有啲失望。
一個悠悠閒嘅星期日，同兩個表外甥食吓晏，雖然大家嘅話題有啲距離，不過，年輕人都要關心吓嘅。
個人評分
味道：7/10
環境：8/10
服務：8/10
抵食：7/10
平均每人消費：HK$120
味道：7/10
環境：8/10
服務：8/10
抵食：7/10
平均每人消費：HK$120
餐廳資料：
Spaghetti 360°
沙田沙田正街18號新城市廣場第三期1樓A130-A131號舖
2693 5905
Spaghetti 360°
沙田沙田正街18號新城市廣場第三期1樓A130-A131號舖
2693 5905
沒有留言:
發佈留言