上年晌度叫咗馬蘭頭伴豆乾、鎮江肴肉、黃金四季豆、冰糖小圓蹄、北京烤鴨、炒鴨崧、擔擔麵、青菜嫩雞煨麵等等，大家話想試吓其他嘢，唔好翻兜，不過北京烤鴨就一定要食喎，OK！OK！民意行先！
霸王山莊嘅餐前小食一向唔錯兼有特色，今次上枱兩小碗嘅喺，一個依舊醬油香菇配雜豆，另一個則煙鴨胸配青瓜絲粟米粒，前者菇香醬濃，後者煙鴨胸煙燻鹹香，青瓜絲清新爽口。雖然喺兩碗仔，不過收費喺斷位計，位位$5，幾好喺兩個細路無計。另外，茶位$10位，收加一服務費。
北京烤鴨（一食） $318
因為好食，所以依個店中招牌再次翻兜，照慣例，隻鴨燒好後即時奉客過目，之後返廚房再起皮起肉拎過出嚟。烤鴨現場即燒，寧捨香氣撲鼻，切法一如既往，都喺外邊擺放皮連肉嘅烤鴨，中間就主要喺烤鴨皮，附上兩籠熱辣辣嘅薄餅皮，加埋蔥度、青瓜、甜鴨醬。最欣賞喺唔嫌煩，餅皮以花餅紙一層一層隔住，唔會黐埋晒，絕對值得讚嘅細心位。淨食烤鴨味道甘香油潤，挾埋蔥度、青瓜、甜鴨醬，以薄餅皮捲住食一樣滋味，味道上香濃、清爽兼備。
宋嫂魚羹 $95
花彫醉雞 $78
花彫酒香但唔濃烈，晌雞肉中徐徐滲出，雞皮幾爽脆，肉質挺滑，實屬不俗嘅冷盤。
炸銀絲卷 $23
炸銀絲卷喺去上海鋪常點嘅點心嚟，炸銀絲卷炸得金黃香脆，一咬外脆內軟，沾啲煉奶真有畫龍點睛之效呀！
蒸銀絲卷 $23
晌小弟心目中，酸辣湯襯蒸銀絲卷喺一對絕配，鬆軟嘅蒸銀絲卷蘸點酸辣湯食，真喺可以產生化學作用。不過今趟無叫酸辣湯嚟，所以齋食條蒸銀絲卷感覺幾寡，其實，條蒸銀絲卷喺叫俾兩個豆丁食架啫。
韭菜花煎餅 $35
估唔到咁有驚喜喎，好似紙咁薄嘅煎餅皮，應聲咔嚓脆裂，又煎得非常香口，煎餅內又填得滿滿韭菜花，口感十分清爽，值得推介。
醬燒茄子 $69
有啲似魚香茄子喎，不過味道食落主要應以豆瓣醬炆煮啲茄子，較魚香茄子少咗份辣味，可以話喺走辣版嘅魚香茄子，適合埋小朋友食。
鮮味醬帶子炒飯 $98
雖然話喺帶子炒飯，但內裡配料又豈止得帶子，仲有蝦仁、芥蘭度，飯粒爽身唔油，炒得幾好，而且配料唔少，唯一喺個鮮味醬唔知喺乜，因為個炒飯跟一般楊州炒飯個味道又唔覺好大分別喎！
最尾，大家其實都有番咁上下飽，之但喺又想食吓甜品，結果都叫兩咗兩款齊齊分享。其實，甜品有另外一個餐牌，一共有9款選擇，如麻蓉擂沙湯丸、高力豆沙、豆沙窩餅、香椰果仁煎芋餅、八寶飯……等等，認真多花款。
酒釀小丸子 $28
小丸子較為黏糯，幽香不俗嘅酒釀，飲落唔喺太濃味，而且又唔太甜，都OK喎！
薑汁鴛鴦小湯圓 $28
薑湯幾夠薑味，而小湯圓有花生同芝麻蓉，故謂「鴛鴦」，而小湯圓果然細細粒，一客都實在有唔少，入口煙煙韌韌唔黐牙。
好開心同一班組員打波食晚飯，唔知再下一年會唔會又去柏景灣會所打波，完咗又喺晌霸王山莊食飯呢？
個人評分
味道：8/10
環境：7/10
服務：8/10
抵食：8/10
平均每人消費：HK$160
味道：8/10
環境：7/10
服務：8/10
抵食：8/10
平均每人消費：HK$160
餐廳資料：
霸王山莊 Kings' Lodge
大角咀海泓道1號奧海城三期UG98號舖
2673 1266
霸王山莊 Kings' Lodge
大角咀海泓道1號奧海城三期UG98號舖
2673 1266
沒有留言:
發佈留言