叙苑粉麵茶餐廳：生炒咖喱雞飯

嚟得敘苑都喺因為要去鑽石山火葬場，對上一次就喺同家人掃完墓，食埋晏先走。今次就出席朋友爸爸嘅喪禮，送埋最後一程，先會嚟咗依頭。

求其食餐晏，醒番起上次嚟過敘苑覺得唔錯，所以今次再幫襯。同上次一樣，都喺點每日超值快餐，快靚正抵食吖嘛，唯一唔同，就喺加咗價囉！日日唔同款，每日有6款選擇，款款賣$36，送例湯或啡茶，凍飲加$2，轉紅豆冰至喺加$3，今日嘅心水喺咖喱滑雞飯，因為上次食過佢啲咖喱，又確喺幾唔錯。

咖喱滑雞飯 $36

個咖喱比晌一般快餐店或茶記食嘅少少分別，唔喺就咁淋啲咖喱汁上面，睇樣見佢又有青椒、紅椒、洋蔥，直情生炒咁款，唔知可唔可以叫佢做生炒咖喱雞飯呢？咖喱汁底算不俗，雖然咖喱味稍為單一，但加咗青紅椒及洋蔥，惹味啲；雞件又幾滑喎，就算唔喺新鮮雞，都起碼喺冰鮮貨色！

奶茶

上次喺見加$3可以轉紅豆冰咁抵飲，所以轉嚟試試，今次就真喺想飲奶茶，好耐無晌茶記嘆奶茶嘞。芳香幼滑嘅奶茶，真喺只有茶記先揾到！

個人評分
味道：8/10
環境：6/10
服務：6/10
抵食：8/10
平均每人消費：HK$36

餐廳資料：

叙苑粉麵茶餐廳
慈雲山毓華街72號萬年戲院大廈地下
2322 3286