晌荃灣鱟地坊嘅八一蕃，喺巴蜀烤魚專門店，咩叫「巴蜀」？咪即喺四川，「巴蜀」個名晌先秦時期所存在於四川地區嘅兩個國家：巴國同蜀國，小弟中史極水皮，點會識依啲歷史嘢吖，都喺晌網上搵搵同大家分享吓。四川其中一道名菜「水煮魚」，小弟晌重慶山區工作時都領教過，辣嘢唔多啱小弟，所以八一蕃開咁耐就過門不入。老婆跟啲好姊妹晌度食過米線，話好正，有辣有唔辣，所以趁個星期日返佢嗰邊教會時就嚟食晏。
環境如一般粉麵鋪、米線鋪，裝修簡簡單單、四四正正，兩邊牆身裝上玻璃鏡，感覺好似大啲，一塊螢光手寫板，有當日小炒推介，不過嚟食晏就有啲不適用喇。服務普普通通，食個晏收你幾十蚊都唔可以有太多要求，但感覺又唔太差，只喺有啲「滾水淥腳」嘅感覺啫，哈哈。
有個過膠大餐牌，印有涼伴小吃、烤魚系列、串燒系列、廚師特別介紹，影埋出嚟俾各位當個參考。我哋嚟食午餐，目標自不然落晌「午市特別介紹」一欄，10款米線一喺賣$24，一喺賣$26，都幾實惠經濟。此外，真喺想食烤魚嘅話，午市都有啲2人餐（$138）、4人餐（$196），包小食、魚湯時菜、凍飲、白飯、烤魚，確實幾豐富。
晚市餐牌
午市餐牌
魚腩鮮腐竹米線 $26
份量一如大多數米線鋪咁大碗，鯇魚腩大件鮮甜，鮮腐竹清香豆味足，加埋豆卜索滿湯，米線柔滑，奶白湯底好濃魚味，味道鮮甜，問一問原來師傅以鯇魚嚟湯，估唔到鯇魚熬湯一樣咁濃咁正！
酸菜牛脷米線 $24
酸菜米線較鮮腐竹米線多份酸香，感覺惹味啲，但湯底依然魚味鮮濃，因為實在好飲，就算咁大碗魚湯米線，小弟一於清晒個魚湯，以表敬意，不過就只限小弟自己依碗啫。除咗豆卜，仲有少少秀珍菇，牛脷薄切，入口唔韌，頗柔軟。
由於米線份量著實不少，老婆本身都食唔晒一碗，所以小弟一個人頂碗幾米線，加埋清晒成碗魚湯，真喺飽到肚漲，廿零蚊就食到餐咁滿意嘅午餐，不愧喺好介紹。題外話，小店仲有免費wifi添！
個人評分
味道：8/10
環境：6/10
服務：6/10
抵食：9/10
平均每人消費：HK$25
餐廳資料：
八一蕃巴蜀烤魚店 Yaichi Ban Bashu Grill Shop
荃灣鱟地坊五十八號地舖
3568 5495
沒有留言:
發佈留言