尤海姆年輪蛋糕 Juchheim：心意無價

跟三幾個食友相聚，同枱食飯，有講有笑，故然開心啦。仲要有禮物收嘅，就梗喺雙倍開心啦！收禮之事都無話有咩特別原因，只喺友人實在好客，喜將美食化為禮物小心意，與人分享。依份心意，當真無價。所收嘅禮物，就喺一整個嘅尤海姆年輪蛋糕，收到時都幾驚喜架，因為年輪蛋糕都比較特別。之前從食友嘅食評及雜誌，都概略知其由來、創辦、發展等背景，有時一件成功嘅產品背後真喺隱藏著好多感人或辛酸故事。

年輪蛋糕簡簡單單以正方紙盒載住，外面套上牛油紙，面面隱約窺見到蛋糕嘅「年輪」。不單包裝簡約，連品牌「嘜頭」嘅設計都非常精簡有心思，品牌名字「Juchheim」加上喻意年輪嘅幾條長短橫線，唔花巧，但感覺優雅、大方得體。

盒底貼有成份、營養標籤及其他資料，友人已叮囑食用限期好短，最好盡快食，果真今日星期六收到，星期一就喺限期喇。由於有一整個年輪蛋糕，俗語有講獨食難肥，有好嘢當然要共享共嚐嘅，所以擺多一日趁同多幾個家人食完晚飯當飯後甜品。

打開包裝，細心一數，清晰嘅「年輪」可見一共有14層之多，一圈一圈，煞是有趣。朋友嘅厚意，又喺咁有心思嘅禮物，又點可以咁求其就咁切開齋食，咁啱未來舅嫂帶咗啲韓國士多啤梨上嚟，屋企又買咗兩盒Dreyer’s雪糕（Chocolate Cake味同Real Strawberry味），拼一拼埋去做個小甜品：年輪蛋糕配雙球雪糕伴士多啤梨。年輪蛋糕打開包裝時唔喺好香，但食落蛋味幾濃郁，入口軟綿，略帶點乾身，可能跟擺咗晌雪櫃一晚有關，其實佢盒底嘅標貼都有講只需放晌陰涼處就可以，不過近日天氣有點悶熱，怕就咁擺會變，入雪櫃穩陣啲。此外，牛油唔太重，甜度輕怡。

晌度藉機再次多謝食友MJ，正所謂施恩莫望報，但受恩慎莫忘，故此，其後都準備咗一份小小心意以作回禮，聊表心意！

個人評分
味道：6/10
環境：6/10
服務：6/10
抵食：8/10
平均每人消費：HK$0（禮物）

餐廳資料：
尤海姆年輪蛋糕 Juchheim
銅鑼灣軒尼詩道555號崇光百貨地庫B2F
2833 8338