鳳城皇宴 Fung Shing Banquet Hall：婚前試菜

「婚前」唔關我事，小弟成家立室多年，是日喺幫舅仔搵婚宴場地日啫，成個晏晝晌尖沙咀周圍打轉，之後晌海景嘉福酒店嘅Cafe on M嘆緊「高茶」，就順便總結一吓今日幫舅仔晌尖沙咀搵婚宴場地嘅概況，當中啱日子、環境OK嘅有兩間可考慮，其中一間喺鳳城酒家，所以，就索性晌度食埋晚飯先走，當喺試菜。眾所周知，鳳城酒家以北角及太子兩間為「正店」，其他嘅都喺一班伙計自立門戶夾份大搞所開嘅，而太子嗰間小弟就幫襯多啲，今晚晌「依間」又唔知會喺點！

嚴格啲講，應該叫佢做「鳳城皇宴」，不甘於晚飯小菜，擺明做埋酒席，所以，個大堂都裝修得幾富麗堂皇，天花加裝埋射燈，牆身多部入牆大電視。

留意地面招牌，確喺改咗為「鳳城皇宴」。

打開餐牌就見佢有個「拾大名菜」推介，由於啱啱嘆完下午茶無耐，所以大家都唔喺好餓，再者，點菜都喺以「試菜」為目的，故此就會揀得精啲，同埋跟酒席相類同嘅菜式，而份量就酌量一吓，好似斷件計嘅就唔會一人一件啦，三來大部份名菜都曾經試過，因此，「拾大名菜」（除金牌炸子雞外）留待下一次跟未試過嘅朋友吧！

題外話，睇餐牌時，打開「第一個」餐牌，點解無跟酒席相似嘅菜式，全部都喺京菜，原因喺依度一鋪兩店，喺鳳城（賣順德菜），又喺全聚德（賣京菜）。

 鳳城個餐牌，標明賣傳統順德菜。

全聚德餐牌，賣京菜。

蟹肉扒雙蔬 $98
依道雙蔬唔錯喎，西蘭花碧綠爽脆，最怕煮得過腍，失卻晒西蘭花嘅爽脆感。蟹肉鮮甜，份量十足，不過知我哋擺明試菜，唔知份量有無鬆手咗。

百花炸釀蟹鉗 $48（兩隻起）

蟹鉗無疑超巨，特意擺隻瓷羹晌隔離對比吓，隻蟹鉗真喺頗大隻。切開睇睇，原隻蟹鉗連肉藏晌入面，百花即喺蝦膠，肉質挺爽彈，而且蝦味濃郁，用料無欺場。炸功上乘，因為除蟹鉗炸得金黃，咬落脆口，唔會一口油對食客亦喺好重要！

原條遼參扣鵝掌 $98位

原條遼參有3隻手指夾埋咁粗，5吋幾長，非常有睇頭。小弟本身都唔喺多食鮑參翅肚嘅人，所以面對住條遼參，品評都喺純以個人口味。遼參入口口感十分爽彈，由於遼參本身無乜味，用咗鮑汁嚟扣，味道濃香好多，而鵝掌亦都扣得好鬆軟入味。事後上網睇睇遼參有咩好，當俾大家有個補充，原來佢喺一種高蛋白質、低脂肪、無膽固醇嘅食品，能化解人體內過多嘅膽固醇，又有顯著穩定血壓作用，唔怪之得聽講遼參都幾貴，尤其質量最好嘅日本貨。 

紅燒雞絲生翅 $160位

翅湯都有好幾個選擇，如鮮折蟹皇翅（$240位）、紅燒蟹肉翅（$180位），但因為酒席預設咗喺紅燒雞絲生翅，所以就散點一客嚟試試水準如何。原來一客都有幾大碗，平常計都足夠兩人食，睇落唔喺好有睇頭，撈落都相差無幾，雖然雞絲切得幼細，但魚翅嘅份量唔算多，呎碼亦都唔喺話好粗，始終喺生翅，唔喺排翅，喺無咁有排場。還好喺個高湯底濃而不俗，不過個人而言，都唔喺太建議食翅，因為睇過漁民取翅又確實頗唔人道。

金牌炸子雞（$220全隻 / $110半隻）

鳳城嘅炸子雞真喺唔錯，不愧為店內嘅「拾大名菜」之一，亦喺酒席菜式中嘅一道菜。基本嘅皮脆肉滑唔在講，雞味不俗，皮下脂肪又唔多，所以入口唔會覺得好肥好膩，個人較愛蘸喼汁多過淮鹽，感覺無咁「漏」，絕對有中和「熱氣」嘅心理作用，哈哈，俾個藉口食多幾件。

鳳城炒飯 $88

好弔詭，既然講到唔餓，又何解點個炒飯？咁講明目的喺試菜，個婚宴「單尾」喺鳳城炒飯，所以咪好正路臨尾咪點佢囉。個炒飯極之足料，蝦仁同叉燒落得一啲唔手熨，飯粒炒嚟有味又爽身，食完碟底又唔會一朕油，食得出師傅手功紮實。

最後敬送糖水，只喺紅豆沙已矣，所以就唔多特別寫喇。除咗啲招牌嘢、貴價嘢，其實仲有好多實惠又特別嘅順德小菜，如大良炸鮮奶、蜆蚧解牛肉、椒鹽風鱔球、家鄉煎蓮藕餅……等等，所以，值得再嚟再試。雖然，原先睇過個環境已經喺啱心水，而食物質素一環又過關，但某些原因最後都無揀到晌度擺酒，目標尚未成功，同志仍需努力……再搵。

個人評分

味道：7/10
環境：8/10
服務：7/10
抵食：8/10
平均每人消費：HK$150

餐廳資料：
鳳城皇宴 Fung Shing Banquet Hall
尖沙咀麼地道75號南洋中心地庫
2721 8798